1Kamongome namba langyuo,
2Wambu peparae Jerusaleme petaminyi dupwa wai pii dake lamaila pupi. Nakama wane ene dokopa namba yaki nyii nao suu pyao mona reto kareyami kande lao suu pyao karapunu pilyamo. Enda mapwae kanda soo yapo nyepala dokopa mona retalamuli pyuo nakamame namba mona reto kareyami. Nakama yuu muiyane dokonape dee yuu ee nengepe wara pii nange dokonape nakama namba moko minyuo epeyami.
3Isaraele wambu nakama nambana iki yapasi ingyuo wanyi wanyi pyuo peteyami. Wambumi nakama randa jiyami dupwa keta nambane lekeleke koo rao randa nyinya lao maingi. Namba Kamongo dokome leto, leya.
4Nakama Isaraele rara dupwa peparae Kamongona pii dake, selapa.
5Kamongome letamo. Aki yulu koo lapo embena rora ambasu dupwame namba keta kando nyiyamisi? Aki mendeme nakama namba yaki nyuo peyamisi? Nakamame mee bange angi daale dupwa lakando papala nakama kapa palyuo kara nalyaminyi.
6Namba nakama Isipi wambu keta kiiramo nyiyu. Nyepala yuu muiyane nenge pulya nange yuu yando dee dokonape mendali pao pii nange yuu dokona lanyuo peyo. Peyonopape nakamame namba Kamongo dokoŋo lao pyapi pyuo soo kara nayami.
7Nambame nakama yuu amenge pingi nenge jingi lyingipi singi dupwana rae maiyuo dee nenge lapo dupwana rae maiyuo pirami lapala nambame nakama lanyuo peyo. Dopa piyunupape nakamame yuu au pyuo narami doko suu pyao nakamame nambana yuu doko lulya ranyi nembo kokwa siyami.
8Purisi dupwame Kamongo anja karase? lao piso see nayami. Namba rangena purisi dupwame namba soo nyii nayami. Akali mupwa dupwame nambamoo pipya mona kana pokoyami. Poropeta dupwame mee bange kingimi wasisi Bealo lenge dokona lao poropeta pii leyami dee mee bange angi mende ingya nayamo dupwana kingi lao peyami.
9Dokona lao namba Kamongo dokome nambana wambu dupwa pipya yanda pimwaiyuo nambana kote pii doko lao retakamiru. Nakamana para pyaraminyi dupwa keta nambame nakama koo piyami laro.
10Neta yalyingi dorena yuu kuki Saiporasa dokona pupi. Papala yuu Keta dokona neta pyakaenge dorena ingyuo mendali pena lape. Larene dokopa yulu dapale mende wamba pii nangende piyamo kanda nangende pira doko emba kandare.
11Wambu rara yuu liti wakale dupwame nakamana anatu dupwa anatu angi daa ingiyamopape yaki nyepala kaeya nange. Dopa piyamopape nambana wambu dupwa nambame nakama rape rape lao minyingi doko kaepala mee bange anatu dupwame nakama kando mende pii nara doko nambana panda dokona alowa pyuo dupwana kingi lao karaminyi.
12Dokona nambame yake doko yuusili minyili lao paka pinyi pyambuo yamarangunya lao romo romo andake pinya lao leto.
13Dokona lao nambana wambu dupwame yulu koo lama ingyuo piyami. Nakamame namba ipwa kamuo nenge guu lao epenge doko mata jiyami. Jepala nakamame ipwa pete sinya lao yuwale kyasiyami. Kyasiyaminyipape yuu kipwa kipwa dupwa yando nao poro lao rali pipala ipwa naku pao karo angi see naya.
14Isaraele wambu dupwa nakama kendemande daa. Nakama kendemande ingyuo manjo nyii nayami. Nakamana nyisu pentenge dupwame akipamo koto pyao karamisi?
15Nakamame Isaraele dupwa kando menda laene ingyuo nenge pyakilyapala pii letaminyi. Nakamame Isaraele wambunya yuu dupwa pyao apa yuu retelyaminyi. Dee nakamana yuu taone dupwa mee ukiaki minyasi sipyamo kame soo kaeyo otelyaminyi.
16Waa, yuu Memipisi akalipi dee yuu Tapanese akali dupwamepe Isaraele wambunya kyawa kuli doko pyao poro lakamilyaminyi.
17Nambame nakama Isaraele wambunya kata wapwakao pupunu dokopa nakamame namba nakamana Kamongo Anatu doko kame soo yaki nyiyami dokome randa dake nakama range keta nyilyaminyi.
18Nakamame Isipi pao ipwa Naele dokona ipwa napala aki bange mende nyerama lao suu pilyamisi? Nakama yuu Asiria pao ipwa Yuporisa dokona ipwa napala aki bange mende nyerama lao suu pilyamisi?
19Nakama rangena koo dokome nakama randa jera. Dee nakamame namba mata jiyami dokome koo ingyuo karaminyi lao lasaka pirasa pira. Dopa piramo dokopa nakamana Kamongo Anatu namba doko yaki nyuo kaeyamo doko yulu ama koo wakasa lao soo nyerami. Namba Kamongo Mupwa Andake Wakasa Ama Porai dokome lapunu pilyamo.
20Kamongo Mupwa Andake Wakasa dokome lao, Isaraele wambu dupwa nakamame yuu wamba nambana porainya renge doko kilya kandeyami. Nakamame namba kamba lao warombo soo lakanda nayami. Lapala yuu kyau ketae dupwanape dee isa renge isarena dupwana anatu angi daa dupwame namwana ee nengepe menape ree palupi dupwa kapa andanyi pyambungi lao lakandeyami.
21Nambame nakama isa girapo yapasi waingi angi doko dopale wara piyu. Dopa piyunupape nakama epapu apiyakale karamano lao kandalapa. Nakama isa girapo momo nao kupwa nenge koo dopale ingilyaminyi.
22Nakama sopo porai dokome wate piminyipape nakamana koo doko kyaya roo dopale ingyuo mee piro karapyamo kandelyo.
23Apa pyuo namwa range koo pali nangeŋe. Namwa mee bange anatu kingi Bealo doko lakanda nangeŋe laramisi? Nakama yuu anda lama lama dokona apa pyuo koo piyami doko kandalapa. Nakama mena kamele inya pundapala kalyuwa koto ralo papyuo karenge dopale ingilyaminyi.
24Yuu muiyane dokona papyuo karenge mena kamele pundapala kalyuwa nyelana suu pingi dokopa mendeme baa minyaro see nange ingilyamo. Dee mena kamele kalyuwa mendeme mena kamele inya doko nyelana suu pingi dokome koto paa nange. Kamele inya dokome wambo pao rapa rapa piru karenge. Nakama dopale ingilyaminyi.
25Isaraele dupwa mee anatu angi daa dupwa anja lao pete pete papiramisa nakama kimbu kape rando dee nakamana pendoko nyuo pisaraŋa dopa pyuo papi nalapape. Pii naraminyipape nakamame lao, Daaŋa namwa kapu kyuo epa narama. Namwa mee bange anatu wakale dupwa mona retapala dupwa moko minyuo panya pilyamano letaminyi.
26Kamongo dokome lao, Waa nyingi akali doko minyaro nyepala kando lenge dokopa baa pakao elyange. Doko suu pyao nakama Isaraele wambu peparae elyame kumarami. Nakamana kiŋipi akali mupwa dupwape purisi dupwape poropeta dupwape peparae elyame kumarami.
27Nakamame lao, Isa doko namwana rakane dee kana doko namwana endangi letaminyi. Dokona nakama peparae elya nyerami. Dokona nakamame namba mata jepala namba karo dokona kapu kyuo epa naminyidokona dake pipalako kaeyaro. Dopa piminyipape nakama randa nyepala dokopa nambame nakama kyawa lete nyele ipu lao piso singi.
28Nakama rangena anatu kingimi wasiyami dupwa anja karamisi? Nakama koo keta palipala rangena anatu dupwame nyisingi ramo doko nyisinya larami. Juta wambu dupwa nakamana yuu taone malu karenge dokoko suu pyao nakamana mee bange malu anatuŋu lao karaminyi.
29Nakama mumu lao pii letaminyi doko akisi? Akipamo nakamame nambamoo pipya yanda pimwaiyuo letamisi?
30Nambame nakama mana langyuo pyalana pipunupape dokome nakama nyiso rola nalyamo. Nambame nakama kata rolae lasaka pyuo dopa pii dapa lao langi laa nalyaminyi. Mena laene gasimwa pokapala nenge nenge manjo pii lenge dopale ingyuo nakamame nakamana poropeta dupwa pyao kumuyami.
31Isaraele wambu dupwa nambame apa letene lao selapape. Nambame nakama kando yuu muiyane dopale ingyuo dee yuu iminjingipi randa sipurengepe yuu dopale ingyuo karose? Namba dopa pii nange dokona akipamo nakama namba karo dokona kapu kyuo epa naramaŋa lao yulu nakama rae mailyamanuli pyuo pinya letamisi?
32Enda mapwae dokome baa kalya pyuo akali nyela penge dokona banya mamakupi dee kalya bangepe dupwa kame soo yaki nyingisi? Doko daa. Dopa pii nange doko kaepala nambana wambu dupwame yuu gii malu namba kame silyaminyi doko yaka lapenge daa.
33Isaraele wambu dupwa nakama pamuku endame akali anja karaminyi lao pyarako soo nyingi dopale ingyuo palyaminyi. Nakamame kamame koo wakasa pilyaminyi dokona pamuku enda wakale dupwa nakamana yulu koo pilyaminyi doko kando mana nyilyaminyi.
34Akali kuki mee kamenge karenge dupwa waa nyakaminyipili lao pyaminyisa ranjama dupwame nakamana komau dupwa para para pilyamo. Dopa pyuo karapalape
35nakamame lao, Namwa koo pii nange. Kamongo dokome namwa kando imbwa nara, lao letaminyi. Dopa laraminyipape nakama koo pipala koo pii nalyamano letaminyi dokona namba Kamongo dokome nakama randa jero.
36Pamuku enda kepo pyuo papingi doko suu pyao nakamana suu pingi alowa pilya pyana pyuo kata wakale wakale pelyaminyi. Dokona Asiria wambu dupwame nakama nyisa nayami. Dopaleko ingyuo Isipi wambu dupwame nakama nyisa naramiko ingyaramopa nakama mona randarami.
37Namba Kamongo dakeme wambu nakama mona mailyaminyi dupwa nambame mata mailyuŋu dokona nakama keta bange mendepe jeraminyi nyuo paa narami. Dokona nakama ayemba yuwa lapala elyame kumuo Isipi yaki nyuo eparami.
