1Menge kedowa ko, pegdoton ko kenyo kedengan, migtoladà a kenyo te kagi te Timanem, meneng wedà ko iyan peokiti te medalem kagi aw kebiyasa te otaw,
2so ibeg ko, sebad olò se itoladà ko kenyo, yan si Jesu Cristo aw pegkematay din kidoen te kros.
3Peg-ogpà ko doton kenyo, iling te melomay se lawa ko aw tinegangtang a, so nelemitan a aw eked ko ketoman se ibeg te Timanem inangen ko doton.
4Pegtoladà ko kenyo te kagi te Timanem, nemenal kaw kanak kenà tandà te kebiyasa te kagi ko, meneng nemenal kaw so kinità niyo se tabang te Espiritu Santo kanak.
5Yan nemenal kaw ki Jesu Cristo, kenà lekat te kebiyasa te otaw, meneng lekat te eneg te Timanem.
6Aw ontò egtaking te Timanem se otaw egpenenalan kanak, yan se egtoledaan ko te kebiyasa medalem. Kenà iyan iling te kebiyasa te otaw dini te keneyonan. Kenà heman iling te kebiyasa te otaw eglowan, so pesalo dan megkewedad.
7Meneng se medalem kebiyasa ipegtoladà ko, yan se kebiyasa lekat te Timanem wedà din petega-tegahi diyà te otaw kedengan. Meneng te wedà pa peg-inang se Timanem te keneyonan, tapay din den piglalang te doen kelowaan lekat te salà amon domoma kidon kwani kandin.
8Se menge otaw eglowan dini te keneyonan, wedà dan ketegahi se peglalang te Timanem, so simpana netegahan dan iyan, eked dan peden lensangi se Pengolo melangkaw doton te kros.
9So doen kagi te Timanem insolat, “Doen integilan te Timanem ibegay din diyà te kedita te otaw dakel se pedowan dan kandin, aw labi pa iyan mèpiya diyà te pengkey eden se dinineg tadon, aw kinità tadon, aw neeneng-enengan tadon.”
10Kedengan, wedà petega-tegahi te Timanem se integilan din kenitadon, meneng impetaga-taga din den iyan kenitadon pineokit te Espiritu Santo, so netegahan te Espiritu Santo se kedita te aneng-aneng te Timanem pengkey medalem.
11Eneng-enengi niyo ini. Wedad palos otaw meketaga-taga te aneng-aneng te doma otaw, so yan olò se ketegahan din se kandin aneng-aneng. Iling heman kenyan, wedad palos otaw meketaga-taga te aneng-aneng te Timanem, so olò Espiritu Santo se egketaga-taga kenyan.
12Sikitadon egpemenal se binegayan te kebiyasa kenà iling te kebiyasa te otaw dini te keneyonan, meneng Espiritu Santo se imbegay din kenitadon, amon ketegahan tadon se kedita te imbegay din kenitadon.
13Yan kenà lekat te kebiyasa te otaw se ipegtoladà day, meneng lekat te Espiritu Santo se kagi day, aw yan egtoladà kay te kebenalan tepad te Espiritu Santo diyà te menge otaw egbeyà-beyaan te Espiritu Santo.
14Meneng se otaw kenà egbeyà-beyaan te Espiritu Santo, yan se otaw eked pekekinawà te ibegay te Espiritu Santo, so aneng-aneng din wedad ontong niyan. Eked din iyan kelebeti, so kelebetan iyan olò aw tebangan kidon te Espiritu Santo.
15Meneng se otaw egbeyà-beyaan te Espiritu Santo, yan se mekelabet te kedita, meneng eked sikandin kelebeti te doma otaw kenà egbeyà-beyaan te Espiritu Santo.
16Benal iyan so “Wedad palos otaw meketaga-taga te aneng-aneng te Timanem. Wedad heman otaw meketoladà kandin.” Meneng sikitadon egpemenal se pinetega-tegahan i Cristo te aneng-aneng din.
