Womusu 89:1-28

¹Womu ɡe Etɑni Esirɑhiɡii u kuɑ. Ge wee.

²Yinni Gusunɔ, kon wunɛn tɔn ɡeerun womu ko sere kɑ bɑɑdommɑɔ. Kon wunɛn bɔrɔkiniru kpɑrɑ sere kɑ bɑɑdommɑɔ.

³Nɑ yɛ̃ mɑ wunɛn kĩru tɑ ko n wɑ̃ɑwɑ sere kɑ bɑɑdommɑɔ. Wunɛn bɔrɔkiniru tɑ ɡirewɑ wɔllɔ.

⁴Yinni Gusunɔ, ɑ nɛɛ, ɑ kɑ Dɑfidi wi ɑ ɡɔsɑ ɑrukɑwɑni bɔkuɑ. A wi, wunɛn sɔm kowo nɔɔ mwɛɛru kuɑ kɑ bɔ̃ri

⁵ɑ nɛɛ, kɑɑ ɡoo wunɑ win bweseru sɔɔ u ko sunɔ sere kɑ bɑɑdommɑɔ, kpɑ ɑ win bɑndu tɑ̃sisiɑ sere kɑ bɑɑdommɑɔ.

⁶Yinni Gusunɔ, wɔllu tɑ nun bɛɛrɛ wɛ̃ɛmɔ mɑɑmɑɑki ye ɑ mɔ̀n sɔ̃. Wunɛn ɡɔrɑdobɑn wuuru tɑ nun siɑrɑmɔ wunɛn bɔrɔkinirun sɔ̃.

⁷Yinni Gusunɔ, ɑ ǹ sɑɑrɑ mɔ wɔllɔ. Wunɛn ɡɔrɑdobɑ sɔɔ, ɡoo sɑri wi u kɑ nun nɛ.

⁸A nɑnum mɔ wunɛn ɡɔrɑdo dɛɛrobun suunu sɔɔ. Wunɛn yiiko yɑ kpɑ̃ be bɑ nun sikerenɛn suunu sɔɔ.

⁹Gusunɔ, wɔllu kɑ tem Yinni, wɑrɑ u dɑm mɔ nɡe wunɛ. Wunɛn bɔrɔkinirɑ nun kɑrewɑ tɑ kɑ sikerenɛ.

¹⁰Wunɑ ɑ rɑ nim wɔ̃kun tii suɑbu yɔ̃rɑsie. Gen nim kurenu nù n seewɑ, ɑ rɑ nu suresie.

¹¹A Eɡibitiɡibu tɑɑkɑ ɑ pɛsukɑ nɡe ɡoru. A be, wunɛn yibɛrɛbɑ yɑrinɑsiɑ kɑ wunɛn dɑm.

¹²Wunɑ ɑ wɔllu kɑ tem mɔ. Wunɑ ɑ hɑnduniɑ tɑkɑ kuɑ kɑ ye yɑ wɑ̃ɑ ye sɔɔ.

¹³Wunɑ ɑ sɔ̃ɔ yɛ̃sɑn nɔm ɡeu kɑ nɔm dwɑru kuɑ. Guu ni bɑ mɔ̀ Tɑbori kɑ Hɛɛmɔɔ nu wunɛn yĩsiru bɛɛrɛ wɛ̃ɛmɔ.

¹⁴Wunɛn ɡɑ̃seru tɑ dɑm mɔ. Wunɛn nɔmu ɡɑ dɑm mɔ.

¹⁵Gemɑ mu sɑ̃ɑ wunɛn bɑndun kpɛɛkpɛɛku. Kĩru kɑ bɔrɔkinirɑ rɑ n wɑ̃ɑ wunɛn wuswɑɑɔ.

¹⁶Yinni Gusunɔ, doo nɔɔruɡibɑ be bɑ rɑ nun tɑkɑru ko. Bɑ rɑ sĩwɑ yɑm bururɑm sɔɔ wunɛn wuswɑɑɔ.

¹⁷Bɑ koo nuku dobu ko tɔ̃ɔ bɑɑtere wunɛn yĩsirun sɔ̃. Kpɑ bu bɛɛrɛ wɑ wunɛn ɡem sɔ̃.

¹⁸Domi wunɑ ɑ sɑ̃ɑ ben dɑm kɑ ben bɛɛrɛ. Wunɛn sɑɑbuwɑ sɑ tɑ̃simɔ.

¹⁹Yinni Gusunɔ, wunɑ ɑ sɑ̃ɑ bɛsɛ Isirelibɑn tɛrɛru. Wunɛ Dɛɛro, wunɑ ɑ sɑ̃ɑ bɛsɛn sinɑ boko.

²⁰Gɑsɔ, ɑ kɑ wunɛn sɔm kowo be ɑ nɑɑnɛ sɑ̃ɑ ɡɑri kuɑ kɑ̃siru sɔɔ ɑ nɛɛ, ɑ wunɛn dɑm tɑbu durɔ dɑmɡii ɡoo wɛ̃. A nùn ɡɔsɑ wunɛn tɔmbun suunu sɔɔn di ɑ wɔlle suɑ.

²¹Wiyɑ Dɑfidi wunɛn sɔm kowo. Wiyɑ ɑ bɑndun ɡum tɑ̃re.

²²Wunɛn nɔmu ɡɑ ko n nùn nɛniwɑ kem kem. Geyɑ ɡɑ ko n sɑ̃ɑ win dɑm.

²³Yibɛrɛbɑ bɑ ǹ kpɛ̃ bu nùn sɑmbɑ ko. Tɔn kɔ̃sobu bɑ ǹ kpɛ̃ bu nùn dɑm dɔre.

²⁴Kɑɑ win yibɛrɛbɑ kpeerɑsiɑ. Kɑɑ be bɑ nùn tusɑ sɛ̃suku.

²⁵Wunɛn bɔrɔkiniru kɑ wunɛn tɔn ɡeerɑ ko n wɑ̃ɑ kɑ wi. Kpɑ ɑ nùn dɑm wɛ̃ kɑ wunɛn yĩsiru.

²⁶Kɑɑ de win bɑndun dɑm mu tɛriɑ sɑɑ nim wɔ̃ku ɡe bɑ mɔ̀ Mɛditerɑnɛn di sere kɑ dɑɑ te bɑ mɔ̀ Efɑrɑtiɔ.

²⁷U koo nun sɔ̃ u nɛɛ, ɑ sɑ̃ɑwɑ win tundo kɑ win Yinni. A sɑ̃ɑwɑ win fɑɑbɑ kowo nɡe kpee bɑɑ mì u rɑ kuke.

²⁸Kɑɑ nùn ko wunɛn bii tɔn durɔ ɡbiikoo. Kpɑ u n sɑ̃ɑ hɑnduniɑn sinɑmbu kpuron sinɑ boko.