1ታ ዒሾንሦ! ታ ሚሾንሦ! ቢያሢ ዒንሢ ዎጌ ዔራያታሢሮ ዎጌ ዓሲዳ ቢታንቶ ዴንቃሢ ዓሲ ሼምፖና ዓኣ ዎዶ''ማና ሌሊታሢ ዒንሢ ዔራኔ።
2ኮኦኪንሢና፦ ፔቴ'' ሎዔ ላኣሊ ዓኒና ዎላ'' ሼምፔና ናንጋ ዎዶ''ይዳ ዒዛና ዎላ'' ዎጌና ቱኡቴ''ያኬ፤ ዓኒ ዒዞኮ ሃይቄቶ ጋዓንቴ ዒዛ ቱኡቴ'' ዎጎይዳፓ ኬስኬያ ማዓኔ።
3ዬያሮ ዓኒ ዒዞኮ ሼምፔና ዓኣንቴ ሜሌ'' ዓቲንቄም ዒዛ ሎዔቴ ዓኒ ማዒባኣያና ላሄኔ ጌይንታኔ፤ ዓኒ ሃይቄቶ ጋዓንቴ ዒዛና ዎላ'' ዒዛ ቱኡቴ'' ዎጎይዳፓ ኬስኬያኬ፤ ሜሌ'' ዓሲም ዒዛ ሎዔቴ ዓኒ ማዒባኣያና ላሄኔ ጌይንታዓኬ።
4ዒሾንሢዮቴ! ዒንሢ ባካ ዬያጉዴያኬ፤ ዒንሢ ኪሪስቶሴ ዑፆኮ ዱማ ዱማ ቤዞ ማዔሢሮ ሓይቢና ዱማዾሢጉዲ ሙሴ ዎጋ''ፓ ዒንሢ ዱማዼኔ። ዬያሮ ፆኦሲ ማዾ''ም ዓኣፒ ኑ ዓኣፓንዳጉዲ ሃይቦ''ይዳፓ ዔቄ፥ ኪሪስቶሴሮ ዒንሢ ማዔኔ።
5ዎይቲ ጌዔቴ ጎሞ ማሊፆና ኑ ናንጋ ዎዶ''ና ዎጎ ዛሎ''ና ማዺንታ ፑርቶ ማሊፃ ሓይቢ ዓኣፒ ኑ ዓኣፓንዳጉዲ ኑኡኮ ዱማ ዱማ ዑፆይዳ ማዻኔ።
6ሓሢ ጋዓንቴ ቤርታ ቱኪ'' ኑና ዓኣ ዎጎይዳፓ ሓይቢና ዱማዺሢጉዲ ኑ ዱማዼያ ማዔሢሮ ዎጎ ቱኡዛፓ ኑ ኬስኬኔ። ዬያሮ ሃካፓ ሴካ ኑኡኒ ማዻሢ ዓኪ ማዔ ዓያኖ ዓይሢፆጉዲኬ፤ ሚና ቤርታ ፃኣፒንቴ ጪንቄ ዎጋ'' ዓይሣሢ ጎይፆቱዋሴ።
7ዓካሪ ኑ ዎዚ ጎዖንዶይ? ዎጌ ፔ ቶኦኪና ጎሜኬ ጌይሢዳ? ፔቴ''ታዖ ያዺቱዋሴ! ጋዓንቴ ጎሜ ዓይጎ ማዔቴያ ታ ዔራንዳጉዲ ማሄሢ ዎጌኬ። ዎይቲ ጌዔቴ ዎጋ''፦ «ዓሲሮ ዛጊ ሱኡካዺፖ» ጌዒባኣያታቴ፥ «ሱኡካዺሢ» ዓይጎታቴያ ታ ዔሪንዱዋያታንቴኬ።
8ጎሜ' ሱኡኬ ቢያ ታ ሱኡካዻንዳጉዲ ማሄሢ ዎጌይዳፓ ሙኬ ዓይሢፆ ዛሎ''ናኬ፤ ዎጌባኣቶ ጋዓንቴ ጎሜ ሓይቄ ባኣዚ''ኬ።
9ዎጌ ታ ናንጎይዳ ሓጊ ቢታንቶ ዴንቂባኣንቴ ዎጎኮ ዓይሢፆ ታ ዔራዛ ጎሜ ሼምፖ ዴንቄኔ፤
10ታኣኒ ሓይቄኔ፤ ናንጊና ናንጊ ዒንጋንዳጉዲ ዒንጊንቴ ዎጎኮ ዓይሢፃ ታኣም ሓይቢ ዔኪ ሙኬኔ።
11ዎይቲ ጌዔቴ ዎጌኮ ዓይሢፆ ዛሎ''ና ጎሜ ካራ ዴንቂ ታና ጌሺ ዓይሥሢና ዎዼኔ።
12ዬያሮ ዎጌ ፆኦሲም ዱማዼያኬ፤ ዓይሥሢያ ዱማዼያ፥ ጌኤሺ ሓሣ ኮሺኬ።
13ሂዳዖ ዬይ ኮዦ ባካ ታኣም ሃይቢ ዔኪ ሙኬኔ ጌይሢዳ? ያዺቱዋሴ! ሓይቢ ታኣም ዔኪ ሙኬ ባካ ጎሜኬ። ጎሜ ዓይጎታቴያ ዔርታንዳጉዲ ኮሺ ማዔ ባኬሎ ካራ ማሂ ዬይ ሃይቢ ታኣም ዔኪ ሙኬኔ። ዬያሮ ጎሞኮ ፑርቱማ ዔርታሢ ዎጌኮ ዓይሢፆ ዛሎ''ናኬ።
14ዓካሪ ዎጌ ዓያና ባኣዚ'' ማዔሢ ኑ ዔራኔ፤ ታኣኒ ጋዓንቴ ጎሜኮ ካራሚ ማዓኒ ሻንቺንቴያ፥ ጎሜ ማሊሢ ታና ዎይሣያኬ።
15ታኣኒ ማዻ ባኮ ታ ዔሩዋሴ፤ ዓይጎሮ ጌዔቴ ናሽካ ባኮ ታ ሓሺ''፥ ታ ዒፃ ባኮ ማዻኔ፤
16ዓካሪ፤ ታኣኒ ማዻሢ ታ ኮዑዋ ባኣዚ'' ማዔቴ ዎጌ ኮሺ ማዔሢ ታ ማርካዻኔ።
17ታ ማዻኒ ኮይሱዋ ባኮ ማዻሢ ታ ጊዶይዳ ዓኣ ጎሞ ማዓንዳኣፓዓቴም ታናቱዋሴ።
18ታ ጊዶይዳ ሓሣ ታኣኮ ጎሞ ማሊፆይዳ ዓይጌያ ኮሺ ባኣዚ'' ባኣሢ ታ ዔራኔ፤ ዓይጎሮ ጌዔቴ ዓይጎ ኮሺ ባኣዚ'' ታ ማዻኒ ማላቶዋ ዬኖ ኮዦ ማዼ''ሎ ታ ማዻኒ ዳንዳዑዋኣሢሮኬ።
19ማዻኒ ታኣም ኮይሳ ኮዦ ማዾ'' ታ ማዹዋሴ፤ ጋዓንቴ ታ ኮዑዋ ፑርታ ማዾ ታ ማዻኔ።
20ዓካሪ ማዻኒ ታኣም ኮይሱዋ ፑርቶ ማዾ'' ማዻያ ታ ማዔቴ ዬያ ማዻሢ ታ ጊዶይዳ ዓኣ ጎሞ ማዓንዳኣፓዓቴም ታናቱዋሴ ጌይሢኬ።
21ዬያሮ ፔቴ'' ዎጌ ማዺ ማዺ ዓኣሢ ታ ዛጋኔ፤ ዎይቲ ጌዔቴ ታ ኮሺ ባኣዚ'' ማዻኒ ኮዓ ዎዶ''ና ፑርታ ባኣዚ'' ሌሊ ማዺንታኔ።
22ታኣኮ ጋሮ ዒና'' ጋዓንቴ ፆኦሲ ዎጎና ዎዛዻኔ።
23ማዔቴያ ታኣኮ ማሊፆ ዎጎና ዎላ'' ካኣሞ ዒፂ፥ ታኣኮ ዱማ ዱማ ዑፆይዳ ማዻ ጎሞ ዎጎና ዲዒንቴያ ታና ማሃ ሜሌ'' ዎጌ ታ ጋራ ዓኣሢ ታ ዛጋኔ።
24ዬያሮ ታ ዎዚጉዴ ላኣፓ ዓሲዳይ! ሓያ ታና ሓይቢም ዔኪ ዴንዳ ዓሽኮይዳፓ ዖ ታና ዓውሳንዳይ?
25ፆኦሲም ጋላታ! ዬሱስ ኪሪስቶሴ ዛሎ''ና ዬያ ዒ ማዼሢሮ። ዓካሪ ታኣኒ ማሊፆና ፆኦሲ ዎጌም ዎርቃያ ማዓዛ፥ ጎሞ ማሊፆና ጋዓንቴ ጎሜ ዎጌም ዎርቃያ ታ ማዓኔ።
