ZABURA 18:28-49

²⁸Dikiri, ndì ma fitila tɛ́ tó nana, ma Luda, ndì ma gusira litɛ gupura ũ.

²⁹Kũ n gbãnao mani fↄ̃ mà kùsɛ kpá karaa, ma Luda gãi mani fↄ̃ mà vĩ gbĩ̀la.

³⁰Luda díkĩna sↄ̃ a yãkɛna bↄtɛna. Dikiri yã mamberu vĩro, à swáswa. À de sɛ̃gbako ũ gbɛ̃ kũ ò nàinↄnɛ.

³¹Dikiri baasiro, dímɛ Luda ũu? Ó Luda baasiro, dín gbɛ̀si ũu?

³²Luda mɛ́ àdi ma gba gbãna, àkũ mɛ́ àdi zɛ́ poromɛnɛ súsu.

³³Àdi tó ma gbá kãi gↄ̃ nna lán zↄ̃ pↄ́ bà, àdi tó màgↄ̃ táa o guleinↄ musu.

³⁴Àdi zĩ̀kanaa dadamɛnɛ ari ma gã̀sã ni fↄ̃ à mↄ̀gotɛ̃ sá gá.

³⁵Ndì n zĩ̀blesɛ̃gbako kpáma, ń ma kũna n ↄplaa, ndì natɛ ǹ ma tↄ́ bo.

³⁶Ndì ma zɛ́ yàasa kũmɛnɛ de ma gbá sún sataro.

³⁷Ma pɛtɛ ma ibɛrɛnↄi ma ń kũkũ, mádi ɛra ma suro, sé ma gɛ ma ń dɛdɛ.

³⁸Ma ń zↄ̃zↄ̃, odi fↄ̃ ò fùtɛ doro, ò lɛ̀tɛ ò gↄ̃̀ katɛna ma gbá lɛ́i.

³⁹N ma gba gbãna ma zĩ̀i kào, n tò ma ibɛrɛnↄ mìi nàtɛmɛnɛ.

⁴⁰N tò ma zãngurinↄ kpɛ lì, akũ ma a ibɛrɛ pìnↄ kàkatɛ.

⁴¹Ò wiki lɛ̀, gbɛ̃ke dí ń sura baro, ò lɛ́ zù Dikirii, adi weḿmaro.

⁴²Ma ń kɛ́ nɛ́kunɛku lán bùsutiti kũ ĩa sɛ̀tɛ bà, ma táa òḿma lán zɛ́ gũn bↄkↄtↄ bà.

⁴³N ma bo gbɛ̃ kũ ò fùtɛ kũmaonↄ ↄĩ, n ma kɛ buri kũ burio mìde ũ. Buri kũ má ń dↄ̃ronↄ dì zↄ̀ blemɛnɛ,

⁴⁴buri zĩ̀tↄnↄ dì kã natɛmɛnɛ. Tó ò ma yã mà, òdi mì natɛmɛnɛ.

⁴⁵Ń kã dì busa, òdi bo kũ lukanaao ń zɛki gbãnanↄn.

⁴⁶Dikiri kun! Arubarikademɛ ma gbɛ̀si ũ! Ò Luda ma surabari tↄ́ bo.

⁴⁷Luda mɛ́ àdi mↄra káḿmamɛnɛ, àdi tó burinↄ mì natɛmɛnɛ,

⁴⁸àdi tó mà piti ma ibɛrɛnↄa. N ma gba gbãna de ma zãngurinↄla, n ma bo gbɛ̃ pãsĩnↄ ↄĩ.

⁴⁹Abire yãi mani n sáabu kpá burinↄ tɛ́, mani n tↄ́ kpá, Dikiri.