SAN MARCOS 8:1-33

¹Ipan inon tonalten oc sepa omosentlalihque miyac tlacamen, huan ahmo oquipiyayahque tlen quicuasque. Jesús oquinnotzaloc in tetlamachticahuan huan oquiniluiloc:

²―Nimotlocoltiya ica inin tlacamen tleca yiquipiya yiyi tonali nohuan caten huan ayacmo quipiyahque tlen quicuasque.

³Tla niquintitlanis inchan maapismicticacan, sotlahuitihue ihtech in ohtli, huan sequin de yehhuan ohualahque de huehca.

⁴Huan in tetlamachticahuan otetlahtlanihque: ―¿Quen cuali tiquintlamacasque inin tlacamen nican canin ahmo tlen oncan?

⁵Jesús oquintlahtlaniloc: ―¿Quesqui pantzin nanquipiyahque? Yehhuan otenanquilihque: ―Ticpiyahque chicome.

⁶Huan oquintequiutiloc in tlacamen mamotlalican huan omoan in chicome pantzin huan omotlasohcamatiloc, huan ihcuac omocohcoton, omiyaquilic. Huan oquinmacaloc in tetlamachticahuan maquinixpantilican in tlacamen.

⁷Oquipiyayahque noyojqui sequin michtoton, huan queman omotlasohcamatiloc ica in Dios, oquintequiutiloc noyojqui maquinixpantilican.

⁸Otlacuahque huan opachiuque nochten. Huan oquipehpenque in tetlamachticahuan chicome canasta san tlen omocau cohcotonque pantzin.

⁹Inohque aquin otlacuahque cana nahue mil ocatcahque.

¹⁰Huan Jesús oquinnahuatiloc in tlacamen huan saniman otlehcoloc ihtech in barco ihuan in tetlamachticahuan huan ohuilohuac ipan in tlali Dalmanuta.

¹¹Huan sequin fariseos ohualahque teitahque in Jesús huan opeuque tehuan motlahtolchihuiyahque. Teichtacaahsisnequihque ica Yehhuatzin huan ic inon otetlahtlanihque mamochihua itlahtlen mahuestic ic quitasque tla nele tequitis ica techicahualis den Dios.

¹²Huan chicahuac oyelsihsihuihuac in Jesús huan omihto: ―Huelis ahmo. Ahmo nanquitlahtlanisquiyanihque oc se tlachiutli mahuestic. Ic nele namechiluiya, ahmo nanquitasque oc sequin.

¹³Huan oquincautehualoc, huan otlehcoloc ihtech in barco huan ohuilohuac oc se lado.

¹⁴Huan in tetlamachticahuan oquilcauque cualicasque in pantzin, huan ahmo oquipiyayahque ocachi de se pantzin ihtech in barco.

¹⁵Huan oquiniluiloc in tetlamachticahuan ica se tlalnamictilistli: ―Xicchihuacan cuenta ahmo maquiselican in pahtli tlen ic semahuis in pantzin den fariseos huan den tlacamen den Herodes. Quihtosnequi ahmo maquiselican in ahmo cuali tlanehnehuilistli de yehhuan tlen quitlaihtlacahuis inemilis ijcon quen quichihuas inon pahtli ica in pantzin.

¹⁶Huan ahmo oquinehnehuiliyayahque in tetlamachticahuan huan ic inon omononotztoyahque ic yehhuan, huan omoluihque: ―Ahmo ticpiyahque in pantzin, huan ic inon ijcon otechnonotzaloc.

¹⁷Jesús omomat quen oquichiuticatcahque cuenta ica in pantzin, huan oquintlahtlaniloc: ―Tel, ¿tleca namononotzahque ic ahmo nanquipiyahque pantzin? Tel, ¿ayamo onanquinehnehuiliyayahque tlen namechiluiya? Tel, ¿oc nanyoltepitzautoque?

¹⁸Tel, ¿ahmo nantlachiyahque ica namoixtelolo, huan ahmo nantlacaquihque ica namonacas? ¿Huan ahmo nanquilnamiquihque tlen onicchiu queman oticnejque in pantzin?

¹⁹Tel, ¿quesqui canasta onanquipehpenque in cohcotonque pantzin queman onicxehxelo in macuili pantzin ica in macuili mil tlacamen? Yehhuan otenanquilihque: ―Oticpehpenque mahtlactli huan ome canasta.

²⁰Huan oc sepa oquintlahtlaniloc: ―Tel, ¿quesqui canasta onanquipehpenque den cohcotonque pantzin queman onicxehxelo in chicome pantzin ica in nahue mil tlacamen? Huan otenanquilihque: ―Oticpehpenque chicome canasta.

²¹Ihcuac inon oquintlahtlaniloc: ―Tel, ¿tleca ahmo onanquinehnehuiliyayahque ahmo onicchiuticatca cuenta ica in pahtli tlen ic semahuis in pantzin, tlahmo onicchiuticatca cuenta ica in ahmo cuali tlanextilistli?

²²Huan oahxihuato ipan in altepetl Betsaida in Jesús inuan in tetlamachticahuan, huan otehualiquilihque se ixpatzac. Huan otetlatlautihque maquipahtilo.

²³Huan Jesús oquiquixtiloc den altepetl momatilantiu, huan omixtlalili techihchac huan omotlalili teman ipan yehhuatl. Huan oquitlahtlaniloc: ―¿Yititlachiya chihton?

²⁴Yehhuatl oahcotlachix huan otenanquilic: ―Niquinita in tlacamen quen couten nehnenticaten.

²⁵Huan oc sepa in Jesús omotlalili temahuan ipan iixtelolo den ixpatzac huan otlachix huan nochin cuali oquitac.

²⁶Jesús oquititlaniloc ichan huan oquiluiloc: ―Ahmo xicalaqui ipan in altepetl, huan ahmo aquin xiquilui.

²⁷Ohuilohuayaya in Jesús inuan in tetlamachticahuan ipan in altepemen den tlali Cesarea de Filipo. Huan ihtech in ohtli oquintlahtlanilohuaya: ―¿Tlen quihtohuahque in tlacamen ica nehhuatl?

²⁸Otenanquilihque in tetlamachticahuan: ―Sequin quihtohuahque Tehhuatzin in Juan Tlacuatequiyani. Oc sequin quihtohuahque Tehhuatzin in tlayolchicahuani Elías, huan oc sequin quihtohuahque Tehhuatzin oc se tlayolchicahuani de yihuehcau.

²⁹Oc sepa oquintlahtlaniloc Yehhuatzin. ―¿Huan namehhuan, tlen nanquihtohuahque ica nehhuatl? Otenanquilic in Pedro: ―Tehhuatzin in Cristo, Tetlapehpeniltzin Dios.

³⁰Huan oquintequiutiloc in Jesús ahmo aquin maquiluican.

³¹Opeu quinextililo quen Yehhuatzin aquin Tetiachicau ica nochin tlacatl quipiya tlen tlapanolos. Huan teixtohuetzosque in tequihuahmen huan in achtohque tiopixcamen den judeahtecos huan in tlamachtiyanimen den itlanahuatil Moisés. Huan temictisque, huan ipan yiyi tonali ihxohuas den mijcamen.

³²Inin oquinyequiluiloc. Ihcuac inon otesecninquixti in Pedro huan opeu tetlacahualtiya.

³³Huan omocuepaloc in Jesús huan oquinitaloc inon tetlamachticahuan, huan oquiahhualoc in Pedro, ic omoluic: ―¡Ximoihcuani noixpa! ¡Titlahtohua quen Satanás! Ahmo ticnehnehuiliya tetlamachilis in Dios, tlahmo san yeh den tlacatl.