Ŋicwofuŋ I 15:21-29

²¹Eme Basa e biŋe i manarâ Rama hae bahuc juwec i beherâ Tiriza haeo ra juwec.

²²Ehame ŋicwofuŋ Asa e ŋic moc mi hetiric‐jopahuc dâŋ musaweme Juda mâreŋ sâcke‐fârewec. Eme jaŋe Basazi Rama hae bahuc qânâ â katapa rome fewec i ropie rawec. Rame ŋicwofuŋ Asa e wiac izi Benjamiŋ mâreŋko Geba hae â Mizipa hae bawec.

²³Eme Asazi wiac sasawa ebac ewec â tâpiri‐ticnere fuŋne, erâ hae barawec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. Juku Asa e ŋicqizec jâmbâŋ ehame kike jahecne demba qawec.

²⁴Eme Asa e apa ŋosafâcne jaŋerao ʒuhuckehuc hâmome jaŋe fombiŋkoa apa‐ticne Dawidire hae qizecko duckembiŋ. Ehame ŋokâ‐ticne Josafatazi tucticne qarâ ŋicwofuŋ juwec.

²⁵Asa e Juda ŋicwofuŋ jume jara jajahec eha Jeroboamte ŋokâ Nadabazi fuŋkerâ Israe ŋic qaŋeŋ‐jopahuc ŋicwofuŋ juwec. Ehuc jara jajahec Israe ŋicguru ŋicwofuŋ ejarewec.

²⁶Erâ mamac‐ticnezi Israe ŋic ejareme hehesic bâfuambiŋ hata i bâjâpehuc Wofuŋte ʒâŋe faio wiac mamakâcne ewec.

²⁷Nadaba â Israe ŋic jaŋe Filisa ŋic jaŋere hae moc ʒâŋene Gibetoŋ i somâckehuc fohapie Isasa kikefuŋkonec Ahiare ŋokâ Basazi râsi rocnehuc fisirâ qâhâmowec.

²⁸Asa e Juda ŋicwofuŋ jume jara jahec â moc eha Basazi Nadaba qâhâmorâ ere okacne ŋicwofuŋ ewec.

²⁹E ŋicwofuŋ ehuc izia Wofuŋzi kiŋaŋŋic‐ticne Silo haeonec Ahiarao dâŋ muwec irec sâcko Jeroboamte kikefuŋ sasawa jopa‐fârewec. E wiac jujune moc mi akic‐jopahuc ʒeŋgoma jopa miziewec hâcne.