1Kí Sulemanu yè bori pãnde nↄgbɛ̃nↄzi pari. Fili'auna nɛ́nↄgbɛ̃ baasi, ben à Mↄabunↄ kↄ̃n Amↄninↄ kↄ̃n Ɛdↄmunↄ kↄ̃n Sidↄ̃deenↄ kↄ̃n Itinↄ sɛ̀sɛ nↄↄnↄ ũ.
2Dii bè Isarailinↄnɛ aↄ̃ton borii pìnↄ sɛ́ro, zaakɛ aↄ̃é ń sãsãmɛ, lɛ aↄ̃ↄ tɛ́ ń tãanↄzi. Baa kↄ̃n beeeo aↄ̃ yenzi Sulemanu swɛ̃̀ blè.
3À kínɛnↄ sɛ̀sɛ nↄↄnↄ ũ gↄ̃ↄn wàa aagↄ̃ kpɛ́ basↄↄro, bensↄ̃ à nↄ yìgisainↄ vĩ dↄ wàa do kpɛ́ basↄↄro. Ben à nↄↄ pìnↄ à sã̀sã.
4Kɛ̀ zikũ e gɛ̃ɛn, à nↄↄnↄ tò à tɛ̀ tãanↄzi, èe a swɛ̃̀ kpá Dii a Ludaa mámmam lán a de Dauda bàro.
5À tɛ̀ Sidↄ̃deenↄ tãa Asatorɛzi kↄ̃n Amↄninↄ tãa Mↄlɛki kɛ̀ Luda zàn-o.
6À yã kɛ̀ Dii yeziroo kɛ̀, èe tɛ́zi kↄ̃n nↄ̀sɛo do lán a de Dauda bàro.
7Ben à gàa à tãagbãgbãkii bò sĩ̀sĩ kɛ̀ kú Yerusalɛmu ↄfãntɛ̃bↄɛ kpaa musu Mↄabunↄ tãa gina Kɛmↄsinɛ kↄ̃n Amↄninↄ tãa gina Mↄlɛkio.
8Lɛn à kɛ̀ lɛ a bori pãnde nↄↄnↄnɛ ń píngi, ben aↄ̃ tuaetiti kpàta ń tãanↄnɛ aↄ̃ saa òḿma.
9Ben Dii Isarailinↄ Luda pↄ fɛ̃̀ Sulemanuzi, kɛ̀ à kpɛɛ lìnɛ à swɛ̃̀ kúa dↄro yãnzi, zaakɛ Dii bↄ̀ à mↄ̀zi yã gɛ̃̀n plaa.
10Baa kɛ̀ Dii bènɛ, àton tɛ́ tãanↄziro, èe yã kɛ̀ Dii dìɛ pì maro.
11Ben Dii bènɛ: Zaakɛ ń kɛ̀ lɛ, nɛ́ɛ zɛ kↄ̃n ma bà kuunanyo yã kɛ̀ má dìɛnnɛɛoro, mɛ́ kpata bↄ n ↄzĩ mà n zↄ̀bleri ke ká n gɛ̃ɛ ũ.
12Mↄde n de Dauda yãnzi mɛ́ kɛ lɛ n gurↄↄaro, n nɛ́n mɛ́ kɛnɛ.
13Baa kↄ̃n beeeo mɛ́ kpata bↄ à ↄzĩ mámmanlo. Bori lɛo doon mɛ́ tó n nɛ́ pìnɛ ma zↄ̀bleri Dauda kↄ̃n Yerusalɛmu kɛ̀ má sɛ̀ ma pↄ́ ũuo yãnzi.
14Ben Dii tò Ɛdↄmu gbɛ̃ Adada kɛ̀ dɛ wɛ̃ɛnɛ ũ íbɛtɛ kpà kↄ̃n Sulemanuo.
15Gurↄↄ kɛ̀ Dauda e zĩ̀ kaa kↄ̃n Ɛdↄmunↄ yã, à zĩ̀kpɛɛnↄ dↄn'aɛdee Yoabu gàa à Isarailinↄ gɛ̀nↄ vĩ̀i, ben à Ɛdↄmunↄ bùsu gↄ̃gbɛ̃nↄ dɛ̀dɛ gwe ń píngi.
16Àpi kↄ̃n a gbɛ̃nↄↄ kú gwe ai mↄ swɛɛdo ai aↄ̃ gàa wà Ɛdↄmunↄ bùsu gↄ̃gbɛ̃ pìnↄ dɛ̀dɛo ń píngi.
17Kɛ̀ Adada bàa sì, èe taa Igipiti kↄ̃n a de ìba kenↄ. Gurↄ beeea sↄ̃ Adada nɛ́ gↄ̃kparɛmɛ.
18Aↄ̃ bↄ̀ Midiã aↄ̃ gàa Parani, ben aↄ̃ Paranide kenↄ sɛ̀ wà gàańyo Igipiti kí Fili'auna kiia. Fili'auna kpɛ́ kpàa kↄ̃n pↄ́bleeo kↄ̃n tↄↄtɛo.
19Adada yã kà Fili'aunanɛ maamaa, ben à a naↄ̃ Tapɛnɛsi dãaro kpàa nↄↄ ũ.
20Ben Tapɛnɛsi dãaro pì nɛ́ ì gↄ̃gbɛ̃ ũ, wè benɛ Genuba, ben Tapɛnɛsi nɛ́ pì gwà Fili'auna ua kↄ̃n Fili'auna nɛ́nↄo lɛdo.
21Gurↄↄ kɛ̀ Adada kú Igipiti, à mà kɛ̀ Dauda gà bensↄ̃ à zĩ̀kpɛɛnↄ dↄn'aɛde Yoabu gà dↄ. Ben à bè Fili'aunanɛ: Ǹ ma gba zɛ́ mà tá ma bùsun.
22Ben Fili'auna à là à bè: Bↄ́ bé èe kɛ̃sãamma ma kiia, kɛ̀ tò ń yezi ǹ tá n bùsun? À wèàla à bè: Pↄ́kee e kɛ̃sãamaro, ǹ ma gba zɛ́ dé!
23Ben Ludaa tò dↄ Ɛliada nɛ́ Rɛzↄ̃ kɛ̀ bàa sì a dii Zoba kí Adadɛzanɛ yãa fɛ̀ɛ Sulemanuzi.
24Kɛ̀ Dauda Adadɛza gbɛ̃nↄ dɛ̀dɛ, ben Rɛzↄ̃ gbɛ̃nↄ kàkↄ̃aazi aↄ̃ kɛ̀ gbãamↄnnɛrinↄ gãli ũ, ben à gↄ̃̀ ń dↄn'aɛdee ũ. Aↄ̃ gàa wà vɛ̃̀ɛ Damasiku, ben à gwee sì.
25Rɛzↄ̃n Isarailinↄ ibɛɛ ũ ai Sulemanu wɛ̃̀ndi lɛ́n, yãkete kɛ̀ Adada fɛ̀ɛo baasi. À kpata blè Siria bùsun, à gì Isarailinↄ kãzi.
26Nɛbati nɛ́ Yeroboamu nɛ́ Sulemanu ìba kemɛ. Ɛflaimu boriimɛ, kɛ̀ bↄ̀ Zɛrɛda, ben à bↄ̀ Sulemanu kpɛɛ. À da nɛ́ gyaanↄↄmɛ, à tↄ́n Zɛrua.
27Lán à kɛ̀ nà à bↄ̀ kína kpɛɛn yɛ̀. Sulemanu wɛ̀ɛ kɛ̀ wè be Milo tàta bùsuo, ben à a de Dauda wɛ́tɛ bĩi bò à pɛ̀kↄ̃rɛ.
28Yeroboamu nɛ́ nɛ́gↄ̃gbɛ̃ làakarideemɛ. Kɛ̀ Sulemanu è kɛ̀ ↄ̀wazi pì aĩa vĩ, ben à à dìɛ zĩ gbãaa kɛ̀ Yusufu boriinↄↄ e kɛɛ pì gbɛ̃nsi ũ.
29Gurↄↄ beeean Yeroboamu bↄ̀ Yerusalɛmu, ben à dàkↄ̃rɛ kↄ̃n annabi Ahia, Silo gbɛ̃o zɛ́n, à uta dufu dana. Aↄ̃ↄ kú sɛ̃̀n gwe ń plaa.
30Ben Ahia a uta dufu pì gà à kɛ̃̀ à pàrapara lɛo kuri awɛɛplaa.
31Ben à bè Yeroboamunɛ à à parana pì sɛ́ɛ mɛ̀n kuri, zaakɛ Dii Isarailinↄ Luda bè: Mɛ́ Sulemanu bↄ kpatammɛ mà Isaraili bori lɛo kuri kpámma.
32Mɛ́ bori lɛo doo tónɛ ma zↄ̀bleri Dauda kↄ̃n Yerusalɛmu kɛ̀ má sɛ̀ Isaraili bori píngi wɛ́tɛnↄ tɛ́o yãnzi.
33Mɛ́ kɛnɛ lɛ, kɛ̀ à ma zĩnna à gàa èe Sidↄ̃deenↄ tãa Asatorɛ kↄ̃n Mↄabunↄ tãa Kɛmↄsio kↄ̃n Amↄninↄ tãa Mↄlɛkio gbãgbãa yãnzi. Èe tɛ́maziro, èe yã kɛ̀ maamɛɛ kɛro, èe ma ↄdↄkii gwaro, à ma dokayãnↄ kũna lán a de Dauda bàro.
34Baa kↄ̃n beeeo mɛ́ kpata bↄ à ↄzĩ mámmanlo, zaakɛ ma gĩakɛ ma à kɛ̀ kí ũ ai a wɛ̃̀ndi lɛ́mmɛ ma zↄ̀bleri Dauda kɛ̀ má sɛ̀ yãnzi, kɛ̀ à ma yãdiɛnanↄ kũna bensↄ̃ à ma ↄdↄkii gwà.
35À nɛ́n mɛ́ kpata sí à ↄzĩ, mà Isaraili bori lɛo kurinↄ kpámma.
36Isaraili bori lɛo doon mɛ́ tó à nɛ́ pìnɛ, lɛ ma zↄ̀bleri Dauda borii gↄ̃ kí bleemɛ Yerusalɛmu gurↄ píngi, wɛ́tɛ kɛ̀ má sɛ̀ ma tↄ́ gↄ̃ kúa pì.
37Mpi sↄ̃, ma n sɛ Isarailinↄ kína ũ, lɛ ǹgↄ̃ kí blee pↄ́ kɛ̀ n pↄↄ yezia píngi.
38Tó nɛ́ɛ yã kɛ̀ má dìɛnnɛɛ kɛɛ píngi, tó ń tɛ́mazi, nɛ́ɛ yã kɛ̀ maamɛɛ kɛɛ, tó nɛ́ɛ ma ↄdↄkii gwaa bensↄ̃ ń ma yãdiɛnanↄ kũna lán ma zↄ̀bleri Dauda bà, mɛ́gↄ̃ kúnyo, mɛ́gↄ̃ n boriinↄ kaa Isaraili kpatan gurↄ píngi, lán ma Dauda boriinↄ kàn nà.
39Mɛ́ Dauda boriinↄ ɛara kpɛɛ yã kɛ̀ aↄ̃ↄ kɛ̀ pì yãnzi, mↄde èe kɛ ai gurↄ pínginlo.
40Sulemanu zɛ́ wɛ̀tɛ à Yeroboamu dɛ, ben à fɛ̀ɛ à bàa sì à tà Igipiti kí Sisaki kiia, à gↄ̃̀ gwe ai Sulemanu gàa à gào.
41Sulemanu yã kpaaanↄ kↄ̃n ↄ̃ndↄ̃yã kɛ̀ à kɛ̀nↄ píngi kú Sulemanu yãnↄ takadan.
42Sulemanu kɛ̀ Isaraili bori píngi kína ũ Yerusalɛmu wɛ̃̀ baplaamɛ.
43Kɛ̀ à gà, wà à vĩ̀i à de Dauda wɛ́tɛ, ben à nɛ́ Reoboamu vɛ̃̀ɛ à gbɛ̀n.
