1 HANUA PAVAPAVADIA 15:21-29

²¹Baasa e kamonai, bena Rama ihaginina e hadokoa, ela, Tirisa ai e nohova.

²²Bena King Asa ese Iuda taudia iboudiai e haḡaukaradia vaitani, ta se hanohoa kava; bena idia ese Rama nadidia bona audia e huadia, Baasa ese vada e hagini ḡaudia; bena unu ḡau amo King Asa ese Geba, Beniamina tanona ai, bona Mispa, e haginidia.

²³Asa ena kara oredia, ena siahu idoinai bona e kara karadia iboudiai, bona e hadai hanuadia, sivaraidia na Iuda Pavapavadia Sisigadia Bukana ai vada e hetore, ani? A burukana ai ia ese hisihisi ta e davaria aena ai.

²⁴Bena Asa na tubu tama dekediai e mahuta; senena David ena hanua ai e guria. Ia gabuna ai ia natuna Iehosafat e lohia.

²⁵Asa, Iuda pavapavana, ena lohia laḡanina iharuana ai, Nadab Ieroboam ese Israel e lohiaia matama. Laḡani rua ia ese Israel e lohiaia.

²⁶Iehova vairanai e kara havara, tamana ena dala ai e raka, bona ena kara dika ai Israel e hakaraia dika danu.

²⁷Baasa Ahia, Isakara iduhuna tauna, ese e revaia. Bena Baasa ese e alaia mase, Gibeton ai: una na Filistia taudia edia hanua ta. Badina be Nadab bona Israel taudia iboudiai ese Gibeton vada e koua ahu.

²⁸Taunabunai, Asa, Iuda pavapavana, ena lohia laḡanina ihatoina ai, Baasa ese Nadab e alaia mase; bena gabuna ai e lohia.

²⁹Pavapava dagina e abia, bena maoromaoro ia ese Ieroboam ena iduhu taudia iboudiai e aladia mase; Ieroboam ena iduhu tauna ta maurina ai se rakatania, ela bona una iduhu e habuaia tari, Iehova ena hereva, ena hesiai tauna Ahia tau Silono uduna amo e gwauraia, heḡereḡerena.