1KaduꞋe, gaveyao hivetumagana higayo, “Yesu au Keliso Yaubada yana Tovegida amanadi,” medema Yaubada natuneyao. Ada gaveyao nuwanuwadi Tamada, medema kadu nuwanuwana natuneyao.
2GavaiyaꞋamine kahalamaneni Yaubada natuneyao agaidiya yada nuwanuwa kaseuseni? Me Tamada Yaubada againe yada nuwanuwa kaseusena ada yana vehimeya kaꞋitaꞋitaveꞋavina.
3KaꞋi velemoꞋena Yaubada againe yada nuwanuwa kasena, au yana vehimeya kaꞋitaꞋitaveꞋavina. Ada yana vehimeya keke vitana, au ihayana.
4Ada au adafaiweya kanaꞋitaꞋitaveꞋavina, faꞋina gaveyao Yaubada natuneyao, medema adifaiweya babi ana nuwanuwa hinafifaiwalahegehegedi. Ada gavaiyaꞋamine babi ana nuwanuwa kanafaiwalahegehegedi? Me yada vetumagana againe adafaiweya wai kananagona be babi ana nuwanuwa ginayewa.
5E, hakwaꞋadi anafaiweya babi ana nuwanuwa ginafaiwalahegehegedi? Bana givetuvetumagana amanadi hida Yesu au Yaubada Natuna, au bana anakaibe anafaiweya wai ginanagona be babi ana nuwanuwa ginayewa.
6Ada Bana Yesu Keliso ma babiya gihobuꞋela, ada giꞋela yana waꞋiyaꞋiyaya luhei, higa gufa againe gibafitaiso kadu dayagina gimadu. Gufa againe gibafitaiso tu keke mededemagaga, au kadu dayagina gimadu, higa yana iyaꞋiyaya luhei, gufa dayaga.
7Ada Yesu yana ela au hidede amine ma AluꞋaluwa Mahalina giꞋalakakilina, ada Bana yana hawavemogatala keke fwaya, au velemoꞋena.
8E, gaitoma tohiye Bana Yesu Keliso faꞋine hihawahawavemogatala, saꞋeyana ma AluꞋaluwa Mahalina, anavelu gufa, kadu anaveto dayaga. Ada hida tohawavemogatala tohiye yadi gahe leleleya, higa Yesu au Yaubada Natuna.
9Tomiyababi yadi awatalatalaina kavetumaganena ada medema gaitoma lakahina, tu Yaubada yana awatalatalaina gaitoma lakahi-moꞋena, faꞋina yana awatalatalaina kanavetumagane-moꞋena. Ada au Bana Yaubada gavaimi gihawavemogatala? Me Natuna faꞋine gihawavemogatala.
10Gava kaliva Yaubada Natuna givetuvetumaganena, medema Yaubada yana hawavemogatala Natuna faꞋine bana aseꞋasene gidadauda. Tu gava kaliva Yaubada yana gahe Natuna faꞋine keke gidavetumaganeni, medema vaita gidagayo, “Yaubada tofwaya,” faꞋina Yaubada yana hawavemogatala Natuna faꞋine keke gidavetumaganeni.
11Ada hawavemogatalai-nadi hidede amine. Yaubada yawai-vagahida giveleda ada mena yawai-vagata Natuna againe giveꞋinuba.
12Gaveyao nuwahinagemiya Yaubada Natuna Tauna gimimiyami, medema yawai-vagahimi ahe wanuhagana, tu gaveyao nuwahinagemiya Yaubada Natuna Tauna keke gidamiyami, medema yawai-vagahimi keke wadanuhagani.
13Tu omi Yaubada Natuna ana eganeya wavetuvetumagana amanadi yami leta au hidede amine gaꞋetoladina be wanahalamanena yawai-vagahimi ahe wanuhagana.
14KaꞋi Yaubada yana nuwanuwa amine kanaveꞋoꞋola, au gavadi gavadi faꞋina kanaveꞋoꞋola, medema ginavenogaleda. Ada hidedemi ginavenogaleda faꞋina, ide Yaubada matane adafaiweya kanaꞋasevatu.
15E, tova moyaꞋaina yada veꞋoꞋola givenovenogalena. Ada givenogaleda velemoꞋena ma kahalamanena faꞋina, kadu yada veꞋoꞋola guwana ahe kanuhagana ma kahalamanena.
16Tu kaꞋi tamo hakwadi tobohiyana tovetumagana agaimiya koyona saꞋeyana gifaisewana-ma ginaꞋitana, ada dewai-nadi faꞋina keke alika-vagata ginanuhagani, kaꞋi yana koyona hidede amine ginaꞋitana digo, gilubodana be Yaubada againe tobohiyana faꞋine gidaveꞋoꞋola be yawaina ivaguna ginavelena. Au tamo gava koyona fatana keke alika-vagata ma faꞋine hidede amine gagahe. Tu tamo koyona saꞋeyana ma kaꞋi kaliva ginakiveꞋavi-vagahina be ginanunauwena tu fatana alika-vagata ginanuhagana, au keke vaita ganagahe medema koyonai-nadi faꞋina Yaubada againe wanaveꞋoꞋola.
17Huluva koyona tulina tulina ana egana au koyona, tu tamo koyona saꞋeyanaga faꞋina alika-vagata kananuhagana.
18Ada ide kahalamanena keke tamo hakwadi Yaubada natuneyao agaidiya koyona gidafifaisewani be gidanunauweni lauva tunugina, faꞋina Yaubada Natuna gilulugolegolena be bana kaliva koyona Setani keke anafaiweya ginakivekoyoni.
19Kadu kahalamanena ide Yaubada natuneyao, ada tomiyababi moyaꞋaidi Yaubada keke hidahalamaneni-ma kaliva koyona Setani nimane himimiyami.
20Kadu kahalamanena Yaubada Natuna ahe gihobuꞋela, ada halamana giveleda be higa Yaubada Bana anakaibe velemoꞋena ma kanahalamanena. Ada ide Yaubada Bana velemoꞋena amanadi buye kaveꞋatutamoꞋaida, higa Natuna Yesu Keliso buye kaveꞋatutamoꞋaida. BanaꞋe au Yaubada velemoꞋena ada BanaꞋe yawai-vagahida inubana.
21Natukweyao, wanaꞋitaveꞋavimi be toveꞋalololo yadi nuwanuwa fwayafwayana keke Yaubada yana abaga aseꞋasemiya hinalemani.
