1मिनु लेंशा शुश मुर देल्शा बाक्शो बाक्मा बाक्त। मेकोपुकी नु मारेइ जचा थोव़क मबाक्माक्त। मिनु येसुमी आ शेंसीब आन कली ब्रेश्शा
2“एको आन कली शिशी पातामी। मारदे हना साबेर नाक्त रे मुल सम्म गो नु काथा बाक्शा, मारेइ जचा मतामे। मर्कूस ६:३४-४४
3जचा मगेथु आन खिं खिं सोइक्ताक्ङमी हना, लांमी गाक्ना गाक्न थाइनीम। का निक्शी शुश ङोन रे जाक्शो बाक्नीम” देंमाक्त।
4मिनु शेंसीबपुकीमी “ओदेंशो गोरशो रागीमी इश ङा मुर आन कली शोब्ले गेशा, दोपा रूपाइक्चा ङा?” देंमा बाक्त।
5मिनु येसुमी “शोब्ले दोशो कुरनी?” दे हिल्लो पवानु “७ ओटा” देंमा बाक्त।
6मिनु मुर आन कली “निस्सीन” दे दिंममी निप्पपाइक्मी बाक्त। मिनु मेको ७ ओटा शोब्ले शेशा, परमप्रभु कली “गे रिम्शो पाइब बाक्नीनी” देंशा, शोब्ले जिक्शा, शेंसीब आन कली गेशा, योक्पदा बाक्त। मिनु मेकोपुकीमी मुर आन कली गेमे बाक्त।
7आइक्च ङांइ का निक्शी यो बाक्माक्त। मेको ङांइ यो शेशा “गे रिम्शो पाइब बाक्नीनी” देंशा “योक्कीन” दे गेमी बाक्त।
8मिनु मुरपुकीमी रूथ्री जामे बाक्त। जशा लीशो गुप्शा, ७ डालो प्रिंङमे बाक्त।
9जाइबपुकी ४ हजार खोइ बाक्मा बाक्त। मिनु येसुमी मुर आन कली आन खिं खिं सोइक्ता बाक्त।
10मिनु छुल छाल बोक्शा, आ शेंसीबपुकी नु डोंगा ङोइश्शा, दल्मानुथा रागी जाक्दीम्मा बाक्त।
11मिनु फरिसी जाक्शा, येसु आ थुं थाम्चा कली “सरीङ ङा चिन्ड का कोंइदीकी” देंमा बाक्त। यूहन्ना ६:३०
12मिनु येसुमी लाइश्शो सोक्त कीशा “सिनाक्त मुलाक्त ङा मुरपुकीमी मारदे चिन्ड कोव़चा माल्नीमी? नोफा दाइश्शा नेनीन, चिन्ड का यो मकोंइनन्नी” देंमाक्त।
13मिनु मेको आन कली प्रोंइशा, डोंगा ङोइश्शा, समुन्द्र शोक्शा, आइक्ची हांबु जाक्दीम्मा बाक्त।
14शेंसीबपुकीमी शोब्ले लाइक्चा प्रेंशो बाक्मा बाक्त। डोंगाम शोब्ले का ला लीशो बाक्माक्त।
15मिनु येसुमी आ शेंसीब आन कली “नेनीने, फरिसीपुकी नु पिप हेरोद आन बोरपाइक्ब ओख्ती क्येङा होस पांइसीन” दे माइक्मी बाक्त। लूका १२:१; मर्कूस ३:६
16मिनु “शोब्ले कुरचा प्रेंदमे बाक्त, दे तुइश्शा, मो देंम कों?” देंमुमा बाक्त।
17मिनु येसुमी आन लोव़ तुइश्शा “शोब्ले मबा दे मारदे शुश लोव़ पाइनीनी? गे मुल यो मारेइ मरुप्नीनी? ममिम्नीनी? तुइक्चा यो ममाल्नीनी? मर्कूस ६:५२
18मिक्च पाइश्शो बाक्तीनी हना यो, मताइनीनी? नोफा पाइश्शो बाक्तीनी हना यो, मनेंनीनी? मुल यो मारेइ मिम्ने मचाप्नीनी? मत्ती ११:१३,१६
19गोम ५ ओटा शोब्ले जिक्शा योक्शा, ५ हजार मुर आन कली थुलुनु, जशा लीशो गिश डालो प्रिंदीनी?” देंमेनु “१२ डालो” देंमा बाक्त। मर्कूस ६:४१-४४
20“मिनु ७ ओटा शोब्लेमी ४ हजार मुर आन कली थुलुनु, जशा लीशो गिश डालो प्रिंदीनी?” देंमेनु “७ डालो” देंमा बाक्त। मर्कूस ८:८-९
21मिनु “मुल यो मारेइ मरुम्नी?” देंमाक्त।
22येसु नु आ शेंसीबपुकी बेथसैदा जाक्दीम्मा बाक्त। मिनु मुरपुकीमी मिक्च मताइब का चाक्शा “मेको कली थिने” दे पुन्मे बाक्त। मर्कूस ६:५६
23मिनु येसुमी मिक्च मताइब कली गुइमी ग्याइश्शा ङा मिन, कीशा गाउं रे ग्रुंइशा लदा बाक्त। मिनु आ मिक्चीम थुथु पा तोक्शा, आ गुइ आ तारी वोइश्शा “मुल मार मार तवी?” दे हिल्लो पवा बाक्त। यूहन्ना ९:६
24मिनु मेकोमी इर गे कोव़शा “मुरपुकी गाक्शो ताता, तन्न मेको मुरपुकी रवा खोदेंशो तांइसाक्म” देंमाक्त।
25मिनु लेंशा आ गुइ आ मिक्च तारी वोदा बाक्त। मिनु मेकोमी कोव़स ङा कोव़स पा तवा बाक्त।
26मिनु येसुमी “गाउं हेरशा, इ खिं लावो” दे सोइक्ता बाक्त।
27येसु नु आ शेंसीबपुकी सिजरिया फिलिप्पी गे लमा बाक्त। मिनु लांमी गाक्मानु, येसुमी “मुरपुकीमी आं पर्बम मार देंनीमी?” दे हिल्लो पवानु,
28“का निक्शीमी ‘ब्वाक्कुम ख्रुम्शा ग्रुंइब यूहन्ना बाक्माक्त’ देंनीम। का निक्शीमी ‘एलीया बाक्माक्त’ देंनीम। का निक्शीमी ‘परमप्रभु यावे आ लोव़ पाइब का बाक्माक्त’ देंनीम” दे मदमे बाक्त। मर्कूस ६:१५
29मिनु येसुमी “गेपुकी चहिं आं कली सु सुइय्यीनी?” दे हिल्लो पवानु, पत्रुसमी “गे ख्रीस्त बाक्नीनी” देंमाक्त।
30मिनु आ शेंसीब आन कली “एको ख्रीस्त बाक्ब, दे सुइ आन कली मशेंदीन” दे माइक्मी बाक्त। मर्कूस ९:९
31मिनु येसुमी आ शेंसीब आन कली “रागीम जरमेशोमी शुश श्येत जचा माल्ब। जोक्ब तुइक्ब खाल्पा , ठेयब चढ़ेब नु सास्त्रीपुकीमी मेको कली मब्राइनीम, साइक्पाइक्नीम। मिनु बेक्शो आ नित्थ नाक्ती सेंसीब” दे लोव़ मख्रुइक्थु शेंदीमी बाक्त। मर्कूस ४:३१; मर्कूस १०:३२-३४
32मिनु पत्रुसमी येसु कली एर आइक्ची लाइश्शा, हुइक्ता बाक्त।
33मिनु येसु हिरशा, अर्को शेंसीबपुकी गे कोव़शा “ए सैतान, इ कुल मकोंइदी। परमप्रभु यावे आ मिम्शो ममाइ, मुर आन देंशो नेंबाक्ते” दे पत्रुस कली हुइक्ता बाक्त।
मर्कूस 8
मर्कूस 8:1-33