Jon 5:31-47

³¹“Buku jo kasehek jo kili tiri lau, idah kameh sahou jo asehek badeh, wendreya.

³²Ndramak ari udu kede-eh atiye sahou tek ili tiri lau. Jo tanan sahou doh badeh, handru.

³³Aha mene tiyani iri lau taha ala le hawe Jon. Iy badeh, anyolom ma asehek iri sahou handru.

³⁴Jo amwenen, jo babudon ta sahou ta ari ndramak winiyan basihidi sahou mene jo asehek taha winiyan barih bwe. Jo asehek sahou dah ja, ta aha katehei budon taha ki-in ta sahou tek, ma Kindrei winiyan sebenei manyah taha udu mwasin.

³⁵Jon badeh, buku sun anya lomadan tinan labai. Len sabe le badeh, aha sekesek ta lomada sun tan.

³⁶“Jon asehek sahou anya, jo are lau, badeh, handru. Arile, lakou ari udu bwele-en labai ja ta sahou ta Jon, eme leheyani aha, jo are lau: Iri gok nane tama atehei eme tek ta jo kamekes ma jo kabwidi iri kano. Iri gok nane jo amekes doh, eme ma leheyani jo ili tiri lau mwan ma badih i buku tama badeh, suni jo eme kon munyak.

³⁷Tama le amwenen atehei jo eme. Iy ndratiye taha ta nyala tekedek tek. Aha banuhun se bohon ma aha batou se badan bwe.

³⁸Aha batawi sahou tan ba-en ndrine aha bwe, ma aha batehei budon taha bala ta iy are lau nane suni jo bwe.

³⁹Aha abo gok ta asilah sahou iri torowenei udu bolo buk ndrabun, tasah budon taha anya, iri sahou doh kameh adeu taha kohan handru udu le buku doh. Idoh mwasin, arile sahou iri ndratorowenei badeh, nyarak udu aliy, ma kohan handru ale badeh, udu ndra hawek.

⁴⁰Arile aha bwale aha ame hawek ta akohok taha kohan handru ta udu le buku doh.

⁴¹“Jo bwalek iri lau masiye jo.

⁴²Jo ndratanan aha. Jo ndratanan, aha badeh, batehei tikisiy ta Kindrei bado ndrine aha bwe.

⁴³Jo eme dah badeh, ta nyara tama. Arile aha baso-ok sahou tek bwe. Buku ari ndramak keme, iy kamasiye nyaran, idah kameh aha anuhun sahou tan ai.

⁴⁴Aha marakon kede-eh, aha winiyan batehei budon taha bame tek bwe. Winiyan bwe en! Tasah, aha abudon boto-on labai ta akohok ndramas tiri lau taha amwenen. Eme ma aha baso-ok ta akohok ndramas nane Kindrei le ari edeu, bwe.

⁴⁵“Aha satehei budon anya, jo tiye ta tama ta aha kameh ales ado ta sahou hawen. Ndramak ari ja udu kede-eh, iy kameh atehei aha a ta mada sahou. Aha anya Moses le kameh winiyan sebenei aha, arile bwe. Moses le kameh atehei aha a ta mada sahou.

⁴⁶Buku aha atehei budon taha in ta sahou ta Moses, badeh aha katehei ki-in ta sahou tek ale. Tasah iri sahou ale ndratorowenei badeh, leheyani jo.

⁴⁷Arile, aha batehei budon taha ba-en tiri sahou iy atorou bwe. Idah kameh aha winiyan batehei budon taha ba-en ta sahou tek bwe le.”