Jon 5:31-47

³¹Te Jisasgo po ma weyu, te po wai, “Enaduba naga ena te Godigo Ogwa da weyu da, te po usu egobeo.

³²Tialima, gasa bidi me bidibo. Tama eno Aya God agai ena tau sabo po te we bidibolo pusubo dao, augwaligo eno wabo po mu po dao konemainogo ebo dao. Tama eno koneai, agai te wali po enade wabo da, te po mu po wabo da.

³³Polobadu dagego te bidi Jonbolo dagego hanalu wali po tagala palai. Tama agai po pusuyu, eno po mu po dao wai.

³⁴Bidi mego eno wabo po tau sabo bidi elaluyu da, te usu da. Me ma, te tobage bidi meni baso da, te me usu da. Tialima, eno homugo Godigo dage ma somainogo. Tama teyu, eno Jon badi dagebolo me eno e po obao.

³⁵Jon da, te sole ula ebo gilama, agai ula we bidi dabebolo mawai dao. Tama dagego pęwadage side te ulade dagego dwagi yai homu osogo yai dao.

³⁶Tialima eno wabo po tau sabo nai me elalubao, te moni bage mu dao. Eno Ayago enabolo sę mani, ena te sę tigidali elama, silimainogo ebao. Te sę dabe eno ebo dao. Tama te ebo sęgo me te we bidi ola menama, augwaligo konebo dao, Ayago ena tagala palobaso, ena asai dao,” Jisasgo te po wai.

³⁷“Tama Aya Godigo ena tagala palobaso ena asai, aga digi eno wabo po tau sabo dao. Dagego agai pedauwalidu wali po me odai menio. Tama dagego agai gesabi me munu me subeo, tama agai po me dagego homude bidibeo.

³⁸Magi basowe? Agai tagala palali bidigo wabo poba duga homu tigidali mubeo,” Jisasgo te po wai.

³⁹“Dagego te homu ebo dao, Godigo asęani po tego dagebolo te bidabo bomo menama, tama dage bidada peyu, bidada paibao. Tama te homu eyu, dagego te po tigidali sogo gegeyu, nedebo dao. Tama te asęani po aga digi enade po page ola mabo dao.

⁴⁰Tiali digi dage enaba aselama, bidabo bomo sagasobo hagela homu ebo dao,” te po wai.

⁴¹“Te ena asali, te we bidi augwaligo enabolo genuai nogi momainogo asobeo.

⁴²Tiali digi eno dage koneanio. Dagego God godolo mu ebo menio, te tiwai homu dagede elalubeo.

⁴³Ena asali te ena Aya Godigo bomo dali genuai nogi dali selasa asiyu, asai digi, tama dagego eno po sabeo. Tiali goli, bidi me deli aga nogi dali asiyu da, teda dagego te bidigo wabo po saibao.

⁴⁴Dagego genuai nogi duga haside sabo dao. Tiali digi, dagego Godigo dagebolo genuai nogi maiabo sę te bomo elama, ebo menio. Tama tibaso, dagego eno wabo po mena tama duga homuba mugowe?

⁴⁵Dagego te eno Godibolo po tų ela mayao po waibao, te homu egimio. Eno te sę egobeo. Dage po tų ela maiabo bidi da Moses dao. Dagego homugo te bidi aga digi dage tau sabo bidi mu dao. Tiali goli agai dage po tų ela maiabo bidi dao.

⁴⁶Dagego Mosesgo asęani poba homu tigidali mu mugi sogo da, teda duga homu tigidali eno wali poba mugi da. Magi basowe? Te bidi Mosesgo enade po polobadu asęani.

⁴⁷Tialima dagego agai asęani poba duga homu tigidali musiąyu da, tibaso magila dagego eno po me mena tama odama, duga homu teba muaibawe? Dage usu egobeo,” Jisasgo te po Juda bage dali wai.