1 JOHAN 5

1

2

3

4

5

¹Zisu cawh Khri a cang tatei a zingpaw maikaw cawh Khazing taitah a pipaw a cang he, Paw a dopaw maikaw taco a sawtei sahlo zong khah aa do he.

²Ma heh Khazing sawtei sahlo kaa do he tah kaa hninahpaw cawh a cang. Khazing do he peh katei, a biapeh kaa zuipaw heh.

³Ma heh Khazing do cawh a cang: A biapeh nge heh. A biapeh cawh kaa cawtah hmingrih cang be,

⁴zecawtamaw tatah Khazing taitah a pipaw maikaw taco khazaw heh aa te khy. Kaa zingnah cawh khazaw cung letah tenah a hnuipaw a cang.

⁵Ahomaw khazaw cawh a te khy? Zisu cawh Khazing Sawcapaw a cang tatei a zingpaw longlong tahei aa te khy.

⁶Tui le thisai khatei a vongpaw cawh Zisu Khri heh a cang. Ama cawh tui longtei khatah a vong be, tui le thisai khatah a vong hri. Taico, ma a dawkhuipaw cawh Thlawpaw heh a cang; zecawtamaw tatah Thlawpaw cawh biahmuisui a cang cawtah.

⁷Ma a dawkhuipaw heh sangthung a cang he:

⁸Thlawpaw, tui le thisai tahpaw cang he ka, aa sangthung hei aa bia a rua.

⁹Cawngsaw a dawkhuinah cawh kaa pawng, canghrasala Khazing a dawkhuinah cawh a lai vy, zecawtamaw tatah ma heh Khazing tei a Sawcapaw kong letah a reipaw a dawkhuinah cawh a cang.

¹⁰Khazing Sawcapaw a zingpaw taco a lung chung letah ma a dawkhuinah bia heh a hnui, a zing lypaw taco Khazing cawh a hingsah, zecawtamaw tatah Khazing tei a Sawcapaw kong letah a reipaw a dawkhuinah bia cawh a zing lynah cawtah a cang.

¹¹Mataico, ma heh a dawkhuinah bia cawh a cang: Khazing tah kaaning cawh chaizaw hringnah ma pei thah ka, ma hringnah cawh a Sawcapaw chung letah a ung tahpaw heh.

¹²Khazing Sawcapaw a hnuipaw taco hringnah khah a hnui; Khazing Sawcapaw a hnui lypaw taco hringnah khah hnui be.

¹³Naaning Khazing Sawcapaw ming a zingpaw sahlo khatei ma hming sahlo kong ka ciapaw heh chaizaw hringnah naa hnui thah tah naa hni khy nápawtah a cang hi.

¹⁴Ma heh Khazing kaa pange ngangnah cawh a cang: A dunah hratah hming sangkheh kheh kaa hae caco, a ma thui a.

¹⁵Taico a ma thui a tah kaa hni caco Ama letei kaa haepaw maikaw khah kaa hnui thah tah kaa hni.

¹⁶Pakheh kheh tah a uny tei thihnah tai a phah khui lypaw suanah a tuapaw khah a hmuh caco, thlawchang seh la, Khazing tah hringnah a pae a. Aa suanah tei thihnah a phah khui lypaw sahlo cawtah ka reihnangpaw a cang. Thihnah a phahkhuipaw suanah a ung. Ma kong lehei thlaw naa chang a, ka tah dupaw cang be.

¹⁷Hmingchahly tuapaw vytei heh sua cang ka, canghrasala thihnah tai a phah khui lypaw suanah a ung.

¹⁸Khazing sawtei cawh sua canei leimei thlang be tah kaa hni; Khazing Sawcapaw takhei a bingsah ka, mehchaw lypaw Setan takhei hanah pei khy be.

¹⁹Kaaning cawh Khazing sawtei ka cang he peh tah le khazaw pungpaluh cawh mehchaw lypaw Setan a nawhnuinah rai letah a ung tah cawh kaa hni.

²⁰Khazing Sawcapaw cawh a vong ka, ahmuisuipaw Khazing kha kaa hni khy ná pawtah hnithainah a ma peh tah cawh kaa hni. Kaaning cawh ahmuisuipaw Khazing le a Sawcapaw Zisu Khri chung letah kaa ung. Ama cawh Khazing hmuisui le chaizaw hringnah a cang.

²¹Dopaw sawtei sahlo, nono behnah taikhei naaning teitah a vai my lo.