Yahaya 5:31-47

³¹Idan zan yi shaida game da kaina, shaidata baza ta zama gaskiya ba.

³²Akwai wani wanda ya ke bada shaida game da ni, na kuwa sani shaidar da yake bayarwa game da ni gaskiya ce.

³³Kun aika zuwa wurin Yahaya, shi kuma ya yi shaidar gaskiya.

³⁴Duk da haka shaidar da na karba bata mutum bace. Na fadi wadanan abubuwa domin ku sami ceto.

³⁵Yahaya fitila ne mai ci, mai haske ne kuma, kun yarda ku yi farinciki da haskensa dan lokaci kadan.

³⁶Amma shaidar da ni ke da ita ta fi ta Yahaya karfi. Domin ayyukan da Uba ya bani ni in yi, wato ainihin ayyukan da nake yi, su ne suke shaida ta cewa, Uba ne ya aiko ni.

³⁷Uba wanda ya aiko ni, shi da kansa ya shaide ni. Ba ku taba jin muryar sa ba, ko ganin kamanninsa.

³⁸Maganarsa kuwa ba ta zaune a zuciyarku, domin baku gaskata da wanda ya aiko ni ba.

³⁹Kuna nazarin littattafai, don a tsammaninku a cikinsu za ku sami rai Madawwami, alhali kuwa su ne suke shaidata.

⁴⁰kuma baku niyyar zuwa wurina domin ku sami rai.

⁴¹Ba na karbar yabo daga wurin mutane,

⁴²amma na sani baku da kaunar Allah a zuciyarku.

⁴³Na zo a cikin sunan Ubana, amma ba ku karbe ni ba. Idan wani ya zo da sunan kansa, za ku karbe shi.

⁴⁴Ta yaya za ku ba da gaskiya, ku da kuke karban yabo daga junanku, amma ba ku neman yabon dake zuwa daga wurin Allah?

⁴⁵Kada ku yi tunani zan zarge ku a wurin Uba. Mai zargin ku shine Musa, wanda kuka sa begenku a cikin sa.

⁴⁶Inda kun gaskata Musa, da kun gaskata da ni domin ya yi rubutu game da ni.

⁴⁷Idan kuwa ba ku gaskata abin da ya rubuta ba, ta yaya za ku gaskata maganata?”