1Menge kedowa ko, doen wedà ko pa toledai kenyo, so kenà kaw iling te otaw ontò egbeyà-beyaan te Espiritu Santo. Iling kaw beling te otaw egtaking te ibeg te kandan pedowan aw otaw kaling timaking ki Cristo.
2Se intoladà ko kenyo, yan se iling te gatas ipeinem te deitek batà. Kenà iyan iling te pengelapen, so eked niyo pa iyan kekinawà. Pengkey lamig songkani, eked kaw pa pekebatog kominawà kenyan,
3so egtaking kaw pa te medaet ibeg te kenyo pedowan. So doen pa kidoen kenyo egpeingaay aw doen heman egpedindilay, yan se pengilala te egtaking kaw pa te medaet ibeg te kenyo pedowan, iling te doma otaw kenà egtaking te Timanem.
4Doen ekon menge otaw kidoen kenyo eg-ikagi te egtaking dan ki Apolos, aw doen heman ekon egtaking kanak. Aw egpedindilay kaw, iling kaw den te menge doma otaw kenà egtaking te Timanem.
5Eked kepakay aw sikami si Apolos se tekingan niyo, so sogounun kay olò i Jesu Cristo aw migtoladà kay kenyo amon memenal kaw kandin. Tinoman day olò se sogò te Pengolo day.
6Ipegpolingun ko iling te pawà. Siak se minanggas, aw si Apolos se migtonggò, meneng Timanem se migpetilles te intanem.
7Kenà melangkaw se otaw manggas. Kenà heman melangkaw se otaw megtonggò. Meneng Timanem se melangkaw, so sikandin se megpetilles te intanem.
8Wedad melangkaw diyà te otaw manggas aw otaw megtonggò, so doen ontong ibegay te Timanem diyà te teg sebad-sebad kandan tepad te eg-inangen dan.
9Didowa kay si Apolos se insogò te Timanem meg-inang, aw iling kaw te pawà pinetrebehowan te Timanem kenami. Doma ipolingun ko, iling kaw te balay impeinang te Timanem.
10Tandà te tabang te Timanem kanak, iling a te otaw biyasa meg-inang te balay. Insawol ko den se petindegan te balay, aw doma otaw se megpedeleg te peg-ipenga te balay sìyan. Meneng pengkey sinu se meg-inang te balay, keilangan meketotok se peg-inang din kenyan.
11Se pinetindegan te balay insawol ko, yan olò si Jesu Cristo. Wedad doma petindegan mepakay isawol kidoen te balay ipeinang te Timanem.
12Kidoen te pinetindegan sìyan, mebatog inangen se balay bolawan, aw selapì, aw bato meelagà, aw tabla, aw sagbet, aw legami.
13Meneng aw lomikò si Jesu Cristo, ipekità din te menge otaw aw doen ontong te ininang dan, so ipeokit i Cristo se inang dan diyà te apoy amon ketegahan aw mèpiya iyan.
14Aw mèpiya se ininang dan kidoen te pinetindegan iling te balay eked kesonog, begayan din dan te ontong.
15Meneng aw kolang se ininang dan iling te balay melomì mesonog, eked begayi te ontong se otaw mig-inang kenyan. Pengkey wedad ontong dan, meneng mekelowà dan iling te otaw mekelowà lekat te apoy.
16Netegahan niyo den ini. Se kedita niyo egpemenal, iling kaw te balay te Timanem, aw eg-ogpà se Espiritu Santo kidoen kenyo.
17Aw doen otaw megbaet te balay sìyan, pegbàtan heman sikandin te Timanem, so balay te Timanem se eg-ogpaan din, aw sikiyo se balay din sìyan.
18Peg-ahà kaw amon wedad keekalan kenyo. Aw doen otaw kidoen kenyo eg-ikagi te doen den kebiyasa din dini te keneyonan, keilangan tenanan din se kebiyasa din sìyan amon kinewaen din se ontò kebiyasa ibegay te Timanem,
19so se kebiyasa te otaw dini te keneyonan, wedad ontong niyan diyà te Timanem. Benal se kagi te Timanem insolat, “Se kebiyasa te otaw, yan se isilit te Timanem te otaw eg-aneng-aneng te doen kebiyasa dan.”
20Doen heman doma kagi te Timanem insolat, “Netegahan te Pengolo te wedad ontong te aneng-aneng te otaw eg-aneng-aneng te doen kebiyasa dan.”
21Yan keilangan eked niyo duyuni se pegkeotawun niyo tandà te kebiyasa te otaw egtekingan niyo. Eked iyan kepakay, so imbegay te Timanem se kedita dan diyà kenyo.
22Pengkey siak, aw si Apolos, aw si Pedro, insogò te Timanem se kedita day amon megtabang kenyo. Pengkey eden se ontong dini te keneyonan, pengkey dalem te wedà kaw pa kematay, aw pengkey matay kaw, aw pengkey aldaw seini, aw pengkey modi aldaw, tomalag iyan imbegay te Timanem amon doen ontong niyo,
23so sakop kaw i Cristo, aw si Cristo se sakop te Timanem Amay.
