ROMANOS 5:15-21

¹⁵Ta scoj ti ista smul li jun vinic Adane, jaꞌ yuꞌun jpasmulilutic xa jcotoltic, jaꞌ yuꞌun albil onoꞌox ti chijchꞌayutic o sbatel osile. Pero ta sventa ti oy slequil yoꞌon li Dios ta jtojoltique, ta jmotontic noꞌox ti muꞌyuc jmultic chijyilutic ta sventa li jun vinic Jesucristoe. Yuꞌun jaꞌ iyacꞌ sba ta milel ta jcojtic, jech chijcuxiutic o sbatel osil ta sventa.

¹⁶Manchuc mi jpꞌel xa noꞌox ti mantale ti muc bu schꞌun ta sliqueb li jun vinic Adane, pero albil onoꞌox ti ta xquichꞌtic vocol jcotoltic ta scoj li jmultic eꞌuque. Pero li avie, acꞌo mi ep li jmultique, pero jcotoltic xuꞌ muꞌyuc jmultic chijyilutic Dios ta sventa li Jesucristoe, yuꞌun istoj xa scotol.

¹⁷Ta scoj ti ista smul li Adane, jaꞌ yuꞌun lijꞌoch ta mulil jcotoltic. Albil onoꞌox ti jcotoltic chijchꞌayutic o sbatel osile. Pero ta sventa li Jesucristoe ijpastic ta canal scotol, jech chba jchiꞌintic o sbatel osil li Diose. Yuꞌun jchꞌunojtic ti oy ep slequil yoꞌon ta jtojoltique, jech ta jmotontic noꞌox ti muꞌyuc xa jmultic chijyilutique.

¹⁸Ta scoj ti ista smul li Adane, albil onoꞌox ti scotol crixchanoetic ta xichꞌic vocol ta scoj li smulique. Ta sventa ti icham ta jcojtic li buchꞌu muꞌyuc smule, jaꞌ li Cristoe, li buchꞌutic ta schꞌunic ti jaꞌ Yajcoltavanejic li Cristoe, muꞌyuc smulic ta xꞌileic yuꞌun Dios. Ta xcuxiic o sbatel osil.

¹⁹Ta scoj ti muc bu schꞌun li Adán li cꞌusi iꞌalbat yuꞌun li Diose, jaꞌ yuꞌun jpasmulilutic jcotoltic ti crixchanoutique. Ta sventa ti ischꞌun li Jesucristo li cꞌusi iꞌalbat yuꞌun li Diose, li buchꞌutic ta schꞌunic ti jaꞌ Yajcoltavanejique, maꞌuc xa jpasmuliletic ta xꞌileic yuꞌun Dios.

²⁰Lijyalbutic mantaletic li Diose ti jaꞌ acꞌo quiltic o ti ep jmultique. Pero acꞌo mi ep li jmultique, la scꞌuxubinutic li Diose yuꞌun ep slequil yoꞌon ta jtojoltic.

²¹Jech chac cꞌu chaꞌal oyutic toꞌox ta mulile jech albil onoꞌox ti chijchꞌayutic o sbatel osile, jaꞌ noꞌox jech eꞌuc, oyutic xa ta scꞌob li Diose yuꞌun lec yoꞌon ta jtojoltic, jech chacꞌ jcuxlejaltic sbatel osil. Ti jech oyutic xa ta scꞌob li Diose, yuꞌun muꞌyuc xa jmultic chijyilutic li Dios ta sventa li Cajvaltic Jesucristoe.