Text copied!
CopyCompare
Bibeli Gusunɔn Gari - Womusu - Womusu 89

Womusu 89:2-51

Help us?
Click on verse(s) to share them!
2Yinni Gusunɔ, kon wunɛn tɔn ɡeerun womu ko sere kɑ bɑɑdommɑɔ. Kon wunɛn bɔrɔkiniru kpɑrɑ sere kɑ bɑɑdommɑɔ.
3Nɑ yɛ̃ mɑ wunɛn kĩru tɑ ko n wɑ̃ɑwɑ sere kɑ bɑɑdommɑɔ. Wunɛn bɔrɔkiniru tɑ ɡirewɑ wɔllɔ.
4Yinni Gusunɔ, ɑ nɛɛ, ɑ kɑ Dɑfidi wi ɑ ɡɔsɑ ɑrukɑwɑni bɔkuɑ. A wi, wunɛn sɔm kowo nɔɔ mwɛɛru kuɑ kɑ bɔ̃ri
5ɑ nɛɛ, kɑɑ ɡoo wunɑ win bweseru sɔɔ u ko sunɔ sere kɑ bɑɑdommɑɔ, kpɑ ɑ win bɑndu tɑ̃sisiɑ sere kɑ bɑɑdommɑɔ.
6Yinni Gusunɔ, wɔllu tɑ nun bɛɛrɛ wɛ̃ɛmɔ mɑɑmɑɑki ye ɑ mɔ̀n sɔ̃. Wunɛn ɡɔrɑdobɑn wuuru tɑ nun siɑrɑmɔ wunɛn bɔrɔkinirun sɔ̃.
7Yinni Gusunɔ, ɑ ǹ sɑɑrɑ mɔ wɔllɔ. Wunɛn ɡɔrɑdobɑ sɔɔ, ɡoo sɑri wi u kɑ nun nɛ.
8A nɑnum mɔ wunɛn ɡɔrɑdo dɛɛrobun suunu sɔɔ. Wunɛn yiiko yɑ kpɑ̃ be bɑ nun sikerenɛn suunu sɔɔ.
9Gusunɔ, wɔllu kɑ tem Yinni, wɑrɑ u dɑm mɔ nɡe wunɛ. Wunɛn bɔrɔkinirɑ nun kɑrewɑ tɑ kɑ sikerenɛ.
10Wunɑ ɑ rɑ nim wɔ̃kun tii suɑbu yɔ̃rɑsie. Gen nim kurenu nù n seewɑ, ɑ rɑ nu suresie.
11A Eɡibitiɡibu tɑɑkɑ ɑ pɛsukɑ nɡe ɡoru. A be, wunɛn yibɛrɛbɑ yɑrinɑsiɑ kɑ wunɛn dɑm.
12Wunɑ ɑ wɔllu kɑ tem mɔ. Wunɑ ɑ hɑnduniɑ tɑkɑ kuɑ kɑ ye yɑ wɑ̃ɑ ye sɔɔ.
13Wunɑ ɑ sɔ̃ɔ yɛ̃sɑn nɔm ɡeu kɑ nɔm dwɑru kuɑ. Guu ni bɑ mɔ̀ Tɑbori kɑ Hɛɛmɔɔ nu wunɛn yĩsiru bɛɛrɛ wɛ̃ɛmɔ.
14Wunɛn ɡɑ̃seru tɑ dɑm mɔ. Wunɛn nɔmu ɡɑ dɑm mɔ.
15Gemɑ mu sɑ̃ɑ wunɛn bɑndun kpɛɛkpɛɛku. Kĩru kɑ bɔrɔkinirɑ rɑ n wɑ̃ɑ wunɛn wuswɑɑɔ.
16Yinni Gusunɔ, doo nɔɔruɡibɑ be bɑ rɑ nun tɑkɑru ko. Bɑ rɑ sĩwɑ yɑm bururɑm sɔɔ wunɛn wuswɑɑɔ.
17Bɑ koo nuku dobu ko tɔ̃ɔ bɑɑtere wunɛn yĩsirun sɔ̃. Kpɑ bu bɛɛrɛ wɑ wunɛn ɡem sɔ̃.
18Domi wunɑ ɑ sɑ̃ɑ ben dɑm kɑ ben bɛɛrɛ. Wunɛn sɑɑbuwɑ sɑ tɑ̃simɔ.
19Yinni Gusunɔ, wunɑ ɑ sɑ̃ɑ bɛsɛ Isirelibɑn tɛrɛru. Wunɛ Dɛɛro, wunɑ ɑ sɑ̃ɑ bɛsɛn sinɑ boko.
20Gɑsɔ, ɑ kɑ wunɛn sɔm kowo be ɑ nɑɑnɛ sɑ̃ɑ ɡɑri kuɑ kɑ̃siru sɔɔ ɑ nɛɛ, ɑ wunɛn dɑm tɑbu durɔ dɑmɡii ɡoo wɛ̃. A nùn ɡɔsɑ wunɛn tɔmbun suunu sɔɔn di ɑ wɔlle suɑ.
21Wiyɑ Dɑfidi wunɛn sɔm kowo. Wiyɑ ɑ bɑndun ɡum tɑ̃re.
22Wunɛn nɔmu ɡɑ ko n nùn nɛniwɑ kem kem. Geyɑ ɡɑ ko n sɑ̃ɑ win dɑm.
23Yibɛrɛbɑ bɑ ǹ kpɛ̃ bu nùn sɑmbɑ ko. Tɔn kɔ̃sobu bɑ ǹ kpɛ̃ bu nùn dɑm dɔre.
24Kɑɑ win yibɛrɛbɑ kpeerɑsiɑ. Kɑɑ be bɑ nùn tusɑ sɛ̃suku.
25Wunɛn bɔrɔkiniru kɑ wunɛn tɔn ɡeerɑ ko n wɑ̃ɑ kɑ wi. Kpɑ ɑ nùn dɑm wɛ̃ kɑ wunɛn yĩsiru.
26Kɑɑ de win bɑndun dɑm mu tɛriɑ sɑɑ nim wɔ̃ku ɡe bɑ mɔ̀ Mɛditerɑnɛn di sere kɑ dɑɑ te bɑ mɔ̀ Efɑrɑtiɔ.
27U koo nun sɔ̃ u nɛɛ, ɑ sɑ̃ɑwɑ win tundo kɑ win Yinni. A sɑ̃ɑwɑ win fɑɑbɑ kowo nɡe kpee bɑɑ mì u rɑ kuke.
28Kɑɑ nùn ko wunɛn bii tɔn durɔ ɡbiikoo. Kpɑ u n sɑ̃ɑ hɑnduniɑn sinɑmbu kpuron sinɑ boko.
29Kɑɑ de wunɛn tɔn ɡeeru tɑ n nùn wɑ̃ɑsi. Kpɑ ɑ kɑ nùn ɑrukɑwɑni bɔke ye yɑ ǹ nɔru mɔ.
30Kɑɑ de win bibun bweseru tɑ n bɑndu dimɔ sere kɑ bɑɑdommɑɔ. Kɑɑ de win bɑndu tu dɑm ɡirɑ nɡe wɔllu.
31Adɑmɑ win bibun bwese te, tɑ̀ n yinɑ tu wunɛn woodɑbɑ mɛm nɔɔwɑ, mɑ tɑ wunɛn yiirebu ɑtɑfiiru kuɑ,
32mɑ tɑ ǹ wunɛn sɔ̃ɔsiru swĩi, mɑ tɑ ǹ wunɛn ɡere mɛm nɔɔwɛ,
33kɑɑ tu sɛɛyɑsiɑwɑ kɑ bokuru ten mɛm nɔɔbu sɑrirun sɔ̃.
34Adɑmɑ ɑ ǹ yinɑmɔ ɑ tu wunɛn tɔn ɡeeru sɔ̃ɔsi win sɔ̃. A ǹ nùn tɔnu kɑndu kuɑmmɛ.
35A ǹ wunɛn ɑrukɑwɑni kusiɑmɔ. A ǹ mɑɑ wunɛn ɡere kɔbiɑmɔ.
36A bɔ̃ruɑ kɑ wunɛn yĩsi dɛɛrɑru mɑ ɑ ǹ Dɑfidi weesu kuɑmmɛ.
37Kɑɑ de win bibun bweseru tɑ n bɑndu dimɔ sere kɑ bɑɑdommɑɔ. Kpɑ win bɑndu tɑ n wɑ̃ɑ bɑɑdommɑ nɡe sɔ̃ɔ.
38Kpɑ tu tɛ nɡe suru. Win seedɑɡii wi u wɑ̃ɑ wɔllɔ u sɑ̃ɑ bɔrɔkini.
39Adɑmɑ wee ɑ sunɔ wi ɑ rɑɑ ɡɔsɑ deri, mɑ ɑ kɑ nùn mɔru kuɑ too.
40A wunɛn ɑrukɑwɑni kusiɑ ye ɑ rɑɑ kɑ wunɛn sɔm kowo bɔkuɑ. Mɑ ɑ win sinɑ furɔ kɑsɑ kuɑ.
41A win ɡbɑ̃rɑnu kpuro kɔsukɑ, mɑ ɑ win kuku yenu sururɑ.
42A derɑ be bɑ sɑrɔ mi, bɑ win ɑrumɑni ɡurɑ. Mɑ bɑ nùn sekuru doke.
43A win yibɛrɛbɑ dɑm kɑ̃. A derɑ bɑ nuku dobu kuɑ.
44A derɑ win tɑbu yɑ̃nu nu dɑm dwiiyɑ. A ǹ kɑ nùn yɔ̃re tɑbu sɔɔ.
45A win bɛɛrɛ kpeesiɑ. Mɑ ɑ win bɑndu surɑ sere kɑ temɔ.
46A derɑ u tɔkɔ kuɑ fuuku, mɑ ɑ nùn sekuru doke.
47Yinni Gusunɔ, sere sɑɑ yerɑ̀ kɑɑ n kukuɑ. Sere sɑɑ yerɑ̀ wunɛn mɔru yɑ ko n seewɑ nɡe dɔ̃ɔ yɑrɑ.
48A yɑɑyo nɡe mɛ nɛn wɑ̃ɑrun tɔ̃ru tɑ dɛ̃ɛbu nɛ. A yɑɑyo mɑ tɔnu wi ɑ tɑkɑ kuɑ kpuro u koo rɑ ɡbi.
49Wɑrɑ u koo kpĩ u n wɑ̃ɑ u kun ɡu. Wɑrɑ u koo kpĩ u tii yɑrɑ ɡɔribun wɑ̃ɑ yerun di.
50Yinni, mɑnɑ wunɛn ɡɑsɔn durom mɛ, mu dɑ. Mɑnɑ nɔɔ mwɛɛ te ɑ Dɑfidi kuɑ kɑ bɔrɔkiniru tɑ wɑ̃ɑ.
51Yinni, ɑ mɛɛrio seku te wunɛn tɔmbɑ dimɔ. A yɑɑyo mɑ nɛnɑ nɑ wunɛn tɔn dɑbi te kpɑre.

Read Womusu 89Womusu 89
Compare Womusu 89:2-51Womusu 89:2-51