Tinata Valavalar 23:21-35

²¹Tago ra lup nimomo ma ra lukai dir a luveana boko, Ma ba tikai i mata vava ka, na mal boko ma ra mal i tarada.

²²Una toratorom tai tamam nina i ga vangala u, Ma koko una pidimuane tinam ba i tubuan.

²³Una kul ra dovotina, ma koko una ivure mule; Damana bula ra kabinana, ma ra varvateten, ma ra minatoto.

²⁴Tama i ra tena takodo na manga gugu; Ma nina i vangala ra bul i kabinana, na ga tana.

²⁵Boina ba tamam ma tinam dir a gugu, Ma nina i ga kava vaarike u na ga.

²⁶Natugu, una tul tar ra nuknukim tagu, Ma boina ba ra matam na manane kaugu lavur uga.

²⁷Tago ra paiga na vavina i da ra ngala na tung; Ma ra enana vavina i da ra ubu i varvaim.

²⁸I kiki uai da ra tena nilong, Ma i vapeal ra umana tena vavagu pire ra tarai.

²⁹Ia i kairane ra kinadik? Ia i ki na tabun? Ia i tup ia ra varngangar? Ia ra tinata na urur i tur pirana? Ia i kinkin ma pa ta vuna tana? Ia i gavul ra matana?

³⁰Nina diat dia vavabing ma ra kini pire ra polo na vain, Nina diat dia vana ma dia mome kilang ra vain i varpopoto.

³¹Koko una bobe ra vain ba i meme, Ba i tangtagul ta ra momamomo, Ba i kalakalami ta ra nimomo:

³²Namur i varkarat da ra teo, Ma i varpidik da ra varkarat na vui.

³³A matam na gire ra umana enana magit, Ma una ga tatike ra purpuruan na tinata.

³⁴Una da tikai i vava ra ul a ta, Ba varogop ma nam i vava arama ra ul a toro.

³⁵Una biti: Di ga luba iau, ma pa i makmaki; Di ga kita iau, ma pa iau ga kairane; Vingai ina tavangun? Ina tikan mulai upi ra polo na vain.