Text copied!
CopyCompare
Bibeli Gusunɔn Gari - Womusu - Womusu 78

Womusu 78:6-69

Help us?
Click on verse(s) to share them!
6Bii be bɑ koo mɑrurɑ, ben tii bɑ koo ye ɡiɑ, kpɑ bu mɑɑ ye ben bibu sɔ̃ɔsi.
7Sɑɑ yerɑ bɑ koo Yinni Gusunɔ nɑɑnɛ ko. Bɑ ǹ mɑɑ duɑrimɔ ye u kuɑ. Kpɑ bu win woodɑbɑ mɛm nɔɔwɑ.
8Bɑ ǹ mɑɑ mɔ̀ nɡe ben bɑɑbɑbɑ. Domi bɑɑbɑ be, bɑ kuɑ mɛm nɔɔ sɑribɑ, mɑ ben ɡɔ̃ru ɡɑ ǹ kɑ Gusunɔ turo yɔ̃re. Mɑ bɑ kuɑ nɑɑnɛ sɑribɑ Gusunɔn mi.
9Efɑrɑimun bweseru te tɑ tɛnnu mɔ tɑ biruku yirɑ wurɑ tɑbun sɑɑ.
10Tɑ ǹ ten ɑrukɑwɑni yibie ye tɑ kɑ Gusunɔ bɔkuɑ. Tɑ yinɑ tu win woodɑbɑ mɛm nɔɔwɑ.
11Tɑ win sɔm mɑɑmɑɑkiɡii ni duɑri ni u tu sɔ̃ɔsi.
12U mɑɑmɑɑki kuɑ ben sikɑdobɑn wuswɑɑɔ Soɑniɔ Eɡibitin temɔ.
13U nim wɔ̃ku bɛrɑ ɡɑ kpɑɑsinɑ ɡɑ yɔ̃rɑ nɡe ɡɑnɑ, mɑ u derɑ bɑ tɔburɑ.
14Guru wii wurorɑ u derɑ tɑ bu ɡbiiye sɔ̃ɔ sɔɔ. Wɔ̃kuru, kpɑ u de dɔ̃ɔ yɑrɑ yɑ n sɔ̃ɔsire ɡuru wii wuro te sɔɔ.
15U kpenu bɛsukɑ ɡbɑburɔ, mɑ nim bɑkɑm mu kurɑ bɑ nɔrɑ.
16U derɑ nim mu yɑrɑ kpenun di, mɑ mu kokumɔ nɡe dɑɑ bɑkɑrun nim.
17Adɑmɑ kɑ mɛ, bɑɑbɑ be, bɑ wi, Wɔrukoo torɑrimɔwɑ bɑ dɔɔ. Bɑ nùn seesiwɑ ɡbɑburu mi, mi ɡɑ̃ɑnu ku rɑ kpi.
18Mɑ bɑ wi, Gusunɔ nɔɔ kuurɑ bɑ nùn dĩɑnu kɑnɑ ni bɑ kĩ.
19Bɑ nɛɛ, kɑ ɡem, Gusunɔ u koo kpĩ u sun diisiɑ ɡbɑburu mini?
20Geemɑ, Mɔwisi u kpee te so, mɑ nim mu kokɑ nɡe dɑɑrun nim. Adɑmɑ u koo kpĩ u sun diisiɑ? U koo kpĩ u sun yɑɑ wɛ̃ su tem?
21Ye Yinni Gusunɔ u yeni kpuro nuɑ, yerɑ win mɔru yɑ seewɑ nɡe dɔ̃ɔ wi bɑ sɔ̃re win tɔmbu Isirelibɑn sɔ̃.
22Domi bɑ ǹ nùn nɑɑnɛ kue. Bɑ ǹ win somiru yĩiyɔ.
23Kɑ mɛ, u ɡuru wiru woodɑ wɛ̃. Mɑ u wɔllun ɡɑmbobɑ kɛniɑ.
24U derɑ dĩɑ ni bɑ mɔ̀ mɑnnɑ nu bu nɛɛyɑ sɑɑ wɔllun di.
25U bu ye wɛ̃wɑ nɡe mɛ̀n nɔɔ bɑ kĩ. Tɔn boko dimɑ bɑ di.
26Yen biru, u derɑ woo ɡɑ nɑ sɑɑ sɔ̃ɔ yɑri yerun di ɡɑ wɔllu swee. Kɑ win dɑmɑ u woo seeyɑmɑ sɔ̃ɔ yɛ̃sɑn nɔm dwɑru ɡiɑn di,
27mɑ u derɑ ɡunɔsu su sɑrɑmɑ su bu wukiri nɡe tuɑ. Su dɑbi nɡe yɑni sɛɛri nim wɔ̃kun ɡoorɔ.
28U derɑ su wɔrukɑ su tɛrie bɑɑmɑ ben sɑnsɑniɔ.
29Mɑ Gusunɔ u bu wɛ̃ ye bɑ kĩ. Mɑ bɑ di bɑ debɑ.
30Adɑmɑ ye bɑ dimɔ bɑ ǹ kpɑ, dĩɑnu yibɑ ben nɔsɔ.
31Sɑnɑm mɛyɑ Gusunɔ u kɑ bu mɔru kuɑ. Mɑ u be bɑ dɑm bo ɡo. U ben ɑluwɑɑsibɑ so u sururɑ.
32Kɑ mɛ, bɑ wure bɑ torɑ. Bɑ ǹ win sɔm mɑɑmɑɑkiɡii ni nɑɑnɛ kue.
33Mɑ Yinni Gusunɔ u bu doke bɛrum sɔɔ u ben wɑ̃ɑru nɔru koosiɑ nɡe woo. U bu kɑm koosiɑ nɔni kpɑki teeru.
34Yinni Gusunɔ ù n kĩ u bu ɡo, yerɑ ben ɡɑbu bɑ rɑ ɡɔsirɑmɛ win mi ɡiɑ.
35Kpɑ bu yɑɑyɑ mɑ wi, Wɔrukoowɑ u sɑ̃ɑ ben kpee bɑɑ mì bɑ rɑ kuke. Wiyɑ u rɑ mɑɑ bu wɔre.
36Adɑmɑ bɑ ku rɑ ɡem ɡere. Bɑ rɑ n kĩ bu nùn nɔni wɔ̃kewɑ kɑ ben ɡɑri.
37Ben ɡɔ̃ru ɡɑ ǹ kɑ nùn wɑ̃ɑ. Bɑ ǹ mɑɑ ben ɑrukɑwɑni yibie.
38Adɑmɑ kɑ mɛ, Yinni Gusunɔ u rɑ tii nɛnɛ u kun win mɔru kpuro yɔ̃su. U rɑ bu wɔnwɔndu kue, kpɑ u bu ben durum wɔkɑ u kun bu ɡo.
39U rɑ yɑɑye mɑ bɑ sɑ̃ɑwɑ tɔmbu. Bɑ sɑ̃ɑwɑ nɡe woo. Gɑ̀ n doonɑ, ɡɑ ku rɑ wurɑmɛ.
40Nɔn dɑbinɑ bɑ Gusunɔ seesi ɡbɑburɔ. Nɔn dɑbinɑ bɑ win mɔru seeyɑ.
41Bɑ mɑɑ wure bɑ nùn nɔɔ kuurɑ wi, wi u sɑ̃ɑ ben Yinni Dɛɛro.
42Bɑ ǹ tɔ̃ɔ te yɑɑye tè sɔɔ u bu wɔrɑ yibɛrɛbɑn nɔmɑn di kɑ win dɑm.
43Bɑ ǹ mɑɑ yɑɑye sɔm mɑɑmɑɑkiɡii ni u kuɑ Eɡibitiɔ kɑ Soɑnin ɡberu kpɑɑnɛɔ.
44U Eɡibitiɡibun dɑɑnun nim ɡɔsiɑ yɛm, mɑ bɑ kpɑnɑ bu mu nɔ.
45U derɑ ɡbɑbu swɛ̃ɛ yi bu wɔri yi di. Mɑ u derɑ surenu nu bu kɑm kuɑ.
46U derɑ twee yi ben dĩɑnu wɔri yi di. Mɑ u derɑ ben hɑniɑn ɑre kɑm kuɑ.
47U derɑ ɡuru kpenu nu ben resɛm ɡbɑɑnu kɑm koosiɑ. Mɑ woorɑ ben dɑ̃ɑ ɡbɑɑnu sɑnkɑ.
48U derɑ ɡuru ɡbɑ̃ɑ kɑ ɡuru kpenu ben yɑɑ sɑbenu di.
49Mɑ u kɑ Eɡibitiɡii be mɔru seewɑ kɑ dɑm u bu nɔni sɔ̃ɔwɑ. U derɑ ɡɔɔn ɡɔrɑdobɑ bɑ nɑ dɑbi dɑbinu bɑ bu wɔri.
50U ǹ dere win mɔru yu ɡoo sɛ̃ɛnɑ. U bu kɛ̃si kɛ̃si bɑrɑnu kpɛ̃ɛ u kɑ bu ɡo.
51U Eɡibitiɡibu be, be bɑ sɑ̃ɑ Kɑmun bibun bweserun bii tɔn durɔ ɡbiikoo bɑɑwure ɡo, be, be bɑ sɑ̃ɑ ben ɑluwɑɑsirun bibu.
52U derɑ win tɔmbɑ yɑrɑ nɡe yɑ̃ɑ ɡɔ̃ɔ ɡe ɡɑ yɑrimɑ ɡɔ̃run di. Mɑ u bu kpɑrɑ ɡbɑburɔ.
53U bu kpɑrɑ kɑ bɔri yɛndu, bɑ ǹ diirɑ. Mɑ u derɑ nim wɔ̃ku ɡɑ ben yibɛrɛbɑ wukiri.
54Mɑ u kɑ bu dɑ win tem dɛɛrɑmɔ, ɡuu ten mi, te u mwɑ kɑ win dɑm.
55U bwese tukunu ɡirɑ win tɔmbu Isirelibɑn sɔ̃. Mɑ u tem mɛ bɔnu kuɑ u derɑ bɑ sinɑ mi, kuu bekuruɡinu sɔɔ.
56Adɑmɑ bɑ Gusunɔ nɔɔ kuurɑ. Bɑ wi, Wɔrukoo seesi. Bɑ ǹ win woodɑbɑ mɛm nɔɔwɛ.
57Bɑ Gusunɔ dɛsirɑri, mɑ bɑ kuɑ nɑɑnɛ sɑribɑ nɡe mɛ ben bɑɑbɑbɑ bɑ rɑɑ kuɑ. Bɑ wururɑ nɡe tɛn tèn kirikɑ yɑ kusirɑ.
58Bɑ win mɔru seeyɑ kɑ ben bũu turɑnu. Bɑ win nisinu seeyɑ kɑ ben bwɑ̃ɑrokunu.
59Ye Gusunɔ u ye kpuro wɑ, yerɑ win mɔru seewɑ, mɑ u Isirelibɑ yinɑ.
60U sɑ̃ɑ yee te deri te tɑ wɑ̃ɑ Siloɔ. U kuu bekuruɡii te deri tèn mi u rɑ kɑ bu yinnɛ.
61Mɑ u derɑ yibɛrɛbɑ bɑ win woodɑn kpɑkororu mwɑ, tè sɔɔ u rɑ win dɑm kɑ win yiiko sɔ̃ɔsi. U derɑ bɑ kɑ tu doonɑ tem tukumɔ.
62U kɑ win tɔmbu mɔru kuɑ, mɑ u derɑ bɑ bu ɡo tɑbu sɔɔ.
63U derɑ ɑluwɑɑsibɑ bɑ dɔ̃ɔ mwɑɑrɑ, mɑ wɔndiɑbɑ bɑ durɔbu biɑ.
64U derɑ bɑ ben yɑ̃ku kowobu ɡo tɑbu sɔɔ kɑ tɑkobi. Mɑ ben ɡɔminibu bɑ ǹ ben ɡɔɔ swĩ.
65Yerɑ Yinni Gusunɔ u seewɑ nɡe tɔnu wi u dom yɑndɑmɑ. U seewɑ nɡe tɑbu durɔ wɔruɡɔ wi tɑm mu ɡoomɔ.
66Mɑ u win yibɛrɛbɑ so u ɡirɑ. U bu sekuru doke te tɑ ǹ kpeemɔ sere kɑ bɑɑdommɑɔ.
67U Efɑrɑimu Yosɛfun biin bweseru yinɑ. U ǹ tu ɡɔsɑ.
68Yudɑn bweseru kɑ Siɔnin ɡuurɑ u kĩɑ u ɡɔsɑ.
69Guuru miyɑ u win sɑ̃ɑ yeru bɑnɑ tɑ dɑm mɔ nɡe wɔllu kɑ tem mɛ u swĩi sere kɑ bɑɑdommɑɔ.

Read Womusu 78Womusu 78
Compare Womusu 78:6-69Womusu 78:6-69