1 John 5

1

2

3

4

5

¹Arahei kara taluutunia Jesus agaia na Christ ke, gaira rana dalena God. Ma rahei kara dolovia na Mama ke, kara dolovira ghua rana lei dalena udolu.

²Mi ani ta nea na ghilalana ta dolovira rana dalena God, tana bona ta dolovia God, ma ka taonighi nina lei vetena.

³Ma ge ka dolovia God ke, mi ghita ghua ka taonighi nina lei vetena. E mua sakai vahola vanighita, ge ka taonighi nina lei vetena,

⁴na pukuna rana dalena God kara tangomana na lagavuleana na maramana eni mana lei nilabu dika. Mi ghita ta lagavulea na maramana eni nia dida na taluutuni ta Jesus.

⁵?Ahei ke laga vulea na maramana? Agaia keri vamua te taluutunia Jesus gaia na dalena God.

⁶Ighita ta ghilalaa Jesus Christ gaia Dalena God nia na vulitabu ni beti maia na ghabuna te tave tana ghaivavala. E mua beti lee vamua, mana beti mana ghabu ghua. Mana Tarunga Tabu heghena te tughunia te utuni, mana Tarunga Tabu te mua kiko.

⁷Ra tolu na totobo tara bosatatea na hava te utuni itatana Jesus Christ -

⁸na Tarunga Tabu, nina vulitabu Jesus tana beti, mana ghabuna Jesus te tave tana bona te mate. Ma tolugaira tara talamaghinia Jesus Christ gaia Dalena God.

⁹Ighita ka taluutunia nina tutughu na tinoni ke, hauva mana hava God te bosaa God te haba vule va. Ma gaia God te tughunitatea vanighita na hava te utuni te manana na Dalena.

¹⁰Arahei tara taluutunia Dalena God ke, tara ghilala aeni te utuni. Ma rahei tara mua taluutunia na hava God te tughunitatea ke, ma gaira tara bosaa God te kiko, na pukuna gaira tara mua taluutunia na hava God te bosaa nia na Dalena.

¹¹Aeni na hava God te talutatea - Gaia te vaheghita na vola kasila, mana vola keri ighita ta lavia itatana Dalena.

¹²Ahei te sakaisonikolu itatana na Dale ke, agaia te loghoa na vola kasila. Ma hei ke mua holopangotia dalena God itatana, ke mua lavia na vola kasila.

¹³Inau tu gerei na lei totobo raini lokana na gegere eni vanighau tau taluutunia tua Dalena God, ge kau ghilalaa tau lavia tua na vola kasila.

¹⁴Ighita ka loghoa na liosakai te vagha eni, ge ke vagha ka nongia siki totobo itatana God, me ke taonia na liona, agaia ke rongovighita.

¹⁵Mana pukuna ta ghilala gaia te rongovighita so tana bona ta nongia ke, ma ghilala ghua gaia ke vaheghita na lei totobo ka nongighi itatana.

¹⁶Ge kau righia siki tinoni taluutuni ke tangohahi me ke mua manana na mate kasila ke, kau kokoeliulivuti vania God, ge ke vahea na vola na tinoni keri. Hauva balu tangohahi te manana na mate kasila. Mu mua bosa ge kau kokoeliulivuti vania God vanira rana vure tara gonighi na tangohahi rakiri.

¹⁷Na lei gehegehe dika soko rana vure tara nei ke, raini na palu, mana mua palu udolu te manana na mate kasila.

¹⁸Mi ghita ta ghilalara rahei na lei dalena God kara mua tona haliua na tangohahi na pukuna Jesus Christ te barera, keri ge Satan ke mua nera ge kara tona hahi.

¹⁹Mi ghita ta ghilala ta nina vure God, hauva Satan te vunaghi pungisira rahei tana maramana eni ge kara mua taluutunia God.

²⁰Mi ghita ta ghilala ghua Dalena God te mai tua tana maramana eni, me vaheghita na manaha, ge ka ghilala utunia gaia na puku ni God sughua. Mi ghita ta sakaisonikolu itatana God te utuni, na pukuna ighita ta sakaisonikolu itatana Dalena Jesus Christ. Ma gaia vamua na puku ni God te vaheghita na vola kasila.

²¹Ghau lei dalegu tana taluutuni, kau righitaonighau ge kau bei holohabara na lei titinoni god.