42Ngaia na God 'e bu'ota'i fa'asiga, ma ka rugasiga fana 'agila fo'asia nga sina, ma nga singari, ma nga buruburu 'i langi 'ilaka'u ni profet gila giri suria nga 'ola lo'oo na'a God 'e iiria, ‘Amooru ta'a 'i Israel, ni 'ola momoori amooru lo'oo moru kwa'ia, ma nga tabonga lo'oo moru launge'enia suria fai akwale'e farisi lo'oo 'ubulana gule'e lefu langalanga, moru sia agea la'u fagu.
43Nga babala lo'oo moru ngaria fe'eni amooru, 'ola fana nunu'i 'ola ala Molok. Moru ngaria la'u mola fe'enia mooru nunu'i 'ola na buruburu na nga god 'ame to'o na'a gila fa'alataa 'ania Refan. Mooru launge'enia nunu'i 'ola lo'oo fana fo'asilaga. Ma tofuna ni 'ola lo'oori, nau ku tari 'amooru fa'asia 'i Israel lalau riufia no'o nga fanua 'i Babilon.’
44“Nga wawarifu dauru, gila ngaria la'u mola nga Babala Abu ana God fe'eniga 'ubulana gule'e lefu langalanga. Gila launge'enia nga Babala Abu lo'oo suria 'olataa na'a God 'e iiria ma ka faate'enia fala Moses.
45'I burina, nga wawarifu dauru gila ngaria no'o babala lo'oo fa'asia nga mama'a aaga. Gila ngaria kau nga babala alata gila leka fe'enia la Josua, ma God 'e taria nga ta'a matari lo'oo fa'asia nga wado aaga, ma ta'a 'i Israel gila ka ngaria no'o faga 'i talaga. Ma nga babala lo'oori 'e nana'i 'ua, alata la Defete ngaia 'e kiingi.
46Ma God ka aile'a fe'enia la Defete, ma ngaia ka soea God 'ani alamia fana 'ani launge'enia nga 'ifi fana, nga God ala Jekob.
47Tafe'ua mala God 'e alamia la Solomon, wela wane ala Defete, fana 'ani launge'enia nga 'Ifi Abu ana.
48“Tafe'ua God ne'e 'inato'o maka ba'ita 'e iiki, ngaia 'ame nana'i 'i 'ubulana babala na'a ta'a gila launge'enia. Nga profet la Aesea laka'u 'e giria nga 'ola lo'oo God 'e iiria,
49‘'I Langi na nga lefu ni to'orunga na nga ba'itangaa agu, ma fanua lo'oo 'i wado ngaia nga lefu fana arulana 'a'aegu ai. Mooru 'ame to'omia no'o 'amooru launge'enia te'efuta 'ifi ne'e le'a maka to'omia fana 'aku to'oru ai. Ma moru 'ame to'omia no'o 'amoru launge'enia la'u te'efuta 'ifi ne'e ba'ita maka to'omia fana 'aku nana'i 'i 'ubulai.
Wane Ni Kwairiinga 7
Wane Ni Kwairiinga 7:42-49