رْ مَ 5:15-21

¹⁵كْنْ عَلَ وٌن كِشِ نَشَن نَ، نَ نُن بٍنبَ عَدَ مَ شَ يُنُبِ كٍرٍن مُ عَ رَ. عِيٌ، عَدَ مَدِ فبٍفبٍ قَشَشِ يِ مِشِ كٍرٍن شَ يُنُبِ نَن سَابُي رَ، كْنْ عَلَ شَ هِننّ دَنفِ نَ رَ كِ قَنيِ، بَرِ مَ عَ عَدَ مَدِيٍ كِشِ عَ شَ مِشِ سُفَندِشِ عِسَ نَشَن نَ، نَ بَرَ مِشِ فبٍفبٍ رَكِسِ عَ شَ هِننّ سَابُي رَ.

¹⁶عَدَ مَ شَ يُنُبِ نُن عَلَ عَدَ مَدِيٍ كِشِ نَشَن نَ، عٍ قْشِ تَفِ عِكُيَ. مِشِ كٍرٍن شَ يُنُبِ تٌ مَكِيتِ، فبَلٌي نَن قَ. كْنْ عَلَ عَدَ مَدِيٍ كِشِ نَشَن نَ، عَ قَ مِشِ فبٍفبٍ شَ يُنُبِ رَبَ شَنبِ نّ، عَ قَ قّيرّ رَ مِشِ مَتِنشِنمَ كِ نَشّ عَلَ يَ عِ.

¹⁷مِشِ كٍرٍن شَ يُنُبِ رَبَ نَشَ عَ نِيَ قَشّ شَ نْ دُنِحَ رَ، كْنْ عَلَ شَ مِشِ سُفَندِشِ عِسَ وَلِ قْشِ دَنفِ نَ رَ ثٌن! عَدَ مَدِيٍ نَشٍيٍ بَرَ عَلَ شَ هِننّ سْتْ نَشَن دَندٍ مُ نَ، عَ نُن عَ شَ تِنشِنيِ عَ وٌن كِشِ نَشَن نَ، نٍيٍ نْي سْتْمَ كِسِ كُي مِشِ كٍرٍن نَن سَابُي رَ، نَشَن قِندِ عَلَ شَ مِشِ سُفَندِشِ عِسَ رَ.

¹⁸نَ كُي، مِشِ كٍرٍن شَ يُنُبِ نَشَ عَ نِيَ عَدَ مَدِيٍ بِرِن شَ لُ يُنُبِ شَ فبَلٌي بُن مَ، كْنْ مِشِ كٍرٍن شَ وَلِ تِنشِنشِ نَن مَن تِنشِنيِ نُن كِسِ قِمَ عَدَ مَدِيٍ بِرِن مَ.

¹⁹عَلْ مِشِ كٍرٍن تٌ عَلَ شَ يَامَرِ مَتَندِ، عَدَ مَدِ بِرِن نَشَ قِندِ يُنُبِتْييٍ رَ نَ مِشِ كٍرٍنيِ سَابُي رَ، عَدَ مَدِ فبٍفبٍ مَن قِندِ مَ تِنشِنتْييٍ رَ عَلَ يَ عِ مِشِ كٍرٍن نَن قَن سَابُي رَ عَ تٌ عَلَ شَ يَامَرِ رَبَتُ.

²⁰سّرِيّ قِ نّ يُنُبِ شَ فبٌ. كْنْ يُنُبِ تٌ فبٌ، عَلَ شَ هِننّ نَشَ فبٌ كِ قَنيِ دَنفِ نَ رَ!

²¹نَ كُي، يُنُبِ شَ نْي قِندِشِ قَشّ نَن نَ، كْنْ عَلَ شَ هِننّ شَ نْي قِندِ مَ تِنشِنيِ نَن نَ عَلَكٌ مِشِ شَ كِسِ عَبَدَن. نَ بِرِن نَبَمَ وٌن مَرِفِ عِسَ نَن سَابُي رَ، عَلَ شَ مِشِ سُفَندِشِ.