Luka 9:2-33

²Ia i hetamaridi Eaubada ena basileia se lauguguiaei, eo tauasiasiebo se hemauridi.

³Ie ribalau aridi eai, i ene, “Emi lauwasi enana tabu saha au bahei, tabu tue, tabu tobo, tabu aiai, tabu moni; tabu emi pereue au heona labui.

⁴Ena au awasae hari numa hari numa, metai au mia e emi huia lau.

⁵Ena headi nige se eogaisinimiu, eanua me emi huia laugabaena, aemiu geregeredi au oiluilui gabaedi adi giru heiheinoina.”

⁶Isi se lauo, eanua se baeawaidi, evanelia se lauguguiaei, eo tatao asiasiebo hari tupo hari tupo se hemauridi.

⁷Ena laulau gamagamagari Heroda tetaraki wasadi i ataiei: nuana i ponopono, paana headi si ene, Ioane mate eai i torouioma.

⁸Headi hinage si ene, Elia i lagema; eo headi si ene, peroveta esau mumuga eai wa, i torouio.

⁹Heroda i ene, “Ioane uruna ea tomhai wa: na ia eai nei laulau ne i ginauridi wasadi ea ataiedi wa?” I henua Iesu bena i ita.

¹⁰Aposotolo tataodi se uioma edi abiabi gamagamagari wa ia abo se heriba. Ia abo i woealaedi, se lausuarayamuyamui edi dobila eanua esau esana Betesaida wa malatupama eai.

¹¹Tatao se ita, ia abo se hemuriwatai: i oiamidi, Eaubada ena basileia ribadi i heribadi, headi hinage se asiebo abo i hemauridi,

¹²Mahana i taru’eo, saudoudoi‐labui se laoma, se ribalau ia arinai, si ene, “Moutuadi wa u hetamaridi bena se lau eanua eo oea se lauhetaiiri, se eno, eo aiai se eoo, paana ita malatupama eai ta mimia ta.”

¹³Ia i ribalau aridi eai, i ene, “Aiai adi au mosedi.” Isi si ene, “Ama falawa gagiridi haligigi, eo eama labui mo: taba ai lau tatao gamagamagari ta adi aiai ai uneune.”

¹⁴Paana tatao mo isi tausani haligigi. Ena heaheatayao i heribadi, i ene, “Au hebawabigabigaesegaidi, hari poru, hari poru, tatao‐labui‐se‐mate‐saudoudoi.”

¹⁵Ena riba se abiwatai nei doha, gamagaridi se hebawabigabigadi.

¹⁶Ia abo falawa haligigi, eo eama labui i abidi, i itasae galewa eai, i lautoi, abo i ihi, i mosei ena heaheatayao aridi eai, abo se toredi moutuadi wa matadi eai.

¹⁷Isi se aiai, e bogadi se sese: aitoredi se tanogogoidi bosa saudoudoi‐labui.

¹⁸Na, ia mo sora ma uurana, ena heaheata maenayao: i hesiolau aridi eai, i ene, “Tatao si ene eau ede eai, wa?”

¹⁹Isi ia arinna se heuio, si ene, “Ioane Bapatiso; headi si ene, Elia; headi hinage si ene, mumuga perovetadi esau i torouioma.”

²⁰I ribalau aridi eai, i ene, “Na, omi au ene eau ede eai wa?” Petero ia arinana i heuio, i ene, “Eaubada ena Keriso.”

²¹Awadi i tawaidi, i lauhesomdi, tabu tau esau wau riba wa se heriba.

²²I ene, “Tau Natuna amamna gamagamagari abo i hearodi, eo babadadi, eo kohena lailaidi, eo tauuriuri ia abo se laupalihibaei, abo se unuhemate, asubena hehaionana eai abo se hetorouioi.”

²³Ia abo i ribalau gamagaridi aridi eai, i ene, “Tau esau ena gadosisi bena i hemuriwataigu, taba iabom i nuagabaeuioi, asubena gamagamagari ena satauro i abiisini, eo i hemuriwataigu.

²⁴Na tau esau, eo esau, ia maurina i nuatuuioi ia mauri abo ie dabu: tau esau eo esau ia maurina i nuagabaei eau debagu eai, ia mauri abo i abi.

²⁵Saha lolona abo tau i abi, taba gogo gamagamagari tanoubu eai ta i abiheohidi, ia maurina abo i gabaei?

²⁶Tau esau, eo esau, i taumaeamaeaegu, eo egu riba i taumaeamaeaedi, tau Natuna ia abo hinage i taumaeamaeaei, ena huia laoma ma namanamarina, eo Tamana namanamarina, eo aneru hetahetabudi namanamaridi hinage.

²⁷Riba mamohoina ede ea heribamiu ta, headi inai se totoro mate sora nige se hearo, Eaubada ena basileia abo se itabagunaei.”

²⁸Teina riba ta i ribaedi wa i lau e asubena haligigi‐haiona se ohi, Petero, eo Ioane, eo Iamesi i woeaidi, i dalasae oea tupina eai, bena i lau‐uura.

²⁹Ma uurana, ana ao ie ori, eo ana lulu se posiposi, eo se balebalelem.

³⁰Na ia maenayao tatao labui se ribariba, isi ede Mose eo Elia:

³¹isi se taumasaraha ma namanamarina, ia matena se ribaribaei, ia Ierusalema eai abo i hearo.

³²Na Petero, ma ana sasaguyao, matadi se enoeno: isi se siliata ena namanamari se ita, eo taudi labui wa maenayao se totoro, edi namanamari hinage se ita.

³³Taudi labui wa Iesu bena se laugabaei. Petero i ribalau Iesu arinai, i ene, “Tanuagagu e, i lolo inai mo ta mia: apa haiona ta abidi: esau enam, eo esau Mose enana, eo esau Elia enana:” na i ribariba gaibu.