ROMANOS 5:15-21

¹⁵Nu jyoꞌo Adán ni, nguxtyanu yu yabeꞌ hichu̱ꞌ na xquiꞌya chaꞌ cuxi nu nguaꞌni ycuiꞌ ca yu; xquiꞌya sca ti nu quiꞌyu biꞌ ngua cuxi chalyuu tya liꞌ, biꞌ chaꞌ quiñaꞌa̱ tsa ñati̱ ndyijii. Pana juani ni, xquiꞌya sca ti ñati̱ nu naa Jesucristo, chaca lo chaꞌ nda ycuiꞌ Ndyosi loꞌo na, sca chaꞌ tsoꞌo tsa laca biꞌ; tlyu tsa chaꞌ tsoꞌo nu nguaꞌni ycuiꞌ Ndyosi cuentya jiꞌna liꞌ. Nacui̱ Ni chaꞌ laja ti taca cuaꞌni lyaá Ni jiꞌna jiꞌi̱ lcaa chaꞌ cuxi nu ntsuꞌu jiꞌna. Loꞌo juaꞌa̱ quiñaꞌa̱ tsa ñati̱ laca nu ndyuꞌni Ni chaꞌ ndyaca lubii cresiya jiꞌi̱ nguꞌ.

¹⁶Ná stuꞌba ndyuꞌu chaꞌ jiꞌi̱ cña nu nguaꞌni jyoꞌo Adán loꞌo cña nu ndyuꞌni ycuiꞌ Ndyosi. Nu Adán biꞌ ni, sca ti chaꞌ cuxi nguaꞌni yu su clyo, loꞌo liꞌ ndyanu yabeꞌ hichu̱ꞌ yu; loꞌo juaꞌa̱ ndyanu yabeꞌ hichu̱ꞌ lcaa na loꞌo tyaꞌa na juani xquiꞌya chaꞌ cuxi biꞌ. Loꞌo juani quiñaꞌa̱ tsa chaꞌ cuxi nduꞌni na lacua. Pana Jesús ni, sca cña laja ti nguaꞌni cuentya jiꞌna nu loꞌo nguaꞌni lyaá jiꞌna jiꞌi̱ nu cuxi; nguaꞌni Ni chaꞌ caca tsoꞌo cresiya jiꞌna cuentya jiꞌi̱ ycuiꞌ Ndyosi liꞌ.

¹⁷Ntsuꞌu chaꞌ cajaa na xquiꞌya quiꞌya nu ntsuꞌu jiꞌi̱ nu sca ti Adán biꞌ, masi sca ti chaꞌ cuxi nguaꞌni yu; pana tlyu la cña ndyuꞌni ycuiꞌ Ndyosi cuentya jiꞌna juani, nu loꞌo ndyuꞌni lubii Ni cresiya jiꞌna. Quiñaꞌa̱ tsa chaꞌ xlyaꞌbe nguaꞌni Ni loꞌo na; juaꞌa̱ caja chalyuu cucui jiꞌna juani xquiꞌya Jesucristo, masi sca ti ñati̱ laca biꞌ.

¹⁸Ndiꞌya̱ ngua liꞌ: loꞌo nguaꞌni jyoꞌo Adán chaꞌ cuxi biꞌ, la cuiꞌ juaꞌa̱ ndyanu yabeꞌ hichu̱ꞌ na, loꞌo hichu̱ꞌ lcaa tyaꞌa ñati̱ na. Pana ndiꞌya̱ ndyuꞌu chaꞌ loꞌo nguaꞌni Jesucristo sca chaꞌ tsoꞌo: liꞌ laja ti nguaꞌni Ni chaꞌ cuityi̱ Ni yabeꞌ nu ntsuꞌu hichu̱ꞌ na, chaꞌ caja chalyuu nu ná ngaꞌa̱ chaꞌ tye jiꞌna.

¹⁹Tya clyo cua ntsuꞌu sca ñati̱ nu ná ndaquiyaꞌ jiꞌi̱ cña nu ngulo ycuiꞌ Ndyosi jiꞌi̱ yu, biꞌ chaꞌ ndyanu quiꞌya jiꞌi̱ lcaa na loꞌo tyaꞌa na juani. Loꞌo tiyaꞌ la liꞌ, ya̱a̱ chaca ñati̱ nu ndaquiyaꞌ jiꞌi̱ cña nu ngulo Ni jiꞌi̱; xquiꞌya nu biꞌ ndyaca tsoꞌo cresiya jiꞌi̱ lcaa na cuentya jiꞌi̱ ycuiꞌ Ndyosi juani.

²⁰Nu loꞌo cuna na ni cña laca nu nclyo ycuiꞌ Ndyosi jiꞌna, liꞌ nchca cuayáꞌ la tiꞌ na ñiꞌya̱ laca quiꞌya nu sta Ni jiꞌna. Masi ndube tsa tiꞌ na chaꞌ ntsuꞌu tsa chaꞌ cuxi jiꞌna, la cuiꞌ juaꞌa̱ jlo tiꞌ na chaꞌ ntajaꞌa̱ Ni cuaꞌni lyaá Ni jiꞌna; jlo tiꞌ na chaꞌ nchca jiꞌi̱ Ni, chaꞌ tsoꞌo tsa nduꞌni Ni loꞌo na.

²¹Nu cuxi laca loo jiꞌna, biꞌ chaꞌ ndyijii na; pana juani ntiꞌ ycuiꞌ Ndyosi caca Ni loo jiꞌna, chaꞌ tyaꞌna tsa tiꞌ Ni jiꞌna. Loꞌo caca tsoꞌo cresiya jiꞌna cuentya jiꞌi̱ Ni, liꞌ ta Ni sca chalyuu nu ná ngaꞌa̱ chaꞌ tye jiꞌna xquiꞌya Jesús nu Xuꞌna na.