HEREVA LADA-ISIDIA 30:8-31

⁸Koikoi karadia bona herevadia egu amo bavabidia daudau; ogoḡami eiava taḡa basio henigu, a egu hitolo heḡereḡerena ai mo ba ubugu;

⁹bogagu baine kunu bena baina ḡoremu, bainato “Iehova be daika?” na garina; eiava baina ogoḡami, bena baina henao-henao, bona egu Dirava ladana baina ḡonaḡonalaia na garina.

¹⁰Hesiai tauna na biaguna enai basio habadelaia koikoi; baine uduguiraimu, bena kereremu bae gwauraia na garina.

¹¹Haida ese tamadia e uduguiraidiamu, bona sinadia asie hanamodiamu.

¹²Haida na sibodia edia ita-ita ai ḡoḡoeva-ḡoḡoeva etomamu, a ḡau be edia miro amo do asie ḡoeva.

¹³Haida be matadia e heaḡimu, bona ibunidia e haroroka-rorokamu.

¹⁴Haida na isedia be dare, bona gadigadidia be kaia; idia ese ogoḡami taudia tanobada amo e anidia oremu, bona e dabumu taudia taunimanima bogaragidia amo danu.

¹⁵Doma na mai natuna hahinedia rua; “A henimai, a henimai” e tomu. Ḡau toi bogadia asie kunumu; ḡau hani nega ta asie tomu “Vadaeni”.

¹⁶Gaudia be mase gabuna, bona gabani hahinena bogana, bona tanobada, nega idoinai ranu e maseamu, bona lahi, nega ta asine tomu “Vadaeni”.

¹⁷Tamana e ḡonaḡonalaiamu bona sinana e gwau edeede heniamu tauna matana na koura galodia ese bae giboa lasi, bona ugava ese bae ania.

¹⁸Ḡau toi na mai hoadia bada egu ai; ḡau hani be asi dibagu.

¹⁹Ḡaudia be ugava ena dala guba ai, bona gaigai ena dala hagahaga nadina ai, bona lagatoi ena dala gadobada ai, bona tauhau ena dala hane-ulato enai.

²⁰Heuda-hanai hahinena ena dala binai: e anianimu, bena uduna e dahuamu, bena e tomu “Asina kerere”.

²¹Ḡau toi henudiai tanobada e heude-heudemu; ḡau hani henudiai basine gini auka.

²²Ḡaudia be hesiai tauna, pavapava ai e hahelaomu negana ai; bona kavakava tauna, bogana e kunumu negana ai;

²³bona ta ese se lalokau heniamu hahinena, e headavamu negana ai; bona hesiai kekenina, biaguna gabuna e abiamu negana ai.

²⁴Ḡau hani tanobada ai na mamaraḡi, a idia na a'aonega heherea:

²⁵dimairi na asi goadadia, to taboro negana ai adia e haboumu;

²⁶miḡu danu asi goadadia, to edia ruma na tano lalonai e karamu;

²⁷kwadi na asi edia pavapava, to e raka ere-eremu, tuari oreana na heto;

²⁸vaboha na imamu ai bavabia diba, to ia na pavapava edia ruma ai e nohomu.

²⁹Ḡau toi e raka ruturutumu; ḡau hani e raka turiaturiamu.

³⁰Ḡaudia be leona, uda ḡaudia bogaragidiai ia mo herea, bona ḡau ta vairanai ia na se raka murimu;

³¹bona kokoroku maruanena; bona nani maruanena; bona hanua pavapavana, ena orea matana ai e rakamu.