1 Juan 5

1

2

3

4

5

¹Nútiꞌtëz nu rejlëꞌ Jesús naquëꞌ Cristo, nac zxiꞌnëꞌ Dios nu naꞌ, atiꞌ nútiꞌtëz nu nadxíꞌi Dios Nu buzóa lei, ral‑laꞌ gdxiꞌi caꞌ lzëꞌi nu nac zxiꞌnëꞌ Dios.

²Cni ráquibeꞌiruꞌ nadxíꞌigacruꞌ‑biꞌ zxiꞌnëꞌ Dios. Nac cni chquiꞌ nadxiꞌiruꞌ‑nëꞌ Dios len runruꞌ ca rna béꞌinëꞌ rëꞌu.

³Cni nac bëꞌ nadxiꞌiruꞌ‑nëꞌ Dios. Nac cni chquiꞌ runruꞌ ca rna béꞌinëꞌ rëꞌu, len cutu nac baníg lë naꞌ rna béꞌinëꞌ rëꞌu.

⁴Nútiꞌtëz nu nac zxiꞌnëꞌ Dios ruxícj lu le rac yödzlyú ni. Chbuxicjruꞌ lu le rac yödzlyú le réjlëꞌruꞌ‑nëꞌ Dios.

⁵¿Nuzxa naꞌ ruxícj lu le rac yödzlyú? Run cni nu rejlëꞌ naquëꞌ Jesús Zxiꞌnëꞌ Dios.

⁶Cni blëꞌë Jesucristo, bidëꞌ bdilëꞌ nis, len bulaljëꞌ xchönëꞌ, len clëgz bdilëꞌ nis, san lëzcaꞌ bulaljëꞌ xchönëꞌ. Dios Böꞌ Laꞌy naquëꞌ Nu run lnaꞌ lau queëꞌ, le nac gdutë li didzaꞌ ruꞌë Dios Böꞌ Laꞌy.

⁷Tsonn nup tun lnaꞌ lau queëꞌ Jesús niꞌ yehuaꞌ yubá, Dios Xuz, len Dios Zxiꞌn, lëꞌ caꞌ Didzaꞌ, len Dios Böꞌ Laꞌy. Yonnëꞌ ni, tuz nacquëꞌ.

⁸Lëzcaꞌ cni, tsonn le tun lnaꞌ lau queëꞌ luyú ni, Dios Böꞌ Laꞌy, len le bdilëꞌ nis Jesús, len rön niꞌ bulaljëꞌ lëꞌi yag cruz, atiꞌ yonn ni, tuz ca taꞌná.

⁹Chquiꞌ siꞌ lu naꞌruꞌ le tun lnaꞌ lau bunách, le runëꞌ lnaꞌ lau Dios nactër lsacaꞌ. Lë naꞌ benëꞌ lnaꞌ lau Dios nac le benëꞌ lnaꞌ lau queëꞌ Jesús, gnëꞌ naquëꞌ Zxiꞌnczëꞌ.

¹⁰Nu rejlëꞌ Zxiꞌnëꞌ Dios, nazíꞌ lu nëꞌi le nunëꞌ lnaꞌ lau Dios. Nu curejlëꞌ Dios, nac ca rna nu naꞌ: “Dios rziꞌ yëꞌë.” Cni nac, le cutu gyejlëꞌ le benëꞌ lnaꞌ lau Dios queëꞌ Zxiꞌnëꞌ.

¹¹Lë ni nac le benëꞌ lnaꞌ lau Dios. Gnëꞌ chbennëꞌ queëruꞌ yöl‑laꞌ naꞌbán gdu, atiꞌ Zxiꞌnëꞌ naꞌ naquëꞌ Nu nabániruꞌ cni.

¹²Nu zóalenëꞌ lei Zxiꞌnëꞌ Dios, dë yöl‑laꞌ naꞌbán gdu qui. Nu cuzóalenëꞌ lei Zxiꞌnëꞌ Dios, cutu dë yöl‑laꞌ naꞌbán gdu qui.

¹³Lbiꞌiliꞌ naꞌ réjlëꞌliꞌ‑nëꞌ Zxiꞌnëꞌ Dios, ruzujaꞌ queëliꞌ lu guich lë ni quië gnö́ziliꞌ chdë yöl‑laꞌ naꞌbán gdu queëliꞌ, len quië gac gdu ca réjlëꞌliꞌ‑nëꞌ Zxiꞌnëꞌ Dios.

¹⁴Lë ni nac le ruzxöni ládxiꞌruꞌ Lëꞌ. Chquiꞌ bi gnabruꞌ lahuëꞌ ca rëꞌnnëꞌ Lëꞌ, Lëꞌ ryönnëꞌ rëꞌu.

¹⁵Chquiꞌ nö́ziruꞌ ryönnëꞌ rëꞌu ca nac bi rnábiruꞌ Lëꞌ, nö́ziruꞌ caꞌ gdél‑liꞌczruꞌ lë naꞌ rnabruꞌ lahuëꞌ.

¹⁶Chquiꞌ nu gleꞌi böchiꞌ lzëꞌi run dul‑laꞌ cunachë́ꞌ yöl‑laꞌ gut, ral‑laꞌ gnab qui nu naꞌ lahuëꞌ Dios, atiꞌ Lëꞌ gunnëꞌ yöl‑laꞌ naꞌbán qui. Cni rniaꞌ: Ral‑laꞌ gnabliꞌ quegac nup tun dul‑laꞌ cunachë́ꞌ yöl‑laꞌ gut. Dë dul‑laꞌ nachë́ꞌ yöl‑laꞌ gut. Cutu rniaꞌ gnabliꞌ qui nu run dul‑laꞌ cni.

¹⁷Yúguꞌtë le cunác tsahuiꞌ nac dul‑laꞌ, san dë dul‑laꞌ cunachë́ꞌ yöl‑laꞌ gut.

¹⁸Nö́ziruꞌ cutu runtecz dul‑laꞌ nu nac zxiꞌnëꞌ Dios, le run chiꞌë nu naꞌ Zxiꞌnczëꞌ Dios, atiꞌ tuꞌ xöhuiꞌ cutu saquiꞌ bi gun qui.

¹⁹Nö́ziruꞌ yuꞌuruꞌ lu nëꞌë Dios, atiꞌ yuꞌugac lu naꞌ tuꞌ xöhuiꞌ yúguꞌtë bunách tuiꞌ ládxiꞌgac le dë yödzlyú ni.

²⁰Naꞌa, nö́ziruꞌ chbidëꞌ ni Zxiꞌnëꞌ Dios, len bennëꞌ queëruꞌ yöl‑laꞌ rejniꞌi, quië gúnbëꞌruꞌ Nu naꞌ nac gdutë li. Zóalenruꞌ Nu naꞌ nac gdutë li le zóalenruꞌ‑nëꞌ Jesucristo, Zxiꞌnëꞌ Dios. Nu ni nac Dios gdu, len Nu runn queëruꞌ yöl‑laꞌ naꞌbán gdu.

²¹Zxíꞌnaꞌdauꞌ, gul‑gún chiꞌi cuinliꞌ cui tsej ládxiꞌcliꞌ bdauꞌ guiöj bdauꞌ yag. Caꞌ gac.