Marku 8:1-33

¹Te khohnin ah hlangping te hut koep om tih caak koi ba khaw khueh uh pawh.

²Hnukbang rhoek te a khue tih, “Kai taengah hnin thum rhaeh uh coeng tih caak bakhaw a khueh uh voel pawt dongah he hlangping ham ka thinphat.

³Te dongah a im ah buhmueh rhathih la amih ka tueih koinih longpueng ah tawnba uh ni. Amih khuikah hlangvang tah khohla lamkah ha pawk uh,” a ti nah.

⁴A hnukbang rhoek loh te khaw, “He rhoek he kohong ah me lamkah buh nim hlang loh a cah thai eh he?” a ti uh.

⁵Te dongah amih te, “Vaidam meyet na khueh uh?” a ti nah hatah, “Parhih,” a ti uh.

⁶Te dongah hlangping te diklai ah ngol ham a uen. Te phoeiah vaidam parhih te a loh tih a uem tih a aeh. Te daengah hlangping taengah tael hamla a hnukbang rhoek te a paek tih a tael uh.

⁷Te phoeiah ngadik a yool a khueh uh te khaw a uem tih amih te, “He khaw tael uh,” a ti nah.

⁸A caak uh tih a hah uh phoeiah a nueipil aka coih te voh rhih la a phueih uh.

⁹Te vaengah thawngli tluk om uh.

¹⁰Amih a hlah phoeiah tah lawng khuila tlek kun tih a hnukbang rhoek neh Dalmanutha paengpang la pawk.

¹¹Te vaengah Pharisee rhoek te cet uh tih Jesuh te koe a oelh uh. Vaan lamkah miknoek te anih taengah a toem uh tih a noemcai uh.

¹²Tedae a lungbuei ah huei tih, “Balae hekah cadil loh miknoek a toem. Nangmih taengah rhep ka thui, Hekah cadil he miknoek tueng ham moenih,” a ti.

¹³Te dongah amih te a toeng phoeiah koep kun tih rhalvangan la kat.

¹⁴Te vaengah buh khuen ham a hmaai uh dongah lawng khuikah amih taengah vaidam pakhat bueng pawt atah atloe khueh uh pawh.

¹⁵Te vaengah amih te ol a paek tih, “Ngaithuen uh, Pharisee rhoek kah tolrhu neh Herod kah tolrhu te hmat uh,” a ti nah.

¹⁶Te vaengah vaidam a khueh uh pawt te amamih khuiah dawtlet uh thae.

¹⁷Tedae a ming dongah amih te, “Balae tih vaidam na khueh uh pawt te na thui uh. Na yakming uh pawt tih na hmuhming uh hlan a? Na thinko te mangkhak la vawk khueh uh ne.

¹⁸Mik aka khueh rhoek loh na hmuh uh voel pawt tih hna aka khueh rhoek loh na yaak uh pawt dongah na poek uh moenih.

¹⁹Thawngnga ham vaidam panga ka aeh vaengah a nueipil na phueih uh te voh meyet a bae?” a ti nah hatah Jesuh taengah, “Hlainit,” a ti na uh.

²⁰Thawngli ham parhih vaengah a nueipil na phueih uh te voh meyet a bae?” a ti nah hatah Jesuh taengah, “Parhih,” a ti na uh.

²¹Te phoeiah amih te, “Na hmuhming uh hlan a?,” a ti nah.

²²Bethsaida la a caeh uh vaengah mikdael te Jesuh taengla a khuen uh tih anih te taek sak ham a bih uh.

²³Te dongah mikdael kah kut te a tuuk tih kho voella a khuen tih a mik ah a timthoih. A kut te a tloeng thil phoeiah, “Khat khat khaw na hmuh mai a?” tila a dawt.

²⁴Te dongah oeloe tih, “Hlang rhoek te ka sawt dae thingkung aka cet bangla ka hmuh,” a ti nah.

²⁵Tedae a mik te a kut te koep a tloeng pah thil daengah a cil pah tih a hoeih pah tih phaeng boeih a hmuh.

²⁶Tedae anih a im la a tueih vaengah tah, “Vangca la kun boeh,” a ti nah.

²⁷Jesuh neh a hnukbang rhoek tah Kaisarea Philip kah kho la a caeh uh vaengah longpueng ah a hnukbang rhoek te a dawt tih, “Kai he hlang loh ulae a ti uh,” a ti nah.

²⁸Te dongah amah te, “Pakhat loh tuinuem Johan, pakhat loh Elijah, tedae pakhat loh tonghma rhoek khuikah pakhat khat a ti uh,” a ti na uh.

²⁹Jesuh loh amih te, “Nangmih ta kai he ulae na ti uh?” tila a dawt. Peter loh a doo tih, “Nang tah Khrih ni,” a ti nah.

³⁰Te vaengah amah kawng te thui pawt ham amih te a uen.

³¹Te phoeiah amih taengah hlang capa te muep a patang ham neh patong rhoek loh a hnawt ham khaw, khosoihham rhoek neh cadaek rhoek loh a ngawn phoeikah hnin thum ah a thoh ham khaw a kuek te koe a thuituen.

³²Te vaengah ol te sayalh la a thui dongah Peter loh Jesuh te a khue tih koe a toel.

³³Tedae Jesuh loh mael tih a hnukbang rhoek te a sawt doeah Peter te a tlung tih, “Satan, Pathen te na poek pawt tih hlang te na poek dongah ka hnuk la nong,” a ti nah.