1Scotolic ti buchꞌu xchꞌunojic ti jaꞌ Cristo ti Jesuse, jaꞌ snichꞌon ti Diose. Cꞌalal cꞌux ta xaꞌi ti Totile, jaꞌ jech xtoc cꞌux ta xaꞌibe snichꞌnab ti Totil taje.
2Cꞌalal cꞌux ta xcaꞌitic ti Diose, cꞌalal ta jpastic ti cꞌusi ta scꞌane, jech ta jnaꞌtic ti cꞌux ta xcaꞌibetic snichꞌnabtac ti Diose.
3Ti jech cꞌux ta xcaꞌitic ti Diose, jech ta jchꞌuntic ti smantale. Jaꞌ jech xtoc ti smantaltaque mu vocoluc ta chꞌunel.
4Yuꞌun scotol ti buchꞌutic snichꞌnabtac ti Diose ta stsalic ti sba banomile. Ti jech stsal cuꞌuntic ti sba banomile, jaꞌ ta sventa ti ta jchꞌuntic ti Jesucristoe.
5Ti buchꞌu ta stsal ti sba banomile, jaꞌ noꞌox ti buchꞌu ta xchꞌun ti jaꞌ Snichꞌon Dios ti Jesuse.
6Ivinaj ti jaꞌ Snichꞌon Dios ti Jesús ti itale cꞌalal laj yichꞌ voꞌe, cꞌalal imal ti schꞌichꞌele. Pero maꞌuc noꞌox ti cꞌalal laj yichꞌ voꞌe, cꞌalal imal schꞌichꞌel xtoque. Ti jaꞌ Snichꞌon Dios ti Jesuse, jaꞌ yajrextigo stuc ti Chꞌul Espíritu ti jaꞌ melele.
7Yuꞌun ti oxib rextigo taje, oyic ta vinajel, jaꞌ ti Dios Totile, ti Chꞌul Nichꞌonile, ti Chꞌul Espíritue. Ti oxib taje, junic.
8Jaꞌ jech xtoc oy oxib rextigo liꞌ ta sba banomiile, jaꞌ ti Chꞌul Espíritue, ti voꞌe, ti schꞌichꞌele. Ti oxib taje, jun ti scꞌopique.
9Ti voꞌotique ta xquichꞌtic ta mucꞌ scꞌop ti viniquetique. Pero ti cꞌusi ta xal ti Diose, jaꞌ jelavem scꞌoplal. Yuꞌun jaꞌ scꞌop stuc ti Diose ti ta xalbotic ti jaꞌ Snichꞌon ti Jesuse.
10Ti buchꞌu ti xchꞌun ti Snichꞌon ti Diose, oy ta yoꞌnton ti jech iꞌacꞌbat snaꞌ yuꞌun ti Diose. Yan ti buchꞌu mu xchꞌun ti jech laj yal ti Diose, ta sbis ta jutcꞌop. Jaꞌ ti mu xchꞌun ti jaꞌ stuc ti Dios ta svaꞌan sba ta rextigo yuꞌun ti Snichꞌone.
11Ti scꞌoplal taje, jaꞌ ti laj xa yacꞌbotic jcuxlejaltic sbatel osile. Ti jcuxlejaltic taje, oy ta stojol ti Snichꞌone.
12Ti buchꞌu oy ta stojol ti Snichꞌon ti Diose, oy scuxlejal sbatel osil. Yan ti buchꞌu muꞌyuc oy ta stojol ti Snichꞌon ti Diose, muꞌyuc ti scuxlejal sbatel osile.
13Jech ta jtsꞌibaboxuc talel ti jcarta liꞌe ti voꞌoxuc ti achꞌunojic ti Snichꞌon ti Diose, yoꞌ jech xanaꞌic ti oy acuxlejalic sbatel osile.
14Jpatoj coꞌntontic ta stojol ti Diose, yuꞌun ta jnaꞌtic ti cꞌalal oy cꞌusi ta jcꞌantic jech chac cꞌu chaꞌal ta scꞌan ti stuque, ta xaꞌi ti jcꞌoptique.
15Ti jech jnaꞌtic ti ta xaꞌi jcꞌoptic ti Diose, jaꞌ jech umbi, jnaꞌtic ti laj xa jtatic ti cꞌusi laj jcꞌanbetique.
16Ti mi ta xavilic jun avermanoic ti ta saꞌ ti smul ti maꞌuc sventa chꞌayele, cꞌoponbeic Dios ta stojol, yoꞌ jech ta xꞌacꞌbat scuxlejal yuꞌun ti Diose, ti mi maꞌuc jun mulil ti chꞌayel ta xbat yuꞌune. Oy mulil ti ta xꞌacꞌvan ta chꞌayele. Taje, mu ta xcalboxuc avaꞌiic ti ta xacꞌoponbeic Dios ta stojole.
17Scotol ti cꞌusi chopole jaꞌ mulil onoꞌox. Pero oy mulil ti mu ta xꞌacꞌvan ta chꞌayele.
18Jnaꞌtic ti buchꞌu stotinoj ti Diose mu ta saꞌolan ti smule. Yuꞌun chabibil yuꞌun ti Snichꞌon Diose. Jaꞌ jech xtoc mu xpicat yuꞌun ti pucuje.
19Jnaꞌtic ti yuꞌunotic ti Diose. Jaꞌ jech xtoc jnaꞌtic ti scotol ti cristianoetique pasbilic ta mantal yuꞌun ti pucuje.
20Jnaꞌtic lec ti ital ti Snichꞌon Dios liꞌ ta sba banomile. Jaꞌ jech xtoc tal sjam ti jba jsatique, yoꞌ jech ta xcojtiquintic ti cuxul Diose. Cuxulotic ta stojol ti Buchꞌu melel onoꞌoxe, jaꞌ ti Nichꞌonil Jesucristoe. Taje, jaꞌ ti cuxul Diose, ti jaꞌ jcuxlejaltic sbatel osile.
21Jnichꞌnabtac, mu me cꞌusi yan xarioxinic. Jechuc.
