John 5:31-47

³¹“Na ingoda yei na rawodo ri awa sadena awa ingo na gebe adi ae ra.

³²Awarate embo nei mi ingoda yei na rawodo ri awa gebe siri gosewa awa God ra. Na gosena naso jawo da ro sira amone ge be ra.

³³“Ingo ingoda agipo embobo John da yei na rawodo ri awa nganega orase itewo mambusera. Awodo da naso ge be awa gosisewa.

³⁴Awarate embo mi naso jawo da ro sira amone inono aera te nanemi ingoda yei na sena John ingoda yei naso jawo da ge sisira amone ge be ra edo ingo na gebe adewa awa God mi ingo soregadira awa ruvegeove sena.

³⁵John ingoda yei ge sisira awa teta usasa nembodiba da awodo ra. Iji tupo ingo iaviri etewa ainda be awa be usasa nembodiba etira awasedo.

³⁶“Awarate rora nei mi na rawodo ri awa gebe sedo John da ge awa derigurira. Naso ari wasiri goroba de nanemi ena emimi na averi ena awa isaga ira. Edo wasiri goroba de emimi gebe ira awa Mamo mi na itiri bugusena.

³⁷Edo Mamo na itiri bugusena uso dombu awa ingo gae edo uso ge javi awa ingo ingae rate umo daedo na averi awa be isaga edo ira.

³⁸Awarate ingo God da ge ingae ewa ainda be awa na embo God mi ingoda yei uso binga de itiri bugusena awa ingo ge be ae ewa.

³⁹Ingo jiwari awa ajigedo ewa ainda be awa ingo kotewa wasiri natopo atari rawodo badevi awa kotewa. Edo jiwari mi namomo averi awa ujugurira

⁴⁰Awarate ingo naso yei purirowo nanemi wasiri natopo atari itano bae dodo edo ewa.

⁴¹“Na embo mina jasiga orase eura ae ra.

⁴²Na ingo gari ra. Na gari God da dubo bari awa ingoda jo da atae ra.

⁴³Na ingoda yei God da jawo da bugusena te ingo na ujo ae edo ewa. Edo iji amboda embo nei uso jawo topo da bugadira awa ingo mana embo awa ujo ae adewa.

⁴⁴Ingo awa embo mi ingo awa jasiga orase dipapa edo ewa te God mi ingo dipapa arase awa ujo ae edo ewa. Edo ingo ari awodo edo ewa amimi na gebe ae edo ewa.

⁴⁵“Awarate nanemi ingo awa naso Mama da yei bekuba adi ari ge seove. Moses ingo gebe edo ewa embo re amimi ingo bekuba adira.

⁴⁶Awarate ingo Moses gebe mi gebe ae etewa awa ingo na gebe ae etewa ko Moses awa naso jawo da ge jiusira.

⁴⁷Edo ingo ro Moses mi gaisira awa ge be ae edo ewa awasedo ingo na ro sena awa gebe ae ewa.”