SALMOS 18:28-49

²⁸Le' wzaljo' yi' chia'. Le', X̱ana' Dios, wza'ni'o chia' gan zoa' ḻo da' choḻ.

²⁹Yeḻa' wak chio' wžía yin' benne' zanḻe'e, benne' ka' žjake' ḻo wdiḻe. Cha' Le', Dios, sóaḻeno' neda', wak wchinnja' ze'e ka' žape chí'igaken yež ka'.

³⁰Da' ka' žon Dios zej naken ḻi ḻaže', na' x̱tiže'e naken dot da' li. Žape chi'e yógo'te benne' ka' žx̱en ḻáže'gake' Ḻe'.

³¹Toze X̱anžon' nake' Dios. Toze Dios chežo nake' Benne' žape chi'e žo'o.

³²Dios nake' Bennen' žone' neda' benne' waḻe, na' Benne' žeyone' ḻi ḻaže' da' žona' neda'.

³³Žone' ni'a ka zej nak ni'a bžina' yix̱e' na' ẕzoa choche' neda' ḻaw Ya'a Sión chie'.

³⁴Žsedle' neda' nich gak cha'a ḻo wdiḻe, na' nich gak wlewa' da' žsi yag ntóche'do' ka', dan' naken ya bronse.

³⁵Ḻo yeḻa' žeslá chio' wdape chi'o neda', na' ḻen no'o ḻi ža gókḻeno' neda'. Ḻo yeḻa' ži'i ḻaže' chio' bka'n chawo'o neda'.

³⁶Ben chawo'o nez gan tia', na' bi kwila' ḻo nezen'.

³⁷Bsejwa' x̱nezgak benne' ka' ẕžá'agake' neda', na' bena' ga bẕónnjgake', na' bi beyá'a liža' ga bžinte beta' benne' ka'.

³⁸Bena' benne' ka' we', na' bi gok yeyásgake'. Bejbíx̱gake' ẕan ni'a.

³⁹Ben chocho' neda' nich gok cha'a ḻo wdiḻen'. Bzex̱jo' benne' ka' ẕžá'agake' neda' ẕan ni'a.

⁴⁰Beno' bẕonnjgak ḻawa' neda' benne' waḻe ka', na' bžia yi'a benne' ka' bi ẕḻé'egekle' neda' chawe'.

⁴¹Wnnábgekle' no benne' gákḻene' ḻégake' san bi wzóa no benne'. Wnnábgekle' X̱anžo Dios, san bi wzé nage' chégake'.

⁴²Bžia yi'a benne' ka', na' gókgake' ka bix̱te yo dan' ẕzen ḻo be'. Bleja' ḻégake' ka ẕleja' gona' ḻo nez ka'.

⁴³Besló' neda' ḻo na'gak benne' ka' ẕží'igake' chia', na' beno' neda' benne' blo ḻo yež ka', na' ḻáwe'lgak benne' zi'to' ka'. Benne' ka' bi nónbi'a, žóngake' žin chia'.

⁴⁴Kate' béngekle' chia', na' béngake' kan wnnía'. Benne' yež ka' béngake' kan bchi'la' ḻégake'.

⁴⁵Benne' zi'to' ka' gotgak ni'a ná'gake'. Ḻo yeḻa' ẕžebe bžójgake' ḻo yež ẕen ka' chégake'.

⁴⁶¡Ga'n ẕen X̱anžo Dios! ¡Ga'n ẕene' dan' žákḻene' neda'! ¡Ga'n ẕen Dios, Bennen' žeslé' neda'!

⁴⁷Dios žebéj yichje' benne' ka' ẕžá'agake' neda', na' ẕdie' benne' yež ka' ḻo na'a neda'.

⁴⁸Žeslé' neda' ḻo na'gak benne' ka' ẕžá'agake' neda'. Žone' ga ẕnna bi'a benne' ka' bží'igake' chia' neda'. Beslé' neda' ḻo na'gak benne' yichj ža'a ka'.

⁴⁹Wká'n ẕena' Le', X̱ana' Dios, ḻawgak benne' yež ka', na' goḻkza' che La la'y chio' Le'.