9Minti tuvaro Kotiva Manoaava tunte uvaro enseli viva orurantero nahentivano naahoqi vauraqi tuvura. Viva tuvuvaro vira vaativano kia vikantiro mini vaura.
10Enselivano tuvu ntovaro nahentivano kantero nai vaati tiva amireva oruntero virara tiharo, Ike, viva tuvu vaivo. Ti avuqaa qovaramavi vaiintiva qaiqaa tuvu ntaivo, tiro.
11Minti tuvaro Manoaava himpiro nai naata avata varero, vi vaiintiva vaunaini oruntero vira irero tiharo, Are ti naatantira uva tiaravae variaro? tuvaro viva tiharo, Te maa vikave, tiro.
12Minti tuvaro Manoaava vira irero tiharo, Ho ai uvavano vivau vaina entara tetanta nana kaiqae vira umiqaqi virarave? Viva nana kaiqae varaqiro vuanarove? tiro.
13Minti tuvaro Noravano atito enseliva nai tiva amiro tiharo, Ai naatavano te tiva tauna uvara iriqiro vuarire.
14Viva uaini tava kia naarire. Viva uainive, vo iha namarive, Kotiva qioqama tai kararave, kia naarire. Viva ekaa uva te vira tiva amunara avataqiro vuarire, tiro.
15Minti tuvaro Manoaava Noravano atito enselirara tiharo, Ho kia vuane. Are qaqi kairaqe tetanta memeraa naati vo ai unta amiare, tiro.
16Viva Noravano atito enselira vataakero uva ti vaurara kia kankomakero iruvaro enselivano virara tiharo, Te maini variarera, te kia ai kara narerave. Are vi karara qerama vatairera, Nora Kotira vi ofaara iha quara amitaane, tiro.
17Minti tuvaro Manoaava Noravano atito enselirara tiharo, Ho nena autu ntairaqe tetanta are tiana uvava qovaraiqiaina entara ai autu tuahera kaare, tuvaro
18viva tiharo, Nantivarae ti hutuara iraaro? Ti hutu voqaraa autu vairara tira, are kia ho virara kankomakera irinarave, tiro.
19Minti tuvaro Manoaava ofaa autireva iharo, memeraa naati vo varakero, uiti vonavuvata varero, Nora Kotira nora oriqaa iha quara amitora. Ho Manoaava nai naatantiro tave vauvaro Noravano Kotiva aahuva kaiqa vara nimitora.
20Vitanta tave vauvaro ihavano voqamakero iteharo auru vakaa vakaa i vauvaro Noravano atito enseliva ihaqira naaruvaini vura. Manoaava nai naatantiro vira tave, vitanta vataini hiqintivi naitanta viri vataini ke vaura.
21Manoaara aato kenko tuvaro irivuvaro vi vaiintiva Noravano atito enseliva vaura. Ho enseli viva kia qaiqaavata vitanta avuqaa qovarama vura.
22Manoaava nai naatara tiharo, Oho, tetanta variqa vo tavaunara kaara qutuma virarave, tuvaro
Qiata Vaiintinavu 13
Qiata Vaiintinavu 13:9-22