1 ቆሮንቶሳ 10:10-27

¹⁰ኡንቱንቱፔ ኢቱ ኢቱ ዙዙሚና፥ ዎꬊያ ኪታንቻን ኡንቱንታ ꬋዪሴዳዋዳን ዙዙሞፒቴ።

¹¹ሃዌ ኡባይ ሃራቱሲ ቲሚርቴ ጊዳናዳን ኡንቱንቱ ቦላ ጋኬዳ። ቃሲ ኑና ዎዲያ ዉርሴꬃይ ጋካና ማቴዳዋንታ ሴራናው ፃፌቴዳ።

¹²ሄዋ ዲራው፥ ሚና ኤቃዲ ጊዴ ቆፒያ ኡራይ ኦኒኔ ኩንዴናዳን፥ ባሬና ናጎ።

¹³ሂንቴንታ ጋኪያ ፓጪ፥ ኣሳ ኡባ ጋኪያ ፓጪያ ማላፔ ኣቲን፥ ኣይኔ ዱማቴና። ሂንቴንቱ ዎልቃይ ዳንዳዪያዋፔ ኣꬊያ ፓጪያን ሂንቴ ፓጬታናው ኮዬና ፆሳይ ኣማኔቴዳዋ። ሺን ሂንቴንታ ፓጪ ጋኪያ ዎዴ፥ ሄ ፓጪያ ኢ ሂንቴንታ ዳንዳዪሳና። ቃሲ ሄ ፓጪያፔ ሂንቴንቱ ኬሲያ ኦጊያካ ኢ ኢማና።

¹⁴ሄዋ ዲራው፥ ታ ዶሲያዋንቶ፥ ኤቃው ጎዪኖፒቴ።

¹⁵ሂንቴንቱ ዎዛናማ ኣሳ ጊዴዳ ዲራው፥ ታኒ ሂንቴንቶ ኦዳይ። ታኒ ጊያዋ ሂንቴ ፒርዲቴ።

¹⁶ኑኒ ፆሳ ጋላቲዴ ሻኪያ ኣንጁዋ ፁዓይ ኪሪስቶሳ ሱꬃና ኢቲፔቴꬃይ ዴዒያዋ ጊዴኔ? ቃሲ ኑኒ ሜንꬂያ ኡኪꬃይ ኪሪስቶሳ ኣሹዋና ኢቲፔቴꬃይ ዴዒያዋ ጊዴኔ?

¹⁷ኢቲ ኡኪꬃይ ዴዒያ ዲራው፥ ኑኒ ጮራ ጊዶፔካ፥ ኢቲ ኣሳቴꬃ። ኣዪሲ ጎፔ፥ ኑኒ ኡባይካ ሄ ኢቲ ኡኪꬃ ሻኬቴቶ።

¹⁸ኢስራዔሊያ ኣሳ ፄሊቴ። ያርሹዋ ሚያዋንቱ ያርሺያሳና ኢቲፔቴꬃይ ዴዒያዋንታ ጊዲኪኖ?

¹⁹ሲሚ ታኒ ዋጋይታ? ኤቃሲ ያርሼቴዳ ቁማይ ማዲ ዎይ ኤቃይ ማዲ?

²⁰ማዴና፤ ሺን ታኒ ጊያዌ ፆሳ ኣማኔና ኣሳቱ ኢታ ኣያናቱዋሲ ያርሺያዋፔ ኣቲን፥ ፆሳው ያርሺኪኖ። ኢታ ኣያናቱዋና ሂንቴ ኢቲፔ ዙፔታና ማላ፥ ታኒ ኮዪኬ።

²¹ጎዳ ፁዓፔ ኡሺዴ ቃሲ ኢታ ኣያናቱዋ ፁዓፔ ኡሻናው ሂንቴ ዳንዳዪኪታ። ጎዳ ጋይታፔ ሂንቴ ጊሼቲዴ ቃሲ ኢታ ኣያናቱዋ ጋይታፔ ማናው ዳንዳዪኪታ።

²²ሄዋ ኡዲዴ ኑኒ ጎዳና ፂኖታናው ኮሺ? ኑኒ ኣፔ ሚኔቶ?

²³ሂንቴፔ ኢቱ ኢቱ፥ «ኡባባ ኦꬃናው ታና ዲጊያባይ ባዋ»፤ ሺን ኡባባይ ማዴና። «ኡባባ ኦꬃናው ዲጊያባይ ባዋ፤ ሺን ኡባባይ ጌሼና» ያጊኖ።

²⁴ኦኒኔ ሃራ ኣሳ ማዲያባ ቆፖፔ ኣቲን፥ ሃራይ ኣቶ ኢቱኔ ባሬና ማዲያባ ቆፖፖ።

²⁵ጌያን ኣፃሬ ታራን ዛሊዔቲያ ኣሹዋ ሂንቴ ዎዛና ቆፋን፥ ኣይኔ ሲꬌናን ሚቴ።

²⁶ኣዪሲ ጎፔ፥ ኣላሚኔ ኣኒ ዴዒያባይ ኡባይ ጎዳባ።

²⁷ኢቲ ኣማኔና ኣሳይ ሂንቴንታ ኢማꬃ ኡዲ ሾባናው ፄሲና ባናው ኮዮፔ፥ ሂንቴ ዎዛና ቆፋን፥ ኣይኔ ሲꬌናን ሂንቴ ሲንꬃ ኢ ኣꬂያባ ኡባ ሚቴ።