1 Hadì 2:19-31

¹⁹Umbe, midhendiyà si Batsheba te ki Hadì Solomon te kegkaǥi ziyà te kandin te hangyù ni Adonia. Kegkaahaa kandin ni Solomon, midhitindeg si Solomon puun te pinuuwè din te kedhadì te kedsinuǥung kandin, ne midluhuzan din is iney zin te kedtahud kandin. Ne hein nepasad midlikù mebpinuu ziyà te pinuuwè din te kedhadì. Mibpekuwa sikandin te vangkù ne impesavuk din diyà te zapit te egkekewanan din ne zutun din ipepinuu is iney zin.

²⁰Migkaǥi si Batsheba te, “Duen deisey he edhengyuen ku ziyà te kenikew. Ne ke egkehimu kenà a kenikew verawa.” Migkaǥi sikan is hadì, “Hengkey heeyan, Inà? Kenè ku sikew eberawen.”

²¹Migkaǥi si Batsheba te, “Ipeesawa nu te suled nu he si Adonia si Abishag he tig-Shunem.”

²²Migkaǥi si Hadì Solomon te, “Maan is edhengyuen nu he ipeesawa si Abishag ki Adonia? Kela ke edhengyuen nu zaan he iveǥey ku ziyà te kandin is ginhedian ku, su kakey ku sikandin ne edlavan kandin si Abiatar he memumuhat wey si Joab he anak ni Zeruya!”

²³Ne midsesapà si Hadì Solomon pinaaǥi te ngazan te Nengazen, he ke sikandin te, “Berakat he siluti a te Megbevayà emun kenà egkepatey si Adonia tenged kayi te hangyù din.

²⁴Is Nengazen iyan mibpilì wey midhimu kedì he ilis te amey ku he hadì he si David. Midtuman din is penaad din he ibeǥey zin kayi te kedì is ginhedian wey ziyà te menge kevuwazan ku. Umbe idsesapè ku ziyà te uuyag he Nengazen he ibpehimetayan ku si Adonia guntaan dà he andew.”

²⁵Ne midsuǥù ni Hadì Solomon si Benaya, he anak ni Jehoyada, te kedhimatey ki Adonia, ne midhimetayan din si Adonia.

²⁶Ne migkeǥiyan ni Hadì Solomon si Abiatar he memumuhat te, “Ulì ka ziyà te pemuleey nu ziyà te Anatot. Ereg ka pezem he edhimetayan, piru kenè ku sikew edhimetayan guntaan su iyan ka midseriǥan duen te Kavan te Nengazen he MEGBEVAYÀ hein duma ke pa te amey ku he si David, wey mid-ambit ka te menge kemereǥenan din.”

²⁷Ne in-awà ni Solomon si Abiatar ziyà te ketengdanan din he kegkememumuhat te Nengazen. Ne netuman sikan is migkaǥi te Nengazen diyà te Shilo vahin te pemilya ni Eli.

²⁸Si Joab wazà medtavang ki Absalom para mehimu he hadì si Absalom, piru midtavang sikandin ki Adonia. Umbe hein nezineg din is kedhimetayi ki Adonia, mibpelaǥuy sikandin pehendiyà te tulda te Nengazen ne migawed sikandin duen te menge sungeysungey te menge suyuk duen te pemuhatà.

²⁹Ne hein nezineg ni Hadì Solomon he mibpelaǥuy si Joab pehendiyà te tulda te Nengazen wey mid-uvey zuen te pemuhatà, midsuǥù din si Benaya te kedhimatey ki Joab.

³⁰Umbe, midhendutun te tulda te Nengazen si Benaya, ne migkeǥiyan din si Joab te, “Gawas ka keniyan su ibpeǥawas ka zuen te hadì!” Piru midtavak si Joab te, “Kayi e zà ebpatey su kenà a egawas!” Midlikù si Benaya zuen te hadì su midtudtul zin is tavak ni Joab,

³¹ne migkeǥiyan ni Solomon si Benaya te, “Beeli nu is migkaǥi zin. Himetayi nu sikandin dutun te tulda ne ileveng, su para siak wey is pemilya te amey ku kenà mekepenavak te kedhimetayi zin ki Abner he anak ni Ner, he peremandar te menge sundaru te Israel, wey ki Amasa he anak ni Jeter, he peremandar te menge sundaru te Juda. Midhimetayan din heini is wazà mekesalà he menge etew he wazà metueni te amey ku. Metazeng pa wey meupiya pa sikandan kandin. Ne ǥuntaan ebelesan sikandin te Nengazen dutun te mibeelan din diyà te kandan.