1 KINANƆ 20:13-24

¹³Annabi ke sù à Isarailanↄ kína Ahabu lè à pìnɛ: Dikiri pì, n zĩ̀kari dasinↄ è gwe yá? Áni ń nannɛ n ↄĩ gbãra, ĩnigↄ̃ dↄ̃ kũ akãamɛ Dikiri ũ.

¹⁴Akũ Ahabu a là à pì: Dí mɛ́ ani abire kɛɛ? À wèa à pì: Dikiri pì, n bùsu gu gbɛ̃ zↄ̃kↄ̃nↄ kɛfɛnna zĩ̀karinↄ mɛ́ oni kɛ. Akũ Ahabu a là dↄ: Dí mɛ́ ani na zĩ̀ia káakuu? À wèa à pì: Mↄkↄ̃mmɛ!

¹⁵Akũ Ahabu gu gbɛ̃ zↄ̃kↄ̃nↄ kɛfɛnna zĩ̀karii pìnↄ kàkara gbɛ̃nↄn wàa do kũ baraakuri awɛɛplao. Akũ à a zĩ̀karinↄ kàkara ń pínki, ò kɛ̀ gbɛ̃nↄn dúbu suppla.

¹⁶Ò fùtɛ wɛ̃tɛn ifãntɛ̃ kà mìdangura, gↄrↄ kũ í tɛn Bɛnadada kũ a kína dake pìnↄ dɛ ń bizakutanↄ gũn.

¹⁷Akũ gu gbɛ̃ zↄ̃kↄ̃nↄ kɛfɛnna zĩ̀karii pìnↄ bↄ̀tɛ káaku. Akũ Bɛnadada zĩ̀rinↄ gɛ̀ɛ ò ònɛ, gbɛ̃nↄ tɛn bo Samaria.

¹⁸Akũ Bɛnadada pì: Tó aafian òtɛn sun yoo ke kũ zĩ̀io, à ń kũkũ bɛ̃nɛ.

¹⁹Kũ gu gbɛ̃ zↄ̃kↄ̃nↄ kɛfɛnna pìnↄ bò wɛ̃tɛn, zĩ̀karinↄn tɛ́ ń kpɛ́,

²⁰akũ ń baadi a ibɛrɛɛ dɛ̀. Kũ Sirianↄ lɛ̀kↄ̃a, akũ Isarailanↄ pɛ̀ḿma, akũ Siria kína Bɛnadada kũ a sↄ̃de kenↄ bàa sì ò ń kɛ̃ sↄ̃ musu.

²¹Akũ Isarailanↄ kína bò à gɛ̀ɛ à sↄ̃denↄ kũ sↄ̃godenↄ dɛ̀dɛ à Sirianↄ ásaru kɛ̀ manamana.

²²Annabi pìi ɛ̀ra à sù à Isarailanↄ kína lè à pì: Ǹ n zĩ̀karinↄ kara ǹgↄ̃ kú soru gũn, zaakũ tó Sɛ̃̀tãgↄrↄ kà, Siria kína ni ɛra à su lɛ́tɛmma dↄ.

²³Akũ Siria kína ìbanↄ pìnɛ: Isaraila tãnanↄ bi sĩ̀sĩ tãnanↄmɛ. Abire yãin ń gbãna deóla. Tó ótɛn zĩ̀ ká kũńwo gusaran, ó gbãna nigↄ̃ deńla.

²⁴Ǹ n kína dakenↄ lilin kɛ, ń don'arɛde pãndenↄ ditɛditɛ ń gbɛ̀n.