1 Korint 10:10-27

¹⁰Yeŋgöreŋök tosatŋan galömurupŋini irikuruk jimoŋgot aka andö eŋguba malgetka mem ayuayuhu garatanöŋ mönö eŋgui kömuget. Neŋön mönö tosatŋi mieŋgö dop irikuruk jimoŋgot laŋ aka malbinbuk.

¹¹Mewö asuhum eŋgiyöhi, söpsöp keu mi mönö nanini kezapqetoknina akza. Gölmenöŋ malmalgö nalö teteköŋan kam kuŋgum neŋgii maljini, kösohot mi mönö neŋgöra aka ohogetka galöm meme keunina akza.

¹²Miaŋgöra kin köhöimangö jizani, mönö et guhubapuköra galöm mem aŋguba malman.

¹³Esapesap qakŋine öŋgömakzei, mi gölme ambazip körek neŋgö qaknine öŋgömakze. Esapesap qainŋi kun miwikŋaibeak, miaŋgöreŋ ösumŋinan qahö dop köljawaŋgöra etpeakmö, Anutunöŋ keuŋi jöhöyöhaŋgö dop mi pöndaŋ wuataŋgöba ahakza. Yaŋön esapesap Toŋi aŋgön köliga esapesap ösumŋini qahö dop kölmawaŋgö dop mi al eŋgimamgö osimakza. Mewögöra esapesap mötketka Anutunöŋ ösumŋi eŋgiba mewö miaŋön ölöŋ kölbingö köna mewöyök mesat eŋgii asuhumakza. Miaŋgöra eŋön gölmegö esapesapŋi mi ölöp kin köhöiba luhut almeaŋgö dop akze. Mewö.

¹⁴Miaŋgöra wölböt alaurupni, tosatŋan tandö lopioŋ waikŋini memba möpöseim eŋgimakzemö, eŋön mi kök ala mosötme.

¹⁵Nöŋön mötmöt ambazip aködamunŋinambuk akzeaŋgö dopkeu jimami, mi mönö nanŋinak kewöta miaŋgö ölŋi miwikŋaime.

¹⁶“Kembugö semön nene nembin,” jiba kötumötuetkö qambigöra Anutu saiwap jiba köuluköba qambi miaŋgöreŋök nemakzinaŋgöreŋ mönö Kraistköreŋ toroqeba sepŋi nemakzin. Beret mindipköba miaŋgöreŋök nemakzinaŋgöreŋ mönö Kraistköreŋ toroqeba busuŋi nemakzin. Miaŋgöra ölum eŋgubapuk.

¹⁷Körek neŋön beret mohot miaŋgöreŋök nemakzin. Beret mi mohot akzawaŋgöra aka gwötpuk neŋön mönö Kraistkö ölŋi mohot akzin.

¹⁸Iŋini mönö Israel könagesögö malmalŋi mötmörime. Ambazip jöwöwöl ohomegöra nene algetka tosatŋan miaŋgö kitipŋi nemakzei, yeŋön mönö altagöreŋ toroqeba nupŋi Anutugöra memakze.

¹⁹Keu miaŋgö könaŋi ölŋi mi mönö denöwö jibileŋak? Tandö lopioŋ eŋgöra bau qegetka sepŋi eri jöwöwöl ohomakzei, miaŋön ölŋambuk akzawaŋgöra jiza me qahö? Tandö lopioŋ mi ölŋi akzeaŋgöra jiza me qahö? Keu miaŋgö könaŋi denöwö?

²⁰Tandö lopioŋ mi ölŋi qahöpmö, urumeleŋgö kopa yeŋön töndup jöwöwölŋini ömewöröme yeŋgöra ala ohomakze. Mi Anutugöra qahö. Nöŋön iŋini ömewöröme yembuk toroqeba malbepuköra waimanjat mötzal.

²¹Iŋini Kembugö qambinöhök aka ömewöröme yeŋgö qambinöhök öröröŋ nembingö osime. Mewöyök Kembugö nene dum aka ömewöröme yeŋgöreŋ nene dum mi öröröŋ toroqebingö osime.

²²Ahakmeme mewöŋan mönö Kembugö uruŋi qei böliiga irimŋi seholimapköra mötzin me? Kukösumninan mönö Kembu oŋgita öŋgöba maljin me?

²³Tosatŋan kewö jimakze, “Nini ölöp nanine imbi-imbi yuai pakpak ahakzin.” Keu mi ölŋapmö, ahakmeme pakpak miaŋön mönö qahö bauköm neŋgimakza. “Nini ölöp nanine imbi-imbi yuai pakpak ahakzin,” mewö jimakzemö, ahakmeme pakpaknöŋ mönö urunini qahö naŋgöba mem köhöim neŋgimakza.

²⁴Kunŋan kun nanŋaŋgörök mötmöriba ölöwakŋamgöra kapaŋ kölbapukmö, alaurupŋan ölöwakŋegöra kapaŋ köli dop kölma.

²⁵Sömbup i me wai maketnöŋ aka qeköm nene mire bohonŋi memegöra alakzei, mi mönö uruyahöt mosöta nemakŋe. Sömbupköra uruŋinan tölöhobapukö qesiqesiŋi kun mönö kude akŋe. Qahö!

²⁶Keu miaŋgö könaŋi mi Buŋa Kimbinöŋ kewö ohoget ahöza, “Gölme aka yuai pakpak miaŋgöreŋ ahözawi, mi Kembugö buŋaya akza.”

²⁷Kun Kraist qahö möt narizawaŋön eŋgoholiga yaŋgöreŋ anbingö möta anda tatketka nene i me wai jeŋine al eŋgimei, mi mönö uruyahöt mosöta neme. Nenegöra uruŋinan tölöhobapukö qesiqesiŋi mi mönö kude akŋe. Qahö!