Mumutara Ŋic 13:9-22

⁹Eme Anutuzi Manoare dâŋ manarâ aŋelo‐ticne mocwâc soreme ŋokac e gieo ŋehuc juhame fisiwec. Dameŋ ira ine ŋowe‐ticne Manoa e ŋonâŋ‐ticnehec mâmâc mi jupic.

¹⁰Irec ŋokaczi ʒocnehec gasackerâ ra ŋowe‐ticne ʒiŋuc âzâcnewec: “Manakic, ŋic jucne fisiwec e ʒi mocwâc ware fua‐narekac.”

¹¹Iŋuc mume Manoa e faharerâ ŋonâŋ‐ticne bâjâperâ ra ŋic wiocnerâ muwec: “Ŋic goki hâcne ŋokac ʒi dâŋ âzâcnemeŋ me?” Mume ŋiczi muwec: “No hâcne.”

¹²Eme Manoazi muwec: “Dâŋgezi sanaŋkeocmuo ine motec sâcmutâc weniŋuc ecnehuc giene bacnezo?”

¹³Iŋuc mume Wofuŋte aŋelozi Manoa âzâcne muwec: “Ŋokac ʒi dâŋ sasawa âzâcnepo irec sâcko rucgereŋ‐ticne bahuc juzejec.

¹⁴E muckonec wiac sasawa fuaekac, waiŋ mecne, erâ opâ sanaŋ gâcne mecne â wiac muac‐ŋopakicne i nâ bâuac moc mi ezejec. Wiac sasawa mutâcnecnepo i aimuŋ jaha soŋaŋkezejec.”

¹⁵Mume Manoazi Wofuŋte aŋelo âzâcnerâ muwec: “Nâhehec ŋehaŋtec noniŋ motecne moc hezurâ rike bâmoc egarenac.”

¹⁶Iŋuc mume Wofuŋte aŋelozi Manoa âzâcnerâ muwec: “Ʒira ŋepemurâ mukomec, erâ sifu nânâ qowige mi nâpemu. Go bâzi moc rikezo mukicko ine Wofuŋ taha bacnezemec.” E Wofuŋte aŋelo i Manoazi mi mana tarawec.

¹⁷Irec wiocnerâ muwec: “Go ʒâŋege mo? Juku dâŋgere fârine fuame bubiaŋ manahuc mu ʒeri egarenacmu.”

¹⁸Iŋuc mume Wofuŋte aŋelozi âzâcne muwec: “Ʒâŋe‐nane i furu, irec wemocte wio‐narekomec?”

¹⁹Iŋuc âzâcneme Manoa e noniŋ motecne erâ nânâ wiac i rorâ qânâ faio Wofuŋte biŋe râewec. Ehame jahere ʒâŋe faio Wofuŋte mâsi moc fuawec.

²⁰Eme alataonec ʒocbâruŋzi sawao feme Manoa â ŋonâŋ‐ticne jahe fi rârâqârehuc domahapire Wofuŋte aŋelozi alatare ʒocbâruŋ maŋko fewec. Feme jahe ʒâhe ʒâŋe mai‐jekic mâreŋko hetutuckerâ fopic.

²¹Eme Wofuŋte aŋelozi Manoa â ŋonâŋ‐ticne mocwâc mi fua‐jactewec. Eme Manoazi ʒiŋuc manawec: I Wofuŋte aŋelo.

²²Ehuc ŋonâŋ‐ticne âzâcnerâ muwec: “Ʒi Anutu honeperecte hâmo‐jâmbâŋkenacmu i.”