1Jisasa baa Kataisa dokona lao masoo minao katenge endakali doko pitaka Gotenya mandipae lamo. Endakali mendeme takange mende auu kayatamo dokome baanya ikiningi doko auu kayataka.
2Naimame Gote auu kayapala baanya mana setapae dupa watao minao kalyamano dokome baanya wane dupa auu kaelyamanona lao masilyamano.
3Doko, naimame Gotenya mana setapae dupa watao minilyamano dokome Gote auu kaenge doko panasilyamano. Baanya mana setapae dupa kenda pipae daa.
4Gotenya mandipae doko pitakame isa yuu koo dake ita miningima. Naimanya masoo miningi dokomeaka isa yuu dake ita miningi.
5Apimi isa yuu dake ita miningipi? Jisasa baa Gotenya Ikiningina lao masoo minao paenge endakali dokome ita miningi.
6Jisasa Kataisa baa endaki dokopa taiyoko dokopa dolaponya-kaita epea. Endakinya ialyoo daa, endakipa taiyokopa lapotanya-kaita epea. Sipitisa dokome kiningi pii lenge dokonya baame pii dutupa lao panelyamo.
7Tepomame pii doko lao panelyamino.
8Sipitisapi, endakipi, taiyokopi tepoma dutupame pii mendai dokoaka lao panelyamino.
9Endakali dupame pii lao panelyamino doko naimame singiaka doko, Goteme pii lao paneamo doko alyasale joo silyamo. Goteme pii lao paneamo doko baanya Ikiningi dokonya lao lao panatea.
10Gotenya Ikiningi doko lao masoo miningi endakali dokonya monanya pii Goteme lao paneamo ongo palelyamo. Gote lao masoo minala naelyamo endakali dokome Gote baa sambo lenge jinya nepatapumosaka pilyamo. Doko, Goteme baanya Ikiningi dokonya lao pii lao paneamo doko endakali dokome masoo minala naenge.
11Goteme pii lao paneamo doko dapa: baame lete etete katenge naima diamo doko baanya Ikiningi doko-kisa singi.
12Gotenya Ikiningi doko-pipa pakatae katenge endakali doko lete katawaka katenge. Gotenya Ikiningi doko-pipa pakatae nakatenge endakali doko lete nakatenge.
13Gotenya Ikiningi doko lao masoo miningi endakali nyakama lete katawaka kalyamino doko masalapale lao nambame pepa dake pyao peekelyo.
14Naimame Gote tangenya masilyamoli pyoo mendita mende baa-kisa tee lao loma silyamano kandao doko, baame singi. Dopa pilyamanopa naima baanya enombasa paka nakayao katenge.
15Naimame tee lelyamano dupa pitaka baame silyamona lao masetamano kandao doko, baa-kisa tee latelyamano dupa nyepelyamanona lao masetama.
16Mendeme kandataminopa endakali yango mendeme koo mende pitamopa koo dokome baa koyasala nayapenge jia kandeno doko, embame Gote lao loma setenopa Goteme lete katenge doko baa maita. Koyasala nayapenge koo dopale pitamino endakali dupa baame lete katenge doko maita. Koo tata mende dokome endakali dupa koyasingi. Nyakamame koo dopale dokonya loma salapape lao nalelyo.
17Koo tata dupa pitaka koaka doko, koo mendapuame endakali etete koyasala naenge.
18Gotenya mandipae doko pitakame koo pyoo nakatengena lao naimame masilyamano. Gotenya Ikiningi dokome dupa setao kalyamopa akali koo dokome dupa koyasala naepenge.
19Naima Gotenya kalyamanona akali koo dokome isa yuu dakenya endakali dupa pitaka isoo kalyamona lao masilyamano.
20Naimame Gote angi doko masalapale lao Gotenya Ikiningi doko ipupala naima masingi diamo doko masilyamano. Naima Gote angi dokopa baanya Ikiningi Jisasa Kataisa dokopa dolapo-pipa pakatae kalyamano dokoaka Gote angi lete etete katasingi doko.
21Wane paluma, nyakamame sambo gote dupa minatamina nyakama tange kandao isoo kalyepape.
