1 Hadì 7:18-26

¹⁸ne zuen midruwing duen he zezuwa he linya te prutas he pumigranata.

¹⁹Is kegkeveeli zuen te menge in-ulu te menge tukud diyà te varkun henduen be te menge vulak he liryu, ne heenem he ǥiek is ketikang dan.

²⁰Is kada id-ulu zuen te zezuwa he tukud mibpeliǥuyan te zezuwa he linya te midruwing he prutas he pumigranata. Heini he zayandayan diyà te divavew he vahin duen te id-ulu, avey zuen te mid-iring te kedina.

²¹Impehitindeg ni Huram is menge tukud te varkun duen te valey te Nengazen. Is tukud he zapit te divavà ne migngezanan din te Jakin, ne is tukud dapit te zizaya ne migngezanan din te Boaz.

²²Is kegkeveeli te menge in-ulu te menge tukud ne henduen be te menge vulak he liryu. Ne nepasad is kebeeli zuen te menge tukud.

²³Ne mibaal zaan si Huram te zekelà he teleǥuey te wahig he henduen te kawà, he migngezanan te Daǥat. Is kezalem kayi, pitu wey tengà he ǥiek, is keluaǥan din, 15 he ǥiek, ne is sukud te peliǥuy kayi, 45 he ǥiek.

²⁴Diyà te malù egkezizalem te vèbà kayi mibpeliǥuyan te zezuwa he linya te menge zayandayan. Heini he menge zayandayan, henduen be te edlangkat he menge pinemula, ne heenem dutun is diyà te teleǥuey. Ne haazà, inredsà is kebpurma zuen te kebeeli zutun te teleǥuey.

²⁵Haazà is teleǥuey in-untud diyà te peka te 12 he tudu he menge vaka he brunsi he ebpein-iniyuǥà. Is tetelu ziyà medsinaru te zizaya, is tetelu ziyà te edsenlepan, is tetelu ziyà te zivavà, is tetelu ziyà te edsilaan.

²⁶Is kekepal zutun te teleǥuey tetelu he vaney, is bèbà kayi iring te vèbà te tasa he netik-ew mevekar iring te mibekar en he vulak te liryu. Ne egketeǥuan heini te 11,000 he gelun he wahig.