1 Koren 10:10-27

¹⁰A pe pon re tevismumun Ntewa poli, sane la nap̃a asum̃a akila nanua sumo e pogos kiena kata apua lala. E poglis nene, Ntewa pitetalia navisi tai na visaaren marena pimi pula, m̃emom̃ar la.

¹¹Tepisu nap̃a la asum̃a akila ke mlamulena viowa sanene, ana tepisu nap̃a nakoaena pimi m̃alivin la ke sanene, ana pe suri tai nawep̃ege itaena. La asirilua kana suniena nena nakonua konua rui, ana tekilia tesitomyu si suri nene nagane, e legiena maro la ne tesike e ne.

¹²Sanene, visae yar tai visuveve si kiena malena naga taaga, a sitom sape naga sum̃a sum̃alu ruru ke m̃arera rui, popon naga visuar ruruia, komin viowagan nap̃a visae naga kila si viowa pogos tai, ana loru.

¹³Apisu nakilaliena la imi, ana ve sinemiu kurkur manene re. Pe kam re ga apane ke natap̃aliena la nene poli, ana asum̃a am̃alivi ke e malena kiena ne yaru make ga. Ana akilia awasine Ntewa, komin nap̃a yoko naga tap̃atete kila ko ovane natap̃aliena nap̃a ko pe otorokin re otaulu poli, ana pogos nap̃a natap̃aliena imi kilali ko, yoko naga vian kon kiom̃a mrapa nam̃areraena nap̃a nasuwoen natap̃aliena, vano-o oure matan nam̃areraena na tap̃aliena nene.

¹⁴Kiau erau wo lala, monar ve ava re nena lavisin p̃elaga nap̃a yar la asum̃a amlotun ke nono na visokanena lala.

¹⁵Nekilia nesape kam na yar sur la nap̃a akilia suria, ana pogos nap̃a nepisaar mesmesun nena pan amiu sanene, nemlelaga nesape kam na amninu kilale ya nap̃a nesum̃a nepisa ke ne.

¹⁶Nepisa visena la nene komin nap̃a pogos na ova oyakol amio yar la nap̃a asum̃a amlotun ke nono tai, sa ga nap̃a ko m̃ena omlotun ke nono nene narui. Naga nene maran taaga amio ita la nap̃a temlelaga ke e Kristo. E pogos na p̃ap̃agena wa, temlenin namunena wa, temlavia, a na nene sa nap̃a ita tepisawal tesape tesikol ita e p̃egas kiena yar la nap̃a kana kuruta mlau komin la. Ana siraunia, takawero kilaparavi wa, temlavia, a na nene sa nap̃a ita temio la nap̃a akila kare tasnena nap̃a tamalele metava e lak torovia.

¹⁷Nanene lelaga pan ita punu ga nap̃a tesum̃a tepim lele taaga e p̃ap̃agena wa nene, komin nap̃a tepim sane p̃egas taaga, a takan pae ga kilaparavi taaga nene.

¹⁸A sa ke m̃ena ga nene pa le Israel lala, pogos nap̃a am̃emom̃ar suri na kup̃ap̃aena lala. Lap̃asa pe akila re kup̃ap̃aena poli, ana akekaran kanen tata na kup̃ap̃aena nene nap̃a yaru tap̃ena ga la akila, ana kila sa nap̃a ape p̃egas taaga nap̃a akila lotena na sanene pan Ntewa.

¹⁹Pogaga, visena la nene kana kinas na ya? Nesum̃a nepisayu ke nono lala amio nakup̃ap̃aena la nene, ana e kiau sitomena kana kinasa pe nepisa re nesape sur la nene na lelaga poli, pona apowo liu.

²⁰Pe sa re nena nene poli, ana popon nekila meraravan van amiu, nesape la nap̃a akila ke lotena kar la ne sanene, pe amlelaga re e Kristo poli, a kup̃ap̃aena la nap̃a asum̃a akila ke ne, pe asum̃a akila re pa Ntewa lelaga poli, ana asum̃a akila ke ga pa yermare lala. Sanene, pe pon re ava lavisin la nap̃a asum̃a akila ke poli, komin pe sineun re nesape asikol amiu amio yermare la poli.

²¹Ko nap̃a ototano ke e lele na kinanena kiena Sup̃e, osum̃a omun ke e m̃ana piala wa, a osum̃a okan ke kana kinanena wa, tap̃atete okilia ova ototano e lelen kinanena kiena yermare lala vena omun kiela namunena a okan kiela kinanena.

²²Yar na kila sanene naga sum̃a miyur ke Sup̃e, kilia kila Sup̃e vielue vap̃isi, sinena karia. A pona yar nene sitom ke sape visae Sup̃e sinena kar sanene, pe pe sur re tai poli, komin naga m̃arera manene taulu Sup̃e? Pe nesitom re nena sanene poli.

²³Visena tai sum̃a ga, nap̃a yar la mokliu apisa apisape, yaru kilia kila ga ya nap̃a naga sinenan sape kila. Pona visena nene pe lelaga yo, ana sur lap̃asa sike na nap̃a nekilia nekila, ana yepmavin ga kilaena, komin e kiau navisuena, la pe asum̃a amiila inu re e kiau malena poli, a pe asum̃a amiila re malena kiena yar la nap̃a asike lavisin inu poli.

²⁴Nepisa sanene komin nap̃a pe pon re yar tai sum̃a sitom̃al ga naga taaga poli, ana monar sitom̃al m̃ena yeririna la nap̃a naga sike lavisin la.

²⁵Pogaga, nagane yoko nevisa sur lap̃asa e lepas na tata na sur mali lala nap̃a akila kup̃ap̃aena ea pan kiela nono na visokanena lala. Visae awar tata la nene imi, aligan su amio tata tap̃ena lala, vena awilwilin la, tekilia toulia takan woga ga. Nanene komin nap̃a tap̃atete tekilia tevisu kilale sane tata na ya la ne sanene, tesape tata ya nap̃a akila kup̃ap̃aena ea, pona tata ya nap̃a pe akila re kup̃ap̃aena e poli, ana ve tesitom manene re, ve teviun re, toul ga narui.

²⁶Telavia, takania, komin nap̃a sane visena tai pisa sanini sape yomarava nini, amio sur make ga nap̃a sike ea, naga pe kiena ai? Naga pe kiena kieta Sup̃e.

²⁷A visae yaru tai nap̃a pe mlelaga re poli, vio ko vena ova okinana e m̃ana yum̃a, pona omaraun vaena yo, osum̃a ositom ke osape pona awar kinanena lap̃asa van ko nap̃a akila pae lotena na kiela nono la e yo rui. Ana peraga, visae osum̃a ositom ke nap̃a ovano, ova ga, a ve oviun re naviunena sanene, ola ga ya nap̃a visae ala van ko.