Text copied!
CopyCompare
Gapapaiwa New Testament - Mak - Mak 8

Mak 8:1-33

Help us?
Click on verse(s) to share them!
1Mara sago koroto ghamana ivi kiidaburana ma kii vavai na ivi kovini. Tuna kubiine Yesu kana kivikivina ikwatusi ma ivonesi bo,
2“Weni wawayisi aikamyuyuwesi iyamna mara aroba yavata tamakai ma kii vavai kegha.
3Mikeda ere vitonarisi ana vonatawesi na ketiyai ina paroro, iyamna wawaya viya na dobu rabaraba ma ipisi.”
4Ma kana kivikivina ivonei bo, “Ke kovokovoghina da weni dobunai parawa taviiya da tikanisi. Wena dobu makiiwapana.”
5Ma Yesu ivi tarakiiyanesi bo, “Parawa viya gwabimiyai?” Ma kana kivikivina ivonapotei bo, “Parawa miikovimaruwa.”
6Ma Yesu nani korotona ivonesi da tanowai ita makiipikapika. Parawina iviiya ma God ivi kiikiiwei, ivogimagimai ma kana kivikivina iveresi da ivorereghi koroto kurisi.
7Ma bade iyana gisigisi viya imakamakai na Yesu iviiya da God ivi kiikiiwei. Ma kana kivikivina ivonesi da ita vorereghi.
8Wawaya ikam da ikam dodo ma muriyai kana kivikivina puwata iyuna da kode miikovimaruwa ivi tupoi.
9Ma nani korotona kamonai na tomotomowa ivi 4 tausan. Kakawasi ma natunatusi yavata ikam ikovi na Yesu ivonatawesi inae.
10Ma kana kivikivina yavata ku waka igeru ma idamana ku Darumanuta dobuna.
11Perisi damsi viya ipisi da Yesu yavata iti taghegheyana. Ma ita rubui kubiine ivonei bo, “Bera ghamana keberai kana kitai. Nakanani kanakovi da rewapana God gwabinai kuviiya bo kegha.”
12Ma Yesu yana itawei ma ivona bo, “Tami weni kimtina kokayokayowei da bera ghamana kota kitai. Ma vonavaghata avonavonemi da kubiimi na ke avi berana ana berai.”
13Ma vaghina Yesu ikuyowesi da ku waka igerume, ma ivomiiri da Gariri tokana idamadamani.
14Ma kana kivikivina nuwanuwasi iwapa da parawa ke ita kavari. Ma parawa sago kava wakiiyai imakamakai.
15Ma Yesu ivi varavarisi bo, “Kokoyagha bubunimi ma kokitaruvimi Perisi damsi i yist ma Kiivavo Herodi ina yist kubiine.”
16Ma kana kivikivina ti mani kavakava inipusi, ivona bo, “Mikeda parawa kegha, tuna kubiine nakanani ivoneta.”
17Ma Yesu iakovi da aviyavisina ivivi sisiyei na ivi tarakiiyanesi bo, “Avi kubiine parawa koinuwapoyei? Patana da akoviku ke kota viiviiya bo? Avi kubiine vonavaghata damina ke kota viiviiya? Nuwanuwami na gudugudusi, bo?
18Matami emakamakai. Avi kubiine ke kota kitakita? Ma tinimi emakamakai. Avi kubiine ke kota viviyana? Kade konotanotai bo kegha,
19da parawa miikovi avogimagimai da tomotomowa 5 tausan avi kanisi? Ma puwata kodesi viya kovi tupoi?” Ma kana kivikivina ivonapotei bo, “Kode ivi 12.”
20“Ma bade parawa miikovimaruwa avogimagimai da tomotomowa 4 tausan avi kanisi. Ma puwata kodesi viya kovi tupoi?” Ma ivonapotei bo, “Kode miikovimaruwa.”
21Ma ivonesi bo, “Ma patana da vonavaghata damina ke kota viiviiya, bo?”
22Yesu kana kivikivina yavata ku Betsaida kwanatuna inekiibau. Ma wawaya viya tomowa matapotapotana irutinapiyei Yesu kurina. Ma ivi nowi da ita votovoni da iti yawasi.
23Matapotapotana imana iviiya ma irutini da kwanatu ikiibutawei. Matana ikanui ma muriyai na imana ku tepana iterei. Ma ivi tarakiiyanei bo, “Kade aviyavisina kekitakitai?”
24Ikita tovona ma ivona bo, “Wawaya akitakitisi ma kitasi nakanani ma kii ita bababa.”
25Ma matana ivotovona meyei da itamotatagha na iyawasa da ikita bubuna.
26Ma Yesu ivona bo, “Ke kuna rui ku kwanatu. Maninina kenae da am ku numa.”
27Yesu kana kivikivina yavata ivomiiri inae ku meyagai gisigisi Sisariya Pilipai kwanatuna ririnai. Ketiyai inenae ma kana kivikivina kurisi ivi tarakiiyana bo, “Kovona. Wawaya isisiya da taku na iyai?”
28Ma ivonapotei bo, “Viya evonavona da tam na Jon Babataito. Viya evonavona da tam Elaidiya, ma bade viya evonavona da tam na God ina peroveta sago.”
29Ma ivi tarakiiyanesi bo, “Ma tami na ikikava koinuwanotanota? Taku na iyai?” Ma Pita ivonapotei bo, “Tam na God ina Vivinevine Wawayina.”
30Ma Yesu ivonatanisi da ke iti mamatara wawaya kurisi da tuna na iyai.
31Yesu ivi karei da kana kivikivina ivonavonaviakovisi bo, “Taku Wawaya Natusi ana vokwarakwara kirakai. Ma Jiu damsi i babada ma taparoro babadisi i babada ma vonaviyoyovana vibeyebeyena wawayisi ina bareku. Ini raboboku ma mara viarobina kamonai na ana vomiiri.”
32Debiiyai ivi sisiyei kurisi, ma Pita irutini ku ririna ma iyeghai da ke nakanani ini sisiya.
33Ma Yesu itavira da kana kivikivina viya ikitakitisi ma Pita iyeghai bo, “Seitan, kawam epota! Nani notana na ke God ita verem. Dobu kana akova kenotanotai.”

Read Mak 8Mak 8
Compare Mak 8:1-33Mak 8:1-33