Пәнд-несиһәтләр 30:8-31

⁸Сахтилиқ вә ялғанчилиқни мәндин жирақ қилғайсән; Мени гадайму қилмай, байму қилмай, бәлки еһтияҗимға лайиқла рисқ бәргәйсән.

⁹Чүнки зиядә тоюп кәтсәм, Сәндин йенип: «Пәрвәрдигар дегән ким?» — дәп қелишим мүмкин. Яки гадай болуп қалсам, оғрилиқ қилип, Сән Худайимниң намиға дағ кәлтүрүшим мүмкин.

¹⁰Ғоҗайининиң алдида униң қули үстидин шикайәт қилма, Болмиса у сени қарғап ләнәт қилиду, әйипкар болисән.

¹¹Өз атисини қарғайдиған, Өз анисиға бәхит тилимәйдиған бир дәвир бар,

¹²Өзини пак чағлайдиған, әмәлийәттә мәйнәтчилигидин һеч жуюлмиған бир дәвир бар,

¹³Бир дәвир бар — аһ, кибирлигидин нәзири немидегән үстүн, Һакавурлуғидин һали немидегән чоң!  

¹⁴Униң аҗизлар вә йоқсулларни ялмап жутуветидиған чишлири қиличтәк, Езиқ чишлири пичақтәк болған бир дәвир бар!

¹⁵Зүлүкниң икки қизи бар, улар һәрдайим: «Бәргин, бәргин» дәп товлишар. Һәргиз тоюнмайдиған үч нәрсә бар, һәргиз қанаәтләнмәйдиған төрт нәрсә бар, улар болсиму: —

¹⁶Гөр, туғмас хотунниң қарни, Суға тоюнмиған қурғақ Йәр. Вә һәргиз «болди, тойдум» демәйдиған оттин ибарәт.

¹⁷Атисини мәсқирә қилидиған, Анисини кәмситидиған көзни болса, Қарға-қузғунлар чоқулар, Бүркүтниң балилириму уни йәр.

¹⁸Мән үчүн интайин тилсимат үч нәрсә бар; Шундақ, мән чүшинәлмәйдиған төрт иш бар: —

¹⁹Бүркүтниң асмандики учуш йоли, Иланниң ташта беғирлап маңидиған йоли, Кеминиң деңиздики йоли вә жигитниң қизға ашиқ болуштики йолидур.

²⁰Зинахор хотунниң йолиму шундақтур; У бир немини йәп болуп ағзини сүртивәткән кишидәк: «Мән һеч қандақ яманлиқни қилмидим!» — дәйду.

²¹Йәр-зимин үч нәрсә астида беарам болар; У көтирәлмәйдиған төрт иш бар: —

²²Падишаһ болған қул, Тамаққа тойған һамақәт,

²³Нәпрәткә патқан, әргә тәккән хотун, Өз ханиминиң орнини басқан дедәк.

²⁴Йәр йүзидә тени кичик, лекин интайин әқиллиқ төрт хил җанивар бар: —

²⁵Чөмүлиләр күчлүк хәлиқ болмисиму, бирақ язда озуқ тәйярливелишни билиду;

²⁶Суғурлар өзи аҗиз бир қовм болсиму, хада ташларниң арисиға уга салиду;

²⁷Чекәткиләрниң падишаһи болмисиму, лекин қатар тизилип рәтлик маңиду;

²⁸Кәсләнчүкни қол билән тутувалғили болиду, Лекин хан ордилирида яшайду.

²⁹Қәдәмлири һәйвәтлик үч җанивар бар, Кишигә зоқ берип маңидиған төрт нәрсә бар: —

³⁰Һайванатлар ичидә әң күчлүк, һеч немидин қорқмас шир,

³¹Зилва бәйгә ити, Текә, Вә пухралири қоллайдиған падишаһдур.