Ekaresia 7:42-49

⁴²Amingetero, God namondeda abuamane gukai futuse, ne ighagha edo, ne utu da damana ava tumonde bainghaoro dae sedo dotutusira. God setiri nunda feroveta eni namondeda abuamane da ari aindae, eminge gefusira: ‘Israel embo, ningivu! Ghaeko 40 ava, reighi tomanako uvu irae da vasa aminda irise, sino fuka de oje dungedo ghuseva amo, jo namokena joba futuse ae edo ghusevu.

⁴³Ne nenda gode eni javo Moloch seraera, ainda kau ava nenda yeyedae simbugedo, bu deinghuse tumondedo ghusevu. A kotugo, nenda gode eni javo Rephan seraera, ainda dangio kau damana avavaga ava, nenda yeyedae bu deinghuse, tumondedo ghusevu. Amo, ne roera nene totofo ungoi useva ava, ne kakara edo ghusevu. Ava sedo na saono, nenda gitofu ya ne bundedo budo yama, Babylon darigedo ambokena aminda fitarera,’ God setiri aminge gefusira.

⁴⁴“God nu nange nange evovodae irise, evetu genembo kaifa eraira ava, ijugari kasama aoro dae sedo, nu namonde dobo itoro dae sisira. Dobo da kau a nunda mindafu ava, Moses kena ijuge gogoghombusira. Etiri ningido, dobo amo, embo boka aimi firedo simbuguseri. Simbugedo, reighi tomanako a uvu irae da vasa aminda bu deinghedo ghuseri. Ne amingusera da beká mo: God nu nemonde dabade irá gheraira ava kasama ari dae sedo useri.

⁴⁵Ainda amboda, namondeda abuamane ambeoro, nenda sasingu a nenda imemesiri doboá budo Moses da ambo jimbi Joshua de dabade fera namondeda reighi eminda teteruseri. Teretero, God sonembetiri, namondeda afamanei gitofu mendeni ava detero sirivo ero, mendeni oju sufuseri. Sumbero, reighi emo abuamane budo, dighi anumbuseri. Anumbedo, dobo amo sekago itutuseri. Itero, dobo vasa daba aminda sifo ghousa ambari ava iriri, David sirorusira.

⁴⁶Siroretiri, God nu David da irari a nunda tumondari ava gido, David dubo bu gogoghombusira. Amo God nombua Jacob tumondedo ghusira daba aindae resena. God ‘avori’ sari ningido, David nunda kambo beká ava itari dae benunu sisira.

⁴⁷Avata erá David nune kambo iteure dae, God imboe usira. Etiri, David da mandi Solomon nune itutusira.

⁴⁸Itutusira avata, God iká bekáda irira amo, jo evetu genembo kambo ungoi itari aminda irari da kaugo iraeri. Ava kotise, God da feroveta eni eminge gefusira:

⁴⁹‘Utu eregoseva? Nanda avo anumba vasa oviri. O enda mo, nanda ata fitari vasari. Givu! Enda, utu isambu nane eteno sirorusira. Ava sedo, nanda kambo kau nange itarevu? O ne nanda avari vasa reda simbugarevu?’ aminge gefusira.