Text copied!
CopyCompare
Kâte Bible - Johane I

Johane I 5

Help us?
Click on verse(s) to share them!
1Ŋic moczi Jesu e Kristo muhuc mana ʒakieocmu, e Anuturaonec fuakicne muzo. Eme moc e mamac bâbâfua maŋjauŋ ecneocmuzi ɋâricfâcne mâmâc ejareocmu.
2Nâŋâc Anuture naru motecfâc maŋjauŋ ejareeŋgopeneŋ me mâcne, ine Anutu maŋjauŋ ecnehuc sâcmutâc dâŋticne reŋkepene izi mufuaocmu.
3Anutu maŋjauŋ mâc mi ecnezo, sâcmutâc dâŋticne reŋkehuc hâcne maŋjauŋ ecnezo. Anuture sâcmutâc dâŋ i dâŋ ŋemâcne aricne.
4Anuturaonec fuakicne sasawa jaŋe mâreŋkonec wiac qamaseeŋgopieŋ, â mâreŋkonec wiac qame wahaekac tâpiri i ʒâŋene mamanasiŋ‐nâŋec.
5Moczi sanaŋhec erâ mâreŋkonec wiac sasawa qamaseocmu? Ŋic moc e, Jesu e Anuture Ŋokâ, iŋuc muhuc mana ʒakieocmu eki hâcne iŋuc eocmu.
6Jesu Kristo eki hâcne opâhec â sochec fisiwec, opâhec sawa mâcne, opâhec â sochec mâmâc.
7Mârozi ine fuŋne mufuaekac, Mâro e dâŋ fâri qizecnere rune hâcne.
8Irec jahec â moc jaŋe dodopec gie baeŋgopieŋ: Mâro â opâ â soc. Eme jaŋe jahec â moczi fuŋne‐jeŋic mocjaha.
9Ŋiczi dâŋ dodopec ehuc mupie manapene jâmbomac eekac, â Anutuzi dâŋ moc dopeckeme ine fâri rarau jâmbâŋ eekac. Anuture dodopec dâŋ ine Ŋokâ‐ticnere dâŋ dopeckewec i hâcne.
10Moc e Anutu Ŋokâ‐ticne manasiŋkeocmu, e Anuture dâŋ fârine maŋkeocmu. Moc e Anuture dâŋ mi mana ʒakieocmu, i Anutu burecŋic mucnekac eocmu. Ŋic iŋucnezi Anutu e Ŋokâ‐ticnere dâŋ dopeckewec i maname fâri tâmiric ekac hâcne.
11Â dâŋ dopeckewec ine ʒiŋuc fuakac: Anutu e juju sanaŋ bâfua‐nârewec, â juju sanaŋ irec jâcne ine Ŋokâ‐ticne.
12Moc e Ŋokâ rauckeocmu e juju rauckeocmu, moc e Ŋokâ mi rauckeocmu e juju wâc mi rauckeocmu.
13No dâŋ i ŋoŋe kecʒiŋuc mananiŋte qâreŋke‐ŋarekopac: Anutu Ŋokâ‐ticne manasiŋkeeŋgopieŋ ŋoŋe juju sanaŋ foŋarekac.
14Nâŋâc ʒiŋuc muhuc Anutu bubiaŋ manacneeŋgopeneŋ: Wiac mocte, e jahac maname fokac irec sâcko râehuc numucnepene mana‐nâreocmu.
15Ine hâcne, wiac i me i numucnepene mana‐nâreocmu, i manahuc ʒiŋuc wâc mananaŋmu: Wiac numucnekicne i biac rauckeŋgopeneŋ.
16Ŋic moc e âgo‐ticnezi sâqocne bame honeocmu, sâqocne hârâcte niŋgiŋ sanaŋ‐ticnehec i mâcne, ine honerâ ere erâ numume Anutuzi juju hatao râeocmu, ine sâqocne hârâcte niŋgiŋ sanaŋ‐ticnehec mi baniŋmu jaŋe iŋuc ejareocmu. Sâqocne hârâcte niŋgiŋ sanaŋ‐ticnehec i fokac wâc. Iŋucnere nunumu gie baocte mi mukopac.
17Juju bapa hehesicne i sâqocne sasawa. Erâ sâqocne gâcne ine hârâcte niŋgiŋ sanaŋ‐ticnehec mi ekac.
18Nâŋâc ʒiŋuc manaŋgopeneŋ: Anuturaonec fuakicnezi sâqocne mi baocmu. Anuture Ŋokâzi hone maiŋ ecnehame sâqocne runezi mi bâuaocmu.

19Nâŋâc Anuturaonec fuakicne, â miti tâmiric sasawa jaŋe sâqocne rune ere rurumaŋko foŋgopieŋ, iŋuc manaŋgopeneŋ.
20Erâ ʒiŋuc wâc manaŋgopeneŋ: Anutu Ŋokâ‐ticne e waharâ maŋ mamanasu bâfua‐nârewecte jâmbomac rune mana maŋ ecneeŋgopeneŋ. Eme jâmbomac rune, Ŋokâ‐ticne Jesu Kristo, eki maŋnâpokac. Eki hâcne Anutu fârine â juju sanaŋ rune.
21Naru motecfâc‐mae, wofuŋ jawane jaŋere rucgereŋ‐ŋeŋic banʒepieŋ.