Tukpɔɠaaleʋe Nuiti 13:9-22

⁹GALA ge Manoa wooi mɛnini, GALA ná-geezuɠeelai ʋaani mɔnɔ anzanui ʋɔ bɛ, siɛgi zu é ɠɛni zeini la kpalagaʋɛ, sinigi Manoa la ɠɛni ba ná.

¹⁰É suvilɛni é ɓizɛ, é li, é bo sinigi ma, é ɠɛ ma: «Wɛlɛ, zunui nii é ʋaani pɔ̀ bɛ zɔizu, é ɠula kɛlɛma bɛ̀ mɔnɔ.»

¹¹Manoa wuzeɠeni, é ʋilɛ anzai ʋolu, ti li zunui ʋɔ bɛ, é ɠɛ naa ma: «Ɗa ɠa nɛi è ɓɔɛai anzanui nii ʋɔ?» Naa gooɠaaʋoteni, é ɠɛ ma: «Nà ʋe.»

¹²Manoa ɠɛni ma: «Niizu è-laawooi a ʋilɛna su, tɔgi ɓɛgele ɠa gá so doungoi ná-faa zu, leeni ɠa gá kɛ?»

¹³Ɠɔoɠɔ GALAGI ná-geezuɠeelai gooɠaaʋoteni, é ɠɛ ma: «È-anzai maanɛɛʋɛ é ɓɔɠɔ zo naa pɛ su, nii gè boni ma.

¹⁴É mina leezɛn ansaɠɔgi ma waai mi, é mina dɔɔ ɓɔle, ɓaa gaazulati gani, é mina ani nɔpɛ mi, nii kɔzɔai, é ziɛ ga devei naa, eɠɛʋelei gè boni ma la.»

¹⁵Manoa ɠɛni Ɠɔoɠɔ GALAGI ná-geezuɠeelai ma, naazu: «Va bu gi è zuzo, gi boli yiʋo ɠila kpɛtɛ è ʋɛ.»

¹⁶Ɠɔoɠɔ GALAGI ná-geezuɠeelai gooɠaaʋoteni, é ɠɛ ma: «Anɛɛ ni ɗa sùzosu, gè la ɗa-laamianigi ta mia, kɛlɛ ni ɗa pɔ è gala zalaɠai ɠula Ɠɔoɠɔ GALAGI ʋɛ, naa ɠɛ!» Manoa la ɠɛni kwɛɛ ga Ɠɔoɠɔ GALAGI ná-geezuɠeelai ʋe.

¹⁷É geezuɠeelai ɠaazaɠani, é ɠɛ ma: «È-laaseigi? Naa ɠa a kɛ, nii è bogai, naa laa a zeelina, gi zoo gi è wɔɔlɔ.»

¹⁸Ɠɔoɠɔ GALAGI ná-geezuɠeelai gooɠaaʋoteni, é ɠɛ ma: «Lee vaa zu è gàazaɠasu dàaseigi ma? Daasei be maayikiai.»

¹⁹Manoa boli yiʋoi zeɠeni, é kpɔ vebɛanii ʋa, é gala zalaɠa ɠula kɔtu wolai ma Ɠɔoɠɔ GALAGI ʋɛ. Laavɔɔ vaa ɠɛɛni, siɛgi zu Manoa ta anzai ti ɠɛni wɛlɛzu la,

²⁰abuzogi ɠɛni lɛɛzu geezu ʋelei, é ɗa zeɠe zalaɠa ɠulazuʋɛ, Ɠɔoɠɔ GALAGI ná-geezuɠeelai lɛɛni zalaɠa ɠulazuʋɛ ma abuzogi zu. Manoa ta anzai ti naa ɠaai ma, ti looni zooi ma, ti laaʋɛ.

²¹Ɠɔoɠɔ GALAGI ná-geezuɠeelai la mɔ ɠɛni ɠulani kɛlɛma Manoani bɛ ta anzai. Manoa kwɛɛni naazu ga Ɠɔoɠɔ GALAGI ná-geezuɠeelai ɠɛni de.

²²Manoa ɠɛni anzai ma: «Da zaazu ti, mazɔlɔɔ de GALA kaa.»