ሮሜ ዓጮ'' ዓሶም 5:15-21

¹⁵ጋዓንቴ ፆኦሲኮ ኮሹሞ ዒንጊፃ ዓሢኮ ጎሞይዳፓ ባሼኬ፤ ፔቴ'' ዓሲ ጎሜ ዛላና ሚርጌ ዓሲ ሃይቄሢጉዲ ፆኦሲኮ ኮሹሞ ዒንጊፆ ማዔ፥ ፔቴ'' ዬሱስ ኪሪስቶሴ ዛሎ''ና ጴዼ ዒንጊፃ ሚርጌ ዓሶም ዑሣ ዓኣሢ ዒንጊንቴኔ።

¹⁶ዬያጉዲ ፆኦሲኮ ኮሹሞ ዒንጊፆኮ ዓኣፓ ዓሢኮ ጎሞ ዓኣፓፓ ባሼኔ፤ ፔቴ'' ዓሲ ጎሜ ዛላ ዒንጊንቴ ዎጌ ሜቶ ዒኪ ሙኬኔ፤ ሚርጌ ጎሞ ዛሎ''ና ዒንጊንቴ ፆኦሲ ኮሹሞ ዒንጊፃ ጋዓንቴ ፂሉ''ሞ ዒኪ ሙኬኔ።

¹⁷ፔቴ'' ዓሲ ዻቢንቲ ዛላና ሓይቢ ዓሲ ቢያይዳ ቢታንቶ ዴንቄኔ፤ ጋዓንቴ ዬያፓ ዬሱስ ኪሪስቶሴ ማዼሢ ባሼኬ፤ ዬይያ፦ ፔቴ'' ዬሱስ ኪሪስቶሴ ዛሎ''ና ፆኦሲኮ ሚርጌ ኮሹሞ ዒንጊፆ ዴንቂ ፂሌ'' ዓሳ ቢያ ሃይቢ ባሺ ናንጊና ናንጋንዳኔ።

¹⁸ዓካሪ፡ ፔቴ'' ዓዳኣሜ ጎማ ሜቶ ዎጌ ዓሲ ቢያይዳ ዔኪ ሙኬያ ማዔቴያ፥ ፔቴ'' ኪሪስቶሴኮ ፂሉ''ሞ ማዻ'' ሚርጌሢ ሜቶይዳፓ ኬሲ'' ናንጊ ዒንጋንዳኔ።

¹⁹ዓዳኣሜኮ ዓይሢንቱዋዖ ዓቲፆ ዛሎ''ና ሚርጌ ዓሳ ጎሜና ማዔሢጉዲ፥ ኪሪስቶሴኮ ዓይሢንቲፆ ዛሎ''ና ሚርጌ ዓሳ ፂላ''ንዳኔ።

²⁰ዎጌ ሙኪፆና ዻቢንቲ ሚርጌኔ፤ ጋዓንቴ ዻቢንታ ሚርጌሢዳፓ ፆኦሲኮ ኮሹሞ ዒንጊፃ ዑሣ ዓኣዼ ሚርጌኔ።

²¹ዬይ ያዺ ማዔሢ' ጎሜ ሃይቢ ዛላና ካኣታዼሢጉዲ ፆኦሲኮ ኮሹሞ ዒንጊፃ ኑ ጎዳሢ ዬሱስ ኪሪስቶሴ ዛሎ''ና ጴዻ ናንጊና ናንጊ ፂሉ''ሞ ዔኪ ሙኪሢና ካኣታዻንዳጉዲኬ።