لُكِ 9:2-33

²عَ نَشَ عٍ شّي مِشِيٍ كَوَندِدٍ عَلَ شَ مَنفّيَ نِينِ شَ مَسٍنيِ رَ، عٍ مَن شَ قُرٍ مَيٍ رَيَلَن.

³عَ نَشَ عَ مَسٍن عٍ بّ، «وٌ نّ بِيَاسِمَ، وٌ نَشَ سٍسٍ شَنِن وٌ شُن مَ، عَلْ شُلِ، فبْنقْي، تَامِ، كْبِرِ، شَ نَ مُ عَ رَ دٌنمَ قِرِن ندٍ.

⁴وٌ نَ سٌ بَنشِ نَشَن كُي، وٌ شَ يِفِيَ مّننِ نّ هَن وٌ سَ سِفَمَ تَا فبّتّ تّمُي نَشّ.

⁵شَ نَ تَاكَيٍ مُ وٌ رَ سّنّ، وٌ شَ كٍلِ نَا. وٌ شَ مّننِ بّندّ رَكْنكْن وٌ سَنيِيٍ رَ، عَ شَ قِندِ سٍيدٍحْشْيَ رَ عٍ بّ، وٌ بَرَ عٍ رَبٌلٌ.»

⁶نَ كُي، عِسَ قْشِرَبِرّيٍ نَشَ سِفَ، عٍ سَ تَايٍ بِرِن عِسَ. عٍ نُ مِشِيٍ كَوَندِ مَ عَلَ شَ شِبَارُ قَنيِ رَ، عٍ نُ قُرٍ مَيٍ رَيَلَن يِرٍ بِرِن.

⁷فَلِلٍ مَنفّ هٍرٌدٍ تٌ قٍ بِرِن مّ نَشٍيٍ نُ رَبَقٍ عَ شَ بْشِ مَ، عَ نَشَ عِقُ عِسَ شَ قٍ رَ، بَرِ مَ ندٍيٍ نُ عَ قَلَمَ عَ يَيَ شُنشَ نَن كٍلِشِ قَشّ مَ،

⁸ندٍيٍ عَ قَلَ عَ عَننَبِ عٍلِيَ نَن فبِلٍنشِ، ندٍيٍ عَ قَلَ عَ نَمِحْنمّ فبّتّ نَشَن نُ نَ دُنِحّ تّمُي دَنفِشِ، نَ نَن مَن كٍلِشِ.

⁹هٍرٌدٍ نَشَ عَ قَلَ، «يَيَ تَن، ﭑ بَرَ نَ شُنيِ بٌلٌن عَ دّ عِ. كْنْ ندٍ قَ يِ تَن نَ، ﭑ نَشَن شَ قٍ مّمَ يِ كِ؟» نَ كُي، عَ نَشَ سٌ كَتَقٍ عَ شَ عِسَ تٌ.

¹⁰شّيرَيٍ تٌ فبِلٍن، عٍ قٍ نَشٍيٍ رَبَشِ، عٍ نَشَ عَ بِرِن دّنتّفّ سَ عِسَ بّ. عَ قَن نَشَ عٍ شَنِن بٍتٍسَيِدَ عٍ شَ لُ عٍ شَتِ مَ يِرٍ كٍرٍن.

¹¹كْنْ حَمَ تٌ عَ كٌلٌن، عٍ نَشَ بِرَ عِسَ قْشْ رَ. عَ قَن نَشَ عٍ رَلَن، عَ وْيّن عٍ بّ عَلَ شَ مَنفّيَ نِينِ شَ قٍ رَ، عَ قُرٍ مَيٍ رَيَلَن.

¹²نُنمَرٍ تٌ سٌ قْلْ، عِسَ قْشِرَبِرّ قُ نُن قِرِنيِيٍ نَشَ عٍ مَسٌ عَ رَ، عٍ عَ قَلَ عَ بّ، «حَمَ رَيٍنسٍن عَلَكٌ عٍ شَ سَ سٌ تَايٍ نُن دَاشَيٍ نَشٍيٍ نَ بٍ رَبِلِنيِ، عٍ شَ سَ يِفِيَدٍيٍ نُن دٌنسٍيٍ قٍن، بَرِ مَ وٌن نَ وُلَ نّ يِ كِ.»

¹³عِسَ نَشَ عَ قَلَ عٍ بّ، «وٌ تَن نَن شَ دٌنسٍ قِ عٍ مَ.» عَ قْشِرَبِرّيٍ نَشَ عَ يَابِ، «سٍسٍ مُ نَ مُشُ يِ بَقٍ تَامِ سُولِ نُن يّشّ قِرِن نَ. كَ مُشُ تَن نَن شَ سِفَ دٌنسٍ سَرَدٍ يِ حَمَ بِرِن بّ؟»

¹⁴مِشِيٍ نَشٍيٍ نُ نَ نَا، شّمّيٍ كْنتِ نَشَ سِفَ هَن وُلُ سُولِ حْندْن. عِسَ نَشَ عَ قَلَ عَ قْشِرَبِرّيٍ بّ، «وٌ عَ قَلَ مِشِيٍ بّ عٍ شَ دْشْ عٍ تٌنفٌ سُولِ سُولِ مَ.»

¹⁵عٍ قَن نَشَ عَ رَبَ نَ كِ، عٍ مِشِ بِرِن نَدْشْ.

¹⁶عِسَ نَشَ نَ تَامِ سُولِ نُن نَ يّشّ قِرِن تٌنفٌ، عَ عَ يَ رَتٍ كٌورٍ مَ، عَ قَ عَلَ نُوَلِ سَ. عَ نَشَ تَامِيٍ عِفِرَ، عَ قَ عٍ سٌ عَ قْشِرَبِرّيٍ يِ رَ، عَلَكٌ عٍ شَ عٍ عِتَشُن حَمَ مَ.

¹⁷حَمَ بِرِن نَشَ عٍ دّفٍ هَن عٍ وَ سَ. دٌنسٍ دْنشْي شُنتُنيِيٍ تٌ مَتٌنفٌ، دٍبٍ قُ نُن قِرِن نَن نَقٍ.

¹⁸لْشْ ندٍ عِسَ نُ نَ عَلَ مَشَندِقٍ عَ شَتِ مَ. عَ قْشِرَبِرّيٍ قَن نُ نَ نَا. عَ نَشَ عٍ مَشْرِن، عَ نَشّ، «مِشِيٍ مُنسٍ قَلَمَ ﭑ مَ قٍ رَ؟ ندٍ لَنشِ ﭑ مَ؟»

¹⁹عٍ نَشَ عَ يَابِ، «ندٍيٍ عَ قَلَمَ، عَننَبِ يَيَ شُنشَ. ندٍيٍ عَ قَلَمَ، عَننَبِ عٍلِيَ. ندٍيٍ عَ قَلَمَ، نَمِحْنمّ فبّتّ نَشَن قَشَ وَشَتِ دَنفِشِ، نَ نَن مَن كٍلِشِ.»

²⁰عِسَ مَن نَشَ عٍ مَشْرِن، «كْنْ وٌ تَن نَشّ دِ؟ ندٍ ﭑ نَ؟» ثِيّرِ نَشَ عَ يَابِ، «عَلَ شَ مِشِ سُفَندِشِ نَن نَ عِ رَ.»

²¹عِسَ نَشَ عَ مَتِنتِن عٍ رَ، عَ عٍ يَمَرِ، عٍ نَشَ عَ شَ قٍ قَلَ مِشِ يٌ بّ.

²²عَ مَن نَشَ عَ مَسٍن عٍ بّ، «قٌ عَدَ مَ شَ دِ شَ تْورّ فبٍفبٍ سْتْ. يُوِقِيٍ شَ قٌرِيٍ، سّرّشّدُبّ كُنتِفِيٍ، نُن سّرِيّ كَرَ مْشْيٍ مُ قَمَ لَدٍ عَ رَ، عٍ عَ قَشَمَ نّ، كْنْ عَ مَن شَ كٍلِ قَشّ مَ عَ شِ سَشَن ندٍ.»

²³عِسَ نَشَ عَ مَسٍن بِرِن بّ، «شَ مِشِ وَ بِرَقٍ ﭑ قْشْ رَ، عَ شَ تٌندِ عَ يّتّ مَ، عَ شَ تِن تْورّ نُن قَشّ رَ لْشْي بِرِن، عَ بِرَ ﭑ قْشْ رَ.

²⁴مِشِ نَشَن وَ مَ عَ يّتّ رَكِسِقٍ، نَ كَنيِ لْيمَ نّ. نَشَن عَ يّتّ رَلْيمَ ﭑ تَن مَ قٍ رَ، نَ كَنيِ كِسِمَ نّ.

²⁵دُنِحَ بِرِن سْتْي مُنسٍ قَنمَ مِشِ مَ، شَ عَ سِفَمَ يَهَننَمَ؟

²⁶نَشَن يٌ يَافِمَ ﭑ تَن نُن ﭑ مَ وْيّنيِ شَ قٍ رَ، ﭑ تَن عَدَ مَ شَ دِ قَمَ عَ نْرّ كُي تّمُي نَشّ نُن عَ بَبَ عَلَ نُن عَ شَ مَلٍكّ سّنِيّنشِيٍ شَ نْرّ، ﭑ قَن يَافِمَ نّ نَ كَنيِ شَ قٍ رَ.

²⁷ﭑ شَ نْندِ قَلَ وٌ بّ، مِشِ ندٍيٍ تِشِ وٌ يَ مَ بٍ، نَشٍيٍ مُ قَشَمَ قٌ عٍ عَلَ شَ مَنفّيَ نِينِ تٌ.»

²⁸يِ مَسٍنيِ دَنفِ شَنبِ شِ سٌلٌمَسَشَن حْندْن، عِسَ نَشَ ثِيّرِ، يَيَ، نُن يَكِ شَنِن فٍيَ قَرِ عَلَ مَشَندِدٍ.

²⁹عِسَ تٌ نُ عَلَ مَشَندِقٍ، عَ يَتَفِ نَشَ مَسَرَ. عَ شَ دُفِيٍ قَن نَشَ قِيشّ عَلْ نَءِيَلَنيِ.

³⁰نَ تّمُي، عَننَبِ مُنسَ نُن عَننَبِ عٍلِيَ نَشَ مِنِ عٍ مَ، عٍ نُن عِسَ نَشَ وْيّن.

³¹عٍ مِنِ نْرّ شُنفبٍ نَن كُي، عٍ نُ وْيّنقٍ عِسَ بّ عَ شَ قَشّ شَ قٍ مَ، نَشَن نُ قَقٍ كَمَلِدٍ دَرِ سَلَمُ.

³²شِ شْلِ نُ بَرَ نْ ثِيّرِ نُن عَ بٌورٍيٍ رَ، كْنْ عٍ تٌ شُنُ، عٍ نَشَ عِسَ شَ نْرّ تٌ، عَ نُن نَ شّمّ قِرِن نَشٍيٍ نُ نَ عَ قّ مَ.

³³نَ شّمّ قِرِنيِيٍ تٌ نُ كٍلِقٍ عِسَ شُن، ثِيّرِ نَشَ عَ قَلَ عَ بّ، «مَرِفِ، قٍ قَنيِ نَ عَ رَ مُشُ تٌ نَ بٍ يِ كِ. مُشُ شَ لِنفِرَ سَشَن يَءِلَن، كٍرٍن عِ فبٍ، كٍرٍن عَننَبِ مُنسَ فبٍ، كٍرٍن عَننَبِ عٍلِيَ فبٍ.» ثِيّرِ مُ نُ عَ كٌلٌنشِ عَ نُ سٍسٍ نَشَن قَلَقٍ.