Leemiso Maxaafaa 23:21-35

²¹aissi giikko, mattottiyaageetinne yoranchchati manqqana; xiskkuwaa daroi asaa wurida curqqaa maizissees.

²²Nena yelida ne aawai odiyoobaa siya; ne aayyiyaakka ceeggido wode karoppa.

²³Tumaa, aadhdhida eratettaa, timirttiyaanne akeekaa shammappe attin, mulekka baizzoppa.

²⁴Xillo na7aa aawai keehippe ufaittana; wozannaama na7aa yelida urikka an poccu gaana.

²⁵Ne aawainne ne aayyiyaa ufaittona; nena yelidaarakka poccu gu.

²⁶Ta na7au, ta zoriyaa ezgga; taani haniyoogaadan hana.

²⁷Aissi giikko, shaaramuxiya maccaasiyaa ciimma ollaa mala; laggettuwaa oiqqiya machchiyaakka un77o ollaa mala.

²⁸A panggadan zuggada naagausu; ammanettenna attumaasaa asaa giddon darissausu.

²⁹“Woo!” giyo waasoi oossee? Azzanoi oossee? Ooshshi oossee? Zuuzuntti oossee? Gaasoi bainnan masunxxiyai oonee? Aifee zo77iyoi oossee?

³⁰Woine eessaa uyiiddi gam77iyaageetussa gidennee? Walahettida woine eessaa uyi uyi be7iyaageetussa gidennee?

³¹Woine eessai zo77ido wode, a merai birilliyaa giddon phooliyo wode, uyishin yalalattiiddi geliyo wode, a xeelloppa.

³²Wurssettan i shooshshadan dukkees; mulumuqqe shooshshadankka ba yiishshaa yiishshees.

³³Ne aifee be7i erennabaa be7ana; ne wozanaikka suure qoppanaunne haasayanau danddayenna.

³⁴Neeni abbaa giddon dambbalai qaattiyo markkabiyaa xeeran zin77ida uraa mala gidana.

³⁵Neeni, “Eti tana dechchidosona; shin taani qohettabeikke. Eti tana wadhdhidosona; shin tau erettibeenna. Hara ushshaa uyanau taani aude denddanddinaashsha?” yaagana.