1 Lengte 2:19-31

¹⁹Hiti chun Bethsheba chu Leng Solomon kom ah Adonijah thilthum chu galhut peh dingin achetan ahi. Lengpa chu anu toh kimutodingin ahung ding doh tan; anukom achu agah kun in jana apenahi. Ama atouna a atoukit chun anutouna ding chu ahin gonpeh diuvinthu apen ajet lang’a chun a tousahtan ahi.

²⁰Bethsheba in Solomon jah a, “Thumnom thilneo khat ka neijinnei it peh lou ding ka kinem’e” ati. Hichun Solomon in, “Ipiham Henu seijin ka-itpeh lou ding na het Chula-em,” ati.

²¹“Achutile nasopipa Adonijahdingin Shunem nungah nu khu petan,” ati.

²²“Adonijah ding’a iti dana Abishag chu na thum jeng theiham? Hiche sang a chu, lenggamjeng jong hi nathum jeng leh itiham? Ama khu ka’u ahi jong nahein, chuleh Thempu pa Abiather leh Zeruiah chapa Joab jong ama langapang ahi na hei,” ati.

²³Chuin Solomon Lengpa chu Pakai min in aki hahsel in “Adonijahin hiche athil thum hi athipi louleh Pathen in kei chung ah akhut lamhen lang ei that jeng hen” ati.

²⁴Pakaiyin kapa David Laltouna aei tousah a ei suhdet peh a, akitepnabang’a ei inchen sah a, hiche Pakaichu hing jing jeng ahibang in, tuninikho tah a hi Adonijah thi tei teiding ahi,” atin ahi.

²⁵Hiti chun Solomon Lengpan Jehoiada chapa Beniah chu athatdin thu apen ahile aman jong Adonijah chu that tai.

²⁶Hijouchun Lengpan Abiather Thempu komma chun, “Anathothmun’a na in ah ki nungle tan, nanghi athi ding’a lom tah chu na hitai, ahinla tutu hin nathat jeng pong’e, ajeh chu nang in kapa David dingin Pakai Pathen thingkong chu naputpeh in chuleh ahahsat na jouse nanathoh khompi in ahi,” ati.

²⁷Hiti chun Solomon in Abiatherchu Pakai Thempu panmun a konina haisah in, hiti chun Pakai jin Shiloh a Eli chilhahte chung chang Pakai thu phondoh chu a lolhin sahin ahi.

²⁸Joab hin Absalom doubolna achu ana pan louvang in Adonijahdoubolna joh chu ana pan pin ahi. Hitia hi Adonijah thi thu hi ajahphat in Pakai ponbuh munthengamaicham saki teni chu aga tuhtantan ahi.

²⁹Hichehi Solomon Lengpa koma ahetsah phat un aman Jehoiadachapa Beniah chu athat din asol tan ahi.

³⁰Beniah chu Pakai ponbuhmunthenga chun a chen Joab koma chun “Hiche munna kon chunhungdoh in Leng thupeh ahi” atinahileh Joab in “Hungdoh pong’ehikom ah thiden tang’e” ati. Hichun Beniah chu ahung kilen Joab thuseichu Lengpa kom ah asei peh tanahileh,

³¹“Ama seibang chun boltan” ati. Lengpan “Maicham munna chunhin thatdoh inlang hin vuitan,” ati. “Hichun Joab in ajeh beija thisanasona ho chu kei leh kapa insung ahthepmo na hin sutheng tan te,” ati.