Markus 8:1-33

¹Na tahuna iea e huriki ala kupo ri vapopo tabu. Ri uka a maki ni kani, lakea e Isu i gale e huriki a murimuri vona, i taki ria,

²“Iau a dodo e huriki nga. Ri made turagu na parava i tolu pali. I uka ma ri kani.

³Pali ngane a koi ni rudu hamule ria, ma ga ri gi vitolo, ge vurea a matane ria na dala. E huriki ranga ri valai basi hateka.”

⁴E huriki a murimuri vona ri koli ri ta maea, “Pali si gi bole vai na tabeke i ngeki koea a maki ni kani si gi vakani e huriki nga vona?”

⁵Lakea e Isu i nana ria, “I riva a bret mu tahoka?” Ri ta maea ria, “Mi tahoka a bret i polorua.”

⁶Lakea i taki e huriki ri gi made puru na malala. I bole a bret i polorua nga, i kavurikea a Vure. Muri i keve, i habi ne huriki a murimuri vona, ri gi veru tala ne huriki.

⁷A manu kiroko ranga ri tahoka. Ngi ranga i bole, i kavurikea a Vure, muri i taki e huriki a murimuri ri gi veru tala.

⁸Ri kani, ri maru. Muri ri tahoni dili na kulopi i polorua a kalavana maki ni kani, ri vonu.

⁹E huriki ri kani ri ala rangale va (4,000). Ri kani lobo muri i rupolo ria.

¹⁰Malaviriri kunana i rike na aga turana e huriki a murimuri vona, ri lakea na tabeke ne Dalmanuta.

¹¹Na tahuna ri bele o Dalmanuta, e huriki a Pariseo ri valai, ri vakatubu ni hehea e Isu. Ri tonia, ri nanea ge rata a nivakasiri ge vakasiria a nitora vona i valai na Vure.

¹²E Isu i kide tala, i ta maea, “I navai e huriki na tahuna mona ri nana ni matai a nivakasiri? A taki muholi mua, bara i uka tara nivakasiri ri gi masia.”

¹³Muri i pe ria, i rike na aga, i lakea na tabeke tara na darilomu.

¹⁴E huriki a murimuri ri longo kaburungi ni bolena bret. Ri tahoka kunana a bret i taku na aga.

¹⁵E Isu i taki tora ria, “Mu lelerau, mu matadoko vona a is ne huriki a Pariseo, a is ne Herod.”

¹⁶Lakea ri vakatubu ni vata vona a hini ri uka bret.

¹⁷E Isu i lohoka vona a maki ri vata vona, lakea i nana ria, “I navai mu vata vona a bret i uka ma mu bole? Mua, i uka ma mu matakilala iau, i uka ma mu longokilala a ngava. I navai i uvo a gine mua?

¹⁸Mua mu tahoka a matane mua, pali i uka ma mu matai. Mu tahoka a tuline mua, pali i uka ma mu longokilala. Pali mua, i uka ma mu luhoi mule a maki a rata?

¹⁹Na tahuna a keve a bret i lima, a vakani e huriki ala 5,000, i riva a kulopi mu tahoni dili vona a kalavana maki ni kani?” Ri koli ri ta maea, “A kulopi i ravulu a polona i rua.”

²⁰“Na tahuna a keve a bret i polorua a vakani e huriki ala 4,000, pali i riva a kulopi mu tahoni dili vona a kalavana maki ni kani?” Ri koli ri ta maea, “I polo rua.”

²¹Lakea e Isu i nana ria, “Pali i navai i uka ma mu matakilaka vona a maka maki a rata?”

²²Ri bele o Betsaida, lakea e huriki ranga ri tuli vilia ne Isu a bakovi i kepa, ri taki torea e Isu ge padoi ia.

²³Lakea e Isu e tuli talea na tanga a kepa. I kalupe tahoa a matana, i ru langa a limana vona, muri i nanea, “O matai a maki o i uka?”

²⁴A bakovi i mata lae, i ta maea, “A matai e huriki a bakovi, ri manga a kai ri laho lae.”

²⁵Lakea e Isu i padoi tabu a matana bakovi. Muri a matana i matapara, i matakilala lobo a maka maki.

²⁶Muri e Isu i rudua ge hamule lakea na ruma vona, i takia, “Naha ni dili na tanga.”

²⁷E Isu turana e huriki a murimuri vona ri lakea na maka tanga kiroko tabukoi na tanga dagi e Sisaria Pilipi. Na tahuna ri lalaho lokovonga, e Isu i nana ria, “E huriki ri luhoi iau ge iau e rei?”

²⁸Ri ta maea ria, “E huriki ranga ri taki ioe, ta ioe e Ioanes a mari ni vahilolo. I ranga ri taki ioe, ta ioe e Elaisa. Pali e huriki ranga tabu ri taki ioe, ta ioe a propet hosi tara.”

²⁹Lakea e Isu i nanea e Petrus, “Pali ioe, o luhoi iau ge iau e rei?” E Petrus i koli, i ta maea, “Ioe e Kristo.”

³⁰Pali e Isu i taki tora ria nahea ri gi vakalongoa tara viri.

³¹Muri e Isu i vakatubu ni vara ria na Tuna Bakovi bara i bole a nimadihi i kupo. E huriki a gare, a prister dagi, a mari na vinara bara ri marikoi vona. Muri bara ri rabalakia. Pali muri na parava i tolu, bara i pesi rike mule na matenga.

³²I vara kavakava kunana vona ra ngava iea. Pali e Petrus i tulia lakea na gaga, i vakatubu ni tahatea.

³³E Isu i ngalahere ne Petrus, i mata lakea ne huriki a murimuri vona, i tahatea e Petrus, i ta maea, “Satan, o hamule mae a bitogu! I uka ma o luhoi a maki na Vure. O luhoi kunana a maki na bakovi.”